Mukanda wa kudi Kasumbu Kaludiki

Bu mutukadi ku ntuadijilu wa lukama lua bidimu lua 21 elu, tudi ne disanka dia kunufundila, nuenu ‘bana betu mu ditabuja’ ba pa buloba bujima ne tudi tunuela diboko mulu bua mudimu wenu mukole. (1 Pet. 2:17, MML) Kukadi bidimu bitue ku 2000, Yezu wakebeja ne: ‘Palua Muana wa muntu, neasangane ditabuja pa buloba anyi?’ (Luka 18:8) Mudimu wenu unudi benze ne lukunukunu luonso mu tshidimu tshia mudimu tshishale etshi udi wandamuna eyowa ku lukonko lua Yezu elu! Bamue ba kunudi mbabadiombole ne mbabaseke bua ditabuja diabu. Miaba ya bungi, nudi nutantamena mvita, bipupu, masama anyi nzala. (Luka 21:10, 11) Bua tshisumi tshienu mu midimu miakane, Yezu udi mua ‘kusangana ditabuja pa buloba.’ Bushuwa, badi mu diulu badi basanka batshionkomoka bua bualu ebu!

Tudi bamanye se: kutantamena ki mbualu butekete to. Monayi mateta akafikila bana betu ba mu dimue ditunga dia ku Asia wa ku Ouest. Dikisa Bantemu ba Yehowa mbualu bua tshibidilu mu ditunga adi. Matuku adi panshi aa, bampulushi bakajula tshimvundu e kuimanyika mpuilu kampanda uvua wenzeka mu ditalala muvua bantu batue ku 700. Bakajika njila bua kupangisha bakuabu 1 300 bua kuyabu mu mpuilu amu. Musumba wa bantu bavuale bifueba kuîsu, bamue ba kudibu bikale bampulushi, bakabuela bu mvula muaba uvua mpuilu wenzekela, kukumabu ba bungi bavuamu ne kutua kapia ku bisaasa bivua bibaka bua mpuilu eu. Imue misangu, bena malu a Nzambi banekeshi bakakuma ne tshikisu tshionso bana betu ne mfimbu mikumina misonso.

Malu a mushindu’eu adi atonda tshia bushuwa, kadi kabiena bitukemesha to. Mupostolo Paulo wakafunda ku nyuma wa Nzambi ne: ‘Bantu bonso badi basue kuikala bena kanemu mu Kristo Yezu nebakengeshibue.’ (2 Tim. 3:12) Mu bidimu lukama bia kumpala, bena Kristo bakatantamena bipendu ne mitutu, ne bakashipa mene bakuabu. (Bien. 5:40; 12:2; 16:22-24; 19:9) Malu a muomumue akenzeka mu lukama lua bidimu lua 20, ne kabiyi mpata neatungunuke too mu elu lua 21. Nansha nanku, Yehowa udi utuambila ne: ‘Kakuena tshielelu tshia mvita tshidibu batula bua kukuluisha natshi tshidi mua kuikala ne diakalengele.’ (Yesh. 54:17) Nditujadikila kayipu dilenga dia nunku! Bushuwa, tudi ne mushinga wa bungi ku mêsu kua Yehowa, ke pakafikaye too ne ku diamba mukana mua muprofete wende Zekâya ne: ‘Udi ubisha tshianza tshiende kuudi udi utua mu kamonyi ka dîsu dia Yehowa.’ (Zek. 2:8) Kakuena mushindu wa baluishi ba batendeledi ba Yehowa kutshimunabu bua kashidi to. Ntendelelu mulelela neatshimune!

Tshilejilu, mu ditunga ditudi bakule bualu buadi kulu eku, bungi bua Bantemu ba Yehowa badi bamanyisha Bukalenge mbuvule bikole misangu ibidi mu tshidimu tshia mudimu tshia 2001. Eyowa, bana betu ba muaba au badi bananukila nansha mudiku ntatu mikole, mushindu udibu bananukila miaba mikuabu. Mu tshidimu tshia mudimu tshishale, lumingu luonso bantu 5 066 bavua batambula pa buloba bujima bua kuleja didilambula diabu kudi Yehowa. Mpindieu bapiabapia aba pamue ne tuetu bonso, tudi bapangadije bua ‘kuikala bakumbane ne batuishibue bikole bua malu onso adi Nzambi musue.’​—Kolos. 4:12, NW.

Mona makuabu malu adi menzeke matuku aa mu ditunga dia Grèce adi aleja diya dia mudimu wetu kumpala. Nansha muvuaku buluishi bukole bua bena Ekeleziya Ortodokse wa mu Grèce munkatshi mua bidimu bia bungi, mpindieu Bantemu ba Yehowa mbanyishibue kudi mbulamatadi bu “tshitendelelu tshimanyike.” Mukanda uvua ne mêyi a dianyishibua kua mbulamatadi aa uvua uleja mudi Betele wa mu Grèce muikale “muaba munsantu ne mujidila bua ntendelelu wa Nzambi.” Tudi kabidi ne disanka dia kunumanyisha ne: mu tshidimu tshia mudimu tshishale etshi, tubadi ntukose bimpe bilumbu ne ntuangate mapangadika mimpe bua ntendelelu wetu mu matunga aa: ditunga dia Allemagne, Bulgarie, Canada, États-Unis, Japon, Roumanie ne Russie. Mmunyipu mutudi tuela Yehowa tuasakidila bua mushindu udiye mushiye bibi biunzulula bua mudimu mu matunga aa!

Pa kumona mudi Yehowa ukuatshisha bantu bende mu matuku a ku nshikidilu aa, tudi tumona ne: yeye ke Mulunda mutambe buimpe wa kuikala nende. Tudi tusanka bua malanda mashême atudi nawu nende, bamanye se: mmutunange, udi utulongesha ne imue misangu utupesha manyoka. Eyowa, netutungunuke ne kupeta mateta bua ditabuja dietu. Kadi ditabuja dishindame kudi Yehowa neditukuatshishe. Yakobo wakafunda ne: ‘Bana betu, nububale bu disanka dionso panuapona mu mateta a mishindu ya bungi; bualu bua nudi bamanye ne: diteta dia ditabuja dienu didi dienzeja ditantamana.’ (Yak. 1:2, 3) Kabidi, ditantamana dietu didi dileja dinanga dietu kudi Yehowa, ne muanda eu udi utupesha disanka dia bungi! Bana betu basuibue, ikalayi bajadika se: Yehowa neakuatshishe yonso wa kutudi. Tuetu ne bua kushala ne lulamatu, kakuyi mpata neatuambuluishe bua kubuela mu bukua-panu bupiabupia. Ee, Yehowa mmusue bua tutshimuna.

Nenku, tudi tunudimuija nuenu bana betu balume ne bakaji, bansonga ne bakulumpe, bua kuikala balame bimpe mu lungenyi malu malenga adi matuindile kumpala eku. Mmuenenu wenu ikale bu uvua nende mupostolo Paulo wakafunda ne: ‘Bualu bua ndi mbala makenga a mu tshikondo etshi ne: kaena makumbane bua kuelekejibua ne butumbi budi buamba kumueneshibua kutudi.’ (Lomo 8:18) Eyemena Yehowa paudi upeta buluishi bua mushindu kayi wonso. Tantamana, kulekedi to. Kuakunyingalala nansha kakese to. Dîyi dia Nzambi didi ditujadikila ne: ‘Muntu muakane neikale ne muoyo bua lulamatu luende.’​—Hab. 2:4.

Bana benu,

Kasumbu Kaludiki ka Bantemu ba Yehowa