Malu adi mu bande ya video adi ayisha bantu

¹ “Muananyi wa balume uvua mutuadije kutangila bande wa video eu kayi nansha muanji kuambula dikasa to. Mmutangile bande eu mujima misangu ne misangu. Mbualu bua disanka dinene be bua kuikala ne bia mudimu bidi bijula munda mua bana muoyo wa kunanga Yehowa!” Muledi muena Kristo eu uvua wakula bua bande kayi wa video? Mbande udi ne mutu wa bualu ne: Noé: il marchait avec Dieu. Mamu mukuabu udi kayi Ntemu wa Yehowa muena muana wa balume uvua mumuenene bande wa video wa Noé eu ku nzubu kua muntu mukuabu, wakatumina biro bia filiale dipa dia dolare 90 ne kuebejaye bua kumanya ne tudi ne mikuabu bande bua bana batekete. Bande ya video idi bulongolodi bua Yehowa bupatule idi yambuluisha bikole bana ne bantu bakulumpe.

² Mu dîku: Pakatangila dîku kampanda dia Bantemu bande wa video wa La fermeté des Témoins de Jéhovah face à la persécution nazie, mamu wa mu dîku adi wakamba ne: “Dituku dionso mvua anu ndiebeja mushindu uvua Yehowa muambuluishe bantu ba patupu aba bua kutantamenabu malu adi akemesha a nunku! Diela meji bua malu aa ndingambuluishe bua kumona se: ntatu indi nayi meme mmishadile bikole. Ditangila bande eu ne bana banyi ndibambuluishe bua kumona bushuwa mudibi bikengela kueyemena Yehowa. Mu diyikila nabu malu a mu bande eu kunyima kua bamane kumutangila, tudi bafike ku diambuluisha bana betu ba bakaji bua kuikalabu bakumbane tshishiki bua kutantamena ntatu ne dibakengesha bidi mua kubafikila.”

³ Mu kalasa: Nsonga mukuabu Ntemu wa Yehowa wakapeta mushindu wa kuleja bande wa video wa La fermeté mu kalasa kabu bu wende muyuki. Kumpala, mulongeshi uvua wamba ne: katu munange Bantemu to. Kadi kunyima kua yeye mumane kutangila bande eu, wakamba ne: “Bande eu mmushintulule menemene mmuenenu wanyi bua Bantemu ba Yehowa. Ndi ndaya ne: musangu waluabu kabidi kumbelu kuanyi, nembateleje ne nentuadije kulonga nabu Bible!” Ntshinyi tshivua tshishintuluishe mmuenenu wende? Wakamba ne: tshivua “dinanga dietu dilelela ne lulamatu kudi Nzambi.”

⁴ Mu buambi: Muanetu wa bakaji mukuabu wakasambakena ne muntu mukaji kampanda uvua welakana bua kuangata mukanda, nansha muvuaye ne nkonko pa bidi bitutangila tuetu Bantemu ba Yehowa ne malongesha etu. Muanetu eu wakamupingayina ne bande wa video wa Les Témoins de Jéhovah: un nom, une organisation ne kumubandilabu ne muntu mukaji au ne bayende. Bonso babidi bakakema bikole ne kuitababu bua kulonga Bible. Kuakapatuka tshipeta tshilenga bua diyisha edi, e bubidi buabu bakabanga kutumikila disua dia Nzambi mu nsombelu wabu.

⁵ Nudiku nuenza mudimu ne bande yetu bua yambuluishe bantu bikole anyi?