Utuku udifila ku dibala ne difunda anyi?

¹ Kulonga ne tshipatshila tshia kupeta dimanya dijalame dia Nzambi ne kumanya malu adiye mulongolole kutu kulomba dimanya dia mukanda nansha dikese. Bantu ba bungi mbajadike ne: dimanya kufunda ne kubala mmuanda wa mushinga udi wambuluisha bua kudifila bikole mu ntendelelu wa Yehowa Nzambi. (Buak. 1:3) Bantu ba bungi mbalonge mua kubala ne kufunda mu tulasa tua ABC tutu tulongolola mu bisumbu bia bungi. Batu balongesha mu tulasa etu ne mukanda wa Difila ku dibala ne difunda (ay-sh) padiwu kuoku. Tulasa tua dilonga mua kubala ne kufunda etu mmushindu udi wambuluisha bikole mu matuku makese patupu.​—1 Tim. 4:13; Mat. 24:45.

² Mushindu wa kulongolola tulasa tua dibala ne difunda: Mona imue ngenyi ya mu mukanda au idi ileja mua kulongolola tulasa tua dibala ne difunda: “Anu bu mutubi mu Kalasa ka Mudimu wa Teokrasi, bamanyishi bonso batambule ne bakena batambule badi mua kudifundisha mu tulasa tua dibala ne difunda. Biangata bakulu dipangadika dia se: bidi bikengela kuenza kalasa kamue anyi tuvule tua dibala ne difunda, badi ne bua kusungula muntu mukumbane bua kutulombolaye. . . . Pa tshibidilu bana betu ba balume badi ne bua kuambula bujitu ebu bua kulongesha. Kadi, bikalaku kakuyi muanetu wa balume udi mua kulombola kalasa aka, badi mua kuteka muanetu wa bakaji mukumbane bua kuenzaye mudimu eu. . . . Bakulu badi mua kulomba muanetu wa bakaji bua kulombola kalasa ka bana betu ba bakaji ne/​anyi kalasa ka bansonga badi kabayi banji kutambula. Bu mudi muanetu wa bakaji upingana pa muaba wa muanetu wa balume mu mudimu eu wa dilongesha, udi ne bua kuvuala tshitambala ku mutu. Muaba udibi mua kuenzeka, nebikale ne diambuluisha bikala tulasa etu mua kutumika misangu ibidi anyi isatu ku lumingu, bua se: balongi bamone mua kulubuluka lukasa. Pankatshi pa malongesha, badi ne bua kupesha mulongi mudimu wa kumbelu, wikala mulongeshi ne bua kulongolola ku mbangilu kua dilongesha didi dilonda. Malongesha adi ne bua kuenzeka dîba didi diakanyine bua balongi ba bungi. Bamue badi bakosolola tulasa mu tusumbu tukese ne bafila malongesha kumpala kua Dilonga dia Mukanda dia Tshisumbu. Bakuabu badi batapulula tulasa ne balongesha dîba didi Kalasa ka Mudimu wa Teokrasi kenzeka. Kasumbu ka bakulu ba tshisumbu nekalongolole dîba ne muaba bua tulasa tua tshisumbu tua dibala ne difunda.”

³ Yehowa Nzambi Mufuki wetu mmutufuke ne bipedi bia dikema bia dibala ne difunda. Kadi, bipedi ebi kabiena bidiluila bikala muntu kayi udienzeja nansha. Difutu dinene ditudi tupeta patudi tumanya mua kubala ne kufunda nkufika ku dikala bakumbane bua kumvua Dîyi dia Nzambi ne kutumikila dîyi edi: ‘Bua kubala mukanda eu ne dîyi ditekete munya ne butuku.’​—Yosh. 1:8, NW.