Ditabuja dietu didi ditusaka ku bienzedi bilenga
1 Ditabuja diakasa Noa, Mose ne Lahaba ku bienzedi bilenga. Noa wakibaka buatu. Mose wakalekela masanka a tshitupa tshîpi a mu nzubu wa Pâlo. Lahaba wakasokoka batentekedi ne kutumikilaye mêyi avuabu bamuambile, ke kupandishishaye bena mu dîku diabu. (Eb. 11:7, 24-26, 31) Mmidimu kayi mimpe idi ditabuja dietu ditusaka bua kuenza lelu?
2 Buambi: Ditabuja didi ditusaka bua kuakula bua Nzambi wetu munene ne bua malu adiye mulongolole bua diakalenga dietu dia kashidi. (2 Kol. 4:13) Imue misangu, tudi mua kuelakana bua kuyisha muntu. Kadi patudi ‘tuteka Yehowa ku mpala kuetu misangu yonso,’ tudi tupeta makanda ne buôwa budi bujika. (Mus. 16:8) Ditabuja dietu didi ditusaka bua kuambila balela betu, bena mutumba, bena mudimu netu, balongi netu ne bantu netu bakuabu mu bikondo bionso biakanyine lumu luimpe.—Lomo 1:14-16.
3 Bisangilu: Dibuela pa tshibidilu mu bisangilu mbualu bukuabu bulenga budi ditabuja ditusaka bua kuenza. Bua tshinyi? Bualu patudi tudisangisha mu bisangilu tudi tuleja mutudi batuishibue se: Yezu udi netu ku butuangaji bua nyuma wa Nzambi. (Mat. 18:20) Dibuela edi didi dileja dijinga dietu dia ‘kumvua budi nyuma wambila ekeleziya.’ (Buak. 3:6) Tudi tuangata ne mushinga malongesha adibu batulongeshamu bualu bua ku diambuluisha dia ditabuja dietu tudi tumvua ne: udi utulongesha m’Mulongeshi wetu munene Yehowa.—Yesh. 30:20.
4 Malu atudi tusungula bua kuenza: Dishindika dikole ditudi nadi dia malu adi kaayi amueneka didi ditusaka ku diteka malu a mu nyuma pa muaba wa kumpala mu nsombelu wetu. (Eb. 11:1) Kuenza nunku kudi kulomba kudibudisha bintu bia bungi. Tshilejilu, mukulu kampanda wakabenga kuitaba muanzu munene uvua mua kumupetesha makuta a bungi ku mudimu bualu uvua mua kumupangisha dibuela mu bisangilu, kumufikisha ku dishiya dîku diende ne kulekela mudimu wende wa bumpanda-njila. Tuetu petu tueyemenayiku muetu muonso dilaya edi dia mu Bible dia se: Yehowa neambuluishe aba bonso badi ‘batungunuka ne kukeba diambedi bukalenge [bua Nzambi] ne buakane buende.’—Mat. 6:33.
5 Bantu bakuabu badi bamona bukole budi nabu ditabuja dietu mu nsombelu wetu. Bushuwa, ditabuja dietu ndimanyike pa buloba bujima. (Lomo 1:8) Nunku, tulejayi bonso ku bienzedi bietu bilenga ne: ditabuja dietu didi ne muoyo.—Yak. 2:26.