Mabenesha adi muntu upeta padiye uleja dianyisha bua dinanga dia Yehowa—Tshitupa 1
1 Mupostolo Yone wakafunda ne: “Tuetu tudi ne dinanga, bualu bua [Yehowa] wakadianjila kutunanga.” (1 Yone 4:19) Patudi tuela meji bua bionso bidi Yehowa mutuenzele, tudi tumvua petu bitusaka bua kumuleja dianyisha dikole. Yezu wakashiya tshilejilu tshilenga pa muanda eu bualu wakamanyisha ne butumike buonso dîna dia Nzambi ne Bukalenge buende. (Yone 14:31) Mbimpe tukonkonone imue mishindu itudi mua kulejila dianyisha bua dinanga dia Yehowa ne mabenesha adi afuminaku.
2 Diyisha ku nzubu ne ku nzubu: Yezu wakalongesha bayidi bende mushindu wa kuenza mudimu wa diyisha Bukalenge. Mikenji yakafilaye idi ileja patoke ne: bakaya ku nzubu ne ku nzubu, benda bamanyisha lumu luimpe. (Luka 9:1-6; 10:1-7) Patudi tupeta bantu badi babenga bua kututeleja ne badi batuluisha, bidi bikengela kuikala banange Nzambi ne bantu netu bua tuetu kutungunuka ne kuya ku nzubu ne ku nzubu. Pabi, patudi tuenza mudimu eu, bidi bituambuluisha tuetu bine bualu ditabuja dietu didi dishindama kabidi bikole, tutuishibua bikole ne ditekemena dietu dikenka dibalakana bikole.
3 Bu mutudi tuenza mudimu eu ku buludiki bua banjelu, tudi bafike ku dipeta bantu badi ne nzala ne nyota ya bulelela. (Buak. 14:6) Bantu ba bungi bavuabu bayishe batu bambe ne: bavua basambila bua kupeta diambuluisha tshikondo tshivua Ntemu kampanda mulue kukokola ku tshiibi. Bana betu ba bakaji babidi bamanyishi ba lumu luimpe bavua ne muana mutekete umue pavuabu bayisha ku nzubu ne ku nzubu mu tshimue tshidiila tshia mu Caraïbes. Dîba divua bantu bakulumpe bumvuangana bua kuimanyika mudimu wa dituku adi, muana uvuabu nende wakadiyila nkayende ku nzubu uvua ulonda ne kukokolaye. Muntu mukaji mukuabu wakapatuka mu nzubu au. Pakamona bantu bakulumpe abu, bakayaku ne kuyikilabu nende. Wakababueja mu nzubu ne kubambilaye ne: utshivua ufuminaku ku disambila Nzambi bua amutumine Bantemu bua balue kumulongeshabu Bible.
4 Diyisha mu misesu: Bu mutubi bikole menemene miaba mikuabu bua kupeta bantu ku mabu, diyisha mu misesu mmushindu mulenga wa kuyisha bantu. Kabidi, bantu ba bungi mbasombele mu mpangu minene idi ne bibi binene bitua bikuvu peshi miaba milama kudi bampulushi itudi katuyi mua kubuela bua kuyisha ku nzubu ne ku nzubu. Kadi, dianyisha ditudi nadi bua dinanga dia Yehowa didi ditusaka bua kukeba mushindu wonso udi mua kumueneka bua kuyikila ne bantu ne kubambila mukenji wa Bukalenge, kubayishila mene nansha ne mu misesu.—Nsu. 1:20, 21.
5 Dipinganyina bantu: Bu mutudi tuenda tukeba bantu badi “bamanye majinga abu a mu nyuma,” tudi basue kuenza muetu muonso bua kukumbaja dijinga adi. (Mat. 5:3, NW) Nunku bidi bikengela kupingana bua kumiamina mâyi ku ntete ya bulelela ituvua bakune. (1 Kol. 3:6-8) Muanetu mukuabu wa bakaji wa mu ditunga dia Australie wakapesha muntu mukaji mukuabu trakte kadi yeye eu uvua umueneka bu uvua kayi wanyisha. Nansha nanku, muanetu wa bakaji au wakasuminyina mu diya kumukeba ku nzubu. Pakafikaye ku dimonangana nende, muanetu au wakasangana muntu mukaji au mumane kupeta Bible panyima pa dimonangana diabu dia kumpala. Ke muanetu kubanga kulonga nende Bible!
6 Dilonga Bible ne bantu: Etshi ke tshidi mua kuikala tshintu tshitambe buimpe tshia kuenza tshidi mua kupatuisha bipeta bimpe mu mudimu wetu. Ki mbualu bua disanka menemene bua kuambuluisha bantu bamanye Yehowa, kunyima kubamona bashintulula nsombelu wabu bua kuenza malu adi amusankisha ne pashishe batambula balua bena Kristo bua kuleja mudibu badilambule kudi Nzambi anyi?—1 Tes. 2:20; 3 Yone 4.
7 Mu tshitupa tshia tshiena-bualu etshi tshialonda, netukonkonone mishindu mishilashilangane itudi bapete mabenesha bualu tudi tuleja dianyisha bua dinanga didi Yehowa nadi kutudi.