Mandamuna ku nkonko yenu

▪ Mmêyi kayi atudi ne bua kulonda bua mvuadilu ne ndengejilu wa mubidi ne nkoselu wetu wa nsuki patudi tuya kuendakana ku Betele ne biro bia filiale?

Patudi tuya ku Betele, ni mbua kubandila nzubu ne biro peshi kukumbula bena mu dîku dia Betele, “mvuadilu wetu, ndengejilu wa mubidi, nkoselu wetu wa nsuki ne ngikadilu wetu bidi ne bua kuikala anu bu patutu tuya mu bisangilu bua kutendelela mu Nzubu wa Bukalenge.” (om 131) Kadi, bavua basangane ne: bamue bana betu, padibu baya ku Betele, badi ne mvuadilu kayi muimpe to. Mvuadilu wa nanku ki mmuakanyine padi muntu uya ku Betele nansha. Mmuenekelu wetu udi ne bua kuikala muakaja bimpe ne wa budipuekeshi, bileja ne: tudi bantu ba mankenda badi badinemeka mudibi biakanyine bua basadidi ba Yehowa Nzambi.​—1 Tim. 2:9, 10.

Bidi nangananga ne mushinga patudi tuya kubandila nzubu ya Betele ne biro bia filiale bualu nzubu eyi itu ikoka ntema ya bantu ba bungi badi kabayi Bantemu badi baya kuyibandila. Bantu abu, anu bua malu adibu bamona, badi mua kudienza lungenyi kampanda bua bantu ba Yehowa ne bulongolodi buende. Yikilayi ne balongi ba Bible ne bantu bakuabu badi bakeba bua kuya ku Betele ne nubavuluije ne: mvuadilu wabu, nkoselu wabu wa nsuki ne ndengejilu wa mubidi bidi ne bua kuikala biakanyine. Bena dîku dia Betele nebanyishe bikole wewe muenze nunku.

Bu mutudi bena Kristo badi bamanyisha mukenji wa Bukalenge, mbimpe tudimukayi bua mmuenekelu wetu kalu tshilenduishi kudi bakuabu. (2 Kol. 6:3, 4) Kadi, ku mmuenekelu wetu mulenga, tudi ne bua kuikala dîba dionso ‘tutumbisha diyisha dia Nzambi, Musungidi wetu, mu malu onso.’​—Tito 2:10.