Nutu nuenza dilonga dia mu dîku anyi?
1 Tatu kampanda muena Kristo wakambila mukulu mukuabu ne: “Ntu nteta bua kuenza dilonga dia mu dîku dia pa tshibidilu, kadi mbikole. Imue misangu, meme ke utu udishipa, anyi mukajanyi kayi ne dijinga dia kulonga ta bana bikale ne malu makuabu a kuenza. Mbingu idi mua kupita ya bungi katuyiku tudikolesha bua kuakaja programe mukuabu bua tuetu kumona mua kuikala kuenza dilonga dia mu dîku dia pa tshibidilu. Ndi mumanye ne: tudi dijinga ne dilonga dia mu dîku ne netuanyishe bua kuteleja mibelu.” Mêyi aa adiku akuvuluija bualu kampanda anyi? Ee ndi mvuluka, bualu mêku a bungi adi ne ntatu ya muomumue idi yiapangisha bua kuikala ne dilonga dia mu dîku dia pa tshibidilu.
2 Elabi meji bua nkonko eyi: Bua tshinyi dilonga dia mu dîku dia pa tshibidilu didi ne mushinga ne ditu dienzeka bua bipatshila kayi? Nnganyi udi mua kulombola dilonga dia mu dîku? Mmikanda kayi itudi mua kulonga mu dîku? Ntshinyi tshitudi mua kuenza bua dilonga kuikaladi disamina bantu muoyo ne dia musangelu, nangananga padi bana ba bidimu bishilangane babuelamu? Bua tshinyi kuenza pa tshibidilu dilonga dia mushindu eu?
BUJITU BUA BALEDI
3 Mukanda wa Nzambi kawena utushiya mu dielakana dia kumanya muntu udi ne bua kuikala ku mutu kua dîku ne kuangata bujitu bua kulongesha bana nansha. ‘Batatu, nubadiundishe bimpe ne dibela ne didimuija bia mukalenge.’ (Ef. 6:4, tuetu mbadi baladike maleta) Batatu bavua ne bua kudiakaja bimpe bua kuambula bujitu ebu ne kuikala mene ne dijinga dikole dia kulongesha ne kubela bana babu. Bikala tatu kayi muena kuitabuja, mukaji muena Kristo udi mua kuenza bidi ne mushinga bua kulombola dilonga dia mu dîku ne kubela bana. (2 Tim. 1:5) Misangu mikuabu bitu bilomba bua mukaji kuambulaye bujitu buonso bua dibela ne dilongesha dia bana mu dîku. (Nsu. 1:8) Kadi pa tshibidilu, tatu wa dîku peshi mene tatu ne mamu bonso babidi ke batu ne bujitu bua kubela, kulongesha ne kukuba bana.—Dut. 6:6,7; 1 Tim. 3:2,4.
KUAKAJA MALU NE KUAPEPEJA
4 Mu dilonga dia mu dîku, nudi mua kubuejamu dibala ne diyukidilangana dia bimue bitupa bia mu Bible anyi kulonga biena-bualu bisunguluke biangatshila mu bibejibeji ta mu mikanda mikuabu ya Société. Malu a dilonga ng’a kusungula bilondeshile majinga a dîku. Malu atu afikila bansonga bu mudi: dibasaka dia balongi nabu bua kuenza bualu kampanda, diseselangana ne balunda badi kabayi balume anyi bakaji bu buobu, didibueja mu malu adibu balongolola mu kalasa, manaya, disungula dia mijiki, mvuadilu, ndengejilu anyi nkoselu wa nsuki ne bienzedi bikuabu bidi bileja malu a tshiendenda, bionso ebi mmalu adi bena mêku mua kuyukila mu dilonga diabu. Kuambulula mêyi adi mu Bible anyi kubaleja tshia kuenza pa kuakaja mmuenenu wabu kudi mua kuikala kuimpe, nangananga bua kuambuluisha bansonga bua kumanyabu tshia kuenza padi njiwu ne mateta mua kulua kubatulukila pashishe.
5 Nansha mudi dilonga dia mu dîku kadiyi ne bua kuikala dienzeka anu mushindu umue ne tshisangilu kampanda tshia mu tshisumbu, tshidibi didi ne bua kuikala anu dilongeshangana malu. Enzayi bua dikale tshikondo tshia disanka; kadi ki ndîba dia kukanyina bana nansha. Kankamijayi bana bua kuikalabu bandamuna mu abu mêyi, nebibambuluishe bua kuya kumpala ne lukasa. Nansha mudi bana ba batekete kabayi mua kumvua bionso ne kubianyisha, nudi mua kubaleja ne: nudi nuanyisha bua mudibu mu dilonga ne nubambuluishe bua kuandamunabu pabu panudi nulonga. Baledi ba meji badi ne bua kuikala ne ntema ku majinga a bana babu bonso, ku ngumvuilu wabu, kuikala ne ntema bua mutantshi udibu mua kushala bateleja ne mudibu bapepeje ludimi luabu bua diakula nabu. Mudimu wa tshisumi muenza ne dinanga neulele buobumue mu dîku ne dikola dia mu nyuma.
KANULEKEDI TO!
6 Bua tshinyi tshisumi tshidi ne mushinga mu muanda udi utangila dilonga dia mu dîku? Bualu kudi malu adi mua kutubueja mu tshitanaji ne makuabu adi mua kupumbishisha bionso bitudi balongolole bua dilonga. Kanulekedi pikalaku kakuyi kabingila ka nsongo bua bintu ebi kupumbishabi bionso binudi balongolole mu dîku.
7 Kulonga Bible mu dîku pa tshibidilu kudi kuambuluisha bana ne kubapaya ne bionso bidi bikengela bua kuluangana ne ntatu ya mu nsombelu. Baledi, nuenu ke badi Nzambi mupeshe bujitu bua bana banudi balelela. Yehowa neanubeneshe binuenza muenu muonso bua kuikala ne dilonga dia Bible mu dîku pa tshibidilu.