Mabenesha adi muntu upeta padiye uleja dianyisha bua dinanga dia Yehowa—Tshitupa 2
1 Mu tshitupa tshia ngondo mushale tshivua tshiakuila pa tshiena-bualu etshi, bavua bumvuije mishindu inayi itudi mua kuleja mu buambi dianyisha ditudi nadi bua dinanga dia Yehowa. (1 Yone 4:9-11) Mu tshitupa etshi netusakidile mishindu mikuabu itanu. Patudi tudifila tudifidilamu mu mudimu eu wa diambuluisha bakuabu mu nyuma, tudi tupeta masanka.
2 Diyisha mu mpukapuka: Eu mmushindu mutambe buimpe udi wambuluisha bua kupeta bantu badi ne nzala ne nyota ya buakane ne wa kubapesha mikanda yabakuatshisha. Nunku mbimpe ‘kudisumbila tshikondo patshiditshiku’ ne kuyisha dîba dionso didi dimueneka bantu bonso batudi tupetangana nabu. (Ef. 5:16) Tudi ne bua kuikala ne dikima bua kumona mua kuyisha mu mpukapuka, kadi bituikala tuanyisha dinanga dia Nzambi ne majinga adi nawu bantu, netuyishe mu tshikondo tshionso tshidi tshimueneka.—2 Tim. 1:7, 8.
3 Misionere mukuabu wakapeta masanka mavule anu bualu wakatuadija diyikila ne muntu kampanda uvuabu nende mu taksi. Muntu au wakanyisha diyuki adi. Misionere kubanga kuya kumutangila ku nzubu ne kutuadijaye kulonga nende Bible. Muntu au wakalua Ntemu, kukolaye mu nyuma, ndekelu wa bionso kulua too ne mukulu mu tshisumbu!
4 Difundilangana mikanda: Pamu’apa bua bulema kampanda peshi anu bualu kuulu nkubi katuena ne mushindu wa kuyisha ku nzubu ne ku nzubu. Tudi mua kufundila bantu batudi bamanye mikanda, kubayishamu ne mêyi makese, kutumina bantu badi bafuishe mikanda peshi aba batuvua katuyi bapete ku mabu mu teritware wetu. Tudi mua kuela mu mukanda amu trakte umue wa ku idi mipatuke matuku aa udi ukoka ntema ya bantu ne malu a mu Bible adimu ne ukankamija muntu utudi tufundila bua kuandamunaye ne kuelaye nkonko idiye nayi. Umupeshe adrese webe anyi wa muaba udi Nzubu wenu wa Bukalenge, kadi wamanya kumupeshi adrese wa biro bia filiale to.
5 Diyishila ku telefone: Eu mmushindu muimpe menemene wa kupeta bantu batudi katuyi mua kupeta patudi mu diyisha dia ku nzubu ne ku nzubu. Tuetu benze nanku mu buimpe ne budimu ne meji onso, bushuwa tudi mua kupatula bipeta bimpe. Mudimu wetu wa Bukalenge wa ngondo muibidi 2001, mu dibeji 5-6, mbalejemu ngenyi miakanyine ya mushindu wa kupatula bipeta bimpe.
6 Pavua muanetu wa bakaji kampanda uyisha ku telefone, wakakonka muntu mukaji mukuabu ni uvuaku wela meji bua malu adi mua kubafikila yeye ne bena dîku diende mu matuku atshilualua. Muntu mukaji au wakamba ne: ke tshivuaye natshi ku muoyo. Yeye kuambila muanetu wa bakaji ne: bua dipanga ditekemena, uvua mudisombele nkayende ku nzubu. Diditatshisha dia muanetu eu bua bualu buende dimulenga ku muoyo nunku, muntu mukaji au kuitaba bua kumonanganabu nende mu tshisalu tshivua pabuipi apu. Muntu mukaji au e kuitaba bua kutuadijabu kulonga Bible!
7 Diakidila benyi: Tuetu banange bantu netu, netuikale tutangila bua kumanya padi muenyi ulua mu bisangilu bietu bua kumona mua kumuakidila bimpe. (Lomo 15:7) Tuenze muetu muonso bua adimona ne: udi munkatshi mua bantu badi bakeba bua ikale pende bimpe mu nyuma. Bionso bitudi tuenza bua bualu buende ne dimulomba ditudi tumulomba bua kuikalaye ulonga Bible bidi mua kumusaka bua kuitabaye tshitudi tumuambila.
8 Tshikadilu tshietu tshimpe: Tshikadilu tshietu tshimpe tshidi tshienza bua bantu bafike ku dianyisha bulelela. (Tito 2:10) Padi bena panu bela Bantemu ba Yehowa kalumbandi, lumu ludi luya kudi Nzambi wetu. (1 Pet. 2:12) Bualu bua nunku budi kabidi mua kuambuluisha bakuabu bua kudituabu mu njila udi ufikisha ku muoyo.
9 Tshidi tshikukanda bua kukonkonona ne kukuata mudimu ne mishindu itanu eyi idi ituambuluisha bua kuleja dianyisha bua dinanga dinene didi Yehowa mutunange ntshinyi? (1 Yone 4:16) Paudi wenza nanku, neupete masanka mavule.