Mandamuna ku nkonko yenu

▪ Bua tshinyi bidi bikengela kuikala badimuke patudi tufundila bantu mikanda bua kubayisha?

Kufundila bantu mikanda bua kubayisha ng’umue mushindu wa kuyisha lumu luimpe udi mupatule bipeta bimpe kukadi bidimu bia bungi. Kadi malu adi menzeke matuku mashale aa mu bantu mmavuije bantu ne budimu bua bungi batshina mua kukangula mikanda idi mifunda kudi bantu badibu kabayi bamanye. Amvelope udi kayi mumanyike kudiye mufume anyi udi kayi ne adrese wa mufundi batu bamumona misangu ya bungi bu udi ne bualu bubi munda, nangananga padiye mufunda ku tshianza anyi umueneka ne bintu biuwule munda tente. Muntu uudi mutumine mukanda eu udi mua kuwimansha kayi nansha muukangule bua kuubala to. Mmunyi mutudi mua kuepuka bua bualu bua nunku kabuenzeki?

Padiku mushindu, mbimpe kufunda mukanda ne malu a pa amvelope ku mashinyi. Amvelope udi ne bua kuikala ne dîna dia muena ku nzubu. Kufundi pa mutu pende ne: “Kudi bena ku nzubu” to. Bualu bukuabu, wikale misangu yonso ufunda adrese webe pamutu. Bikalabi kabiyi bia meji bua kufunda adrese webe nkayebe, funda dîna diebe ne adrese wa ku Nzubu wa Bukalenge. Kutumi mukanda kawuyi mufunda dîna pamutu nansha. Kufundi adrese wa biro bia filiale nansha.​—Tangila Mudimu wetu wa Bukalenge wa Tshisua-munene 1996 mu Mandamuna ku nkonko yenu.

Udi mua kupeta ngenyi mikuabu ne mukanda wa tshilejilu wa kulonda mu mukanda wa Kalasa ka Mudimu wa Nzambi kadi kakuambuluisha, dibeji dia 71-73. Ngenyi eyi neyituambuluishe bua kufunda mikanda bimpe ne kumona mua kufikisha lumu luimpe kudi bakuabu bantu.