Mandamuna ku nkonko yenu

▪ Ntshinyi tshitudi ne bua kuikala bamanye patudi tuenda ne telefone ya ku bianza?

Bintu ebi bidi mua kutuambuluisha bua kuyikilangana ne bakuetu muaba kayi wonso utudi mua kuikala. Nansha mudi telefone eyi mua kutuambuluisha, mbimpe tuikale badimuke bua katulu kuenza nayi mudimu dîba didi kadiyi dikumbanyine, bualu idi mua kutubueja mu ditanaji patudi mu buambi anyi mu bisangilu. Kadi mmunyi mudibi mua kuenzeka?

Elabi meji tshidibi mua kukeba bikala telefone wetu wa ku bianza mua kudila dîba ditudi tuyikila ne muntu mu buambi. Muntu utudi tuyisha au udi mua kubimona munyi? Mmeji kayi adiye mua kushala nawu tuetu banji kulekela diyuki dietu nende bua kuanji kuandamuna ku telefone? Bushuwa katuena basue bua kuenza bualu nansha bumue budi mua kupangisha bakuabu bua kutelejabu mukenji wa Bukalenge to. (2 Kol. 6:3) Nunku, patudi ne telefone wa ku bianza, mbimpe tumukange bua kalu kuanji kukosesha diyuki dietu tshitupa peshi kukosesha dia bakuetu patudi mu buambi.

Kadi ntshinyi tshitudi mua kuenza dîba didi muanetu utudi bende nende uyikila ne muntu? Bituikala balongolole bua kuyisha munkatshi mua mêba bungi kampanda, kabienaku bikengela tuetu kushala ne lungenyi luetu luonso lushindamija anu pa mudimu eu anyi? Bua kunemeka mudimu wetu wa tshijila eu, tudi tunulomba bua malu adi kaayi ne mushinga adi anutangila nuenu ne bantu bakuabu nuenze mu mêba makuabu. (Lomo 12:7) Kadi abi kabiena biumvuija ne: nanku mpindieu mbikandikibue bua kubikila muntu ku telefone bua kumuyisha ta kumvuangana nende bua nuenu kupetangana pashishe bua bualu ebu to.

Tudi ne bua kuikala ne budimu bua bungi dîba ditudi tuyikila ku telefone yetu ya ku bianza patudi tuendesha mashinyi, bualu mbaleje bilondeshile malu adi menzekenzeke ne: kuenza nanku kudi kukebesha njiwu mivule ya mashinyi. Tudi ne bua kunemeka mikenji yonso idi ikandika diyikila ku telefone ya ku bianza patudi tuendesha mashinyi.

Tutu tuya mu bisangilu, mu mpuilu ne mu mpungilu bua kutendelela Yehowa ne bua yeye kutulongesha. Nunku dianyisha ditudi nadi bua malu a tshijila aa kadienaku mua kutusaka bua kuanji kukanga telefone yetu ya ku bianza bua kayilu kutubueja anyi kubueja bantu bakuabu mu ditanaji anyi? Pikalaku bualu budi bukengela kutangila pa lukasa, mbimpe tupatukile pambelu, tuye kubuyikidila kule ne muaba udi bisangilu bienzekela. Anyi, tudi ne bua kudiakaja bua kutangila malu onso adi kaayi atangila ntendelelu wetu mu mêba makuabu.​—1 Kol. 10:24.

Diyikila dietu ne bantu ku telefone ya ku bianza dileje misangu yonso ne: tudi tunemeka bakuabu ne tudi ne dianyisha dikole bua malu a mu nyuma.