Tudisuikayi pamue bilenga
1 Mmisangu bungi kayi iukadiku mukatshile ne muleje dianyisha bua mushindu udibu benze mubidi wa muntu? (Mus. 139:14) Tshitupa ne tshitupa tshionso tshia mubidi tshidi tshiumvuangana ne bikuabu, bienza bionso mudimu tshiapamue. Dîyi dia Nzambi didi difuanyikija tshisumbu tshia bena Kristo ne mubidi udi ne bitupa biumvuangana bionso bimpe. Ne diambuluisha dia Kristo udi mutu wabu, bena mu tshisumbu bonso badi ‘bakajangane ne balamakajangane bua dikuatshishangana dia manungu, bu mudi mudimu wa tshitupa tshionso.’ (Ef. 4:16a) Nunku, Yehowa udi mua kuenza mudimu ne bantu bende badi mu buobumue bua kuenza malu a dikema.
2 Bena mu tshisumbu tshia mu bidimu lukama bia kumpala bakenza malu “ne mutshima umue” pa kuambuluishangana mu nyuma ne kupeshangana kabidi bintu. (Bien. 2:44-47) Ne dikuatshisha dia Yehowa, bakatuilangana ne kutshimuna dibaluisha mu buobumue. (Bien. 4:24-31) Bakamanyisha mukenji wa Bukalenge miaba yonso yakayabu, kuyishabu lumu luimpe miaba yonso ivua mimanyike tshikondo atshi. (Kolos. 1:23) Mu bikondo bietu ebi, tshisumbu tshia bena Kristo ntshikumbaje mudimu umue umue eu mu buobumue miaba ya bungi menemene pa buloba. Mmalu kayi adi menze bua mudimu eu kuenzekawu mu buobumue nunku?
3 Dilongesha dia Nzambi didi dibasangisha pamue: Ntendelelu wetu udi utusangisha bonso pa buloba bujima. Mmunyi mudibi nanku? Tudi tuanyisha njila udi Yehowa utupeshila ‘biakudia bia mu nyuma mu tshikondo tshiakanyine.’ (Mat. 24:45, NW) Tudi kabidi tuangata ne mushinga “mapa mikale bantu” adiye mutupeshe bua kuikala balongeshi mu tshisumbu. Patudi tuitaba ne bupuekele malu adi Yehowa mulongolole bua kutudisha mu nyuma, lumvu luetu lua Dîyi dia Nzambi ludi lukola ne lujula munda muetu dijinga didi bantu bonso bamanye dia kuidikija Yezu bu bayidi bende menemene. Tudi ne bua kutungunuka ne kulonga Dîyi dia Nzambi, tuenza muetu muonso bua ‘kupeta buobumue bua ditabuja.’ (Ef. 4:8, 11-13, NW) Utuku udifila pebe bua buobumue buetu bua mu nyuma pa kubala Bible dituku dionso anyi?
4 Malanda ne bena Kristo netu adi atusangisha: Dinanga didi ditusanga pamue, ditubueja mu malanda malenga mu bisangilu. Mu bisangilu ebi, tudi ‘tuvulukangana.’ (Eb. 10:24, 25, MML) Kabiena biumvuija kutangila anu mpala ya bantu patupu to, kadi kubamanya bimpe menemene, kubamona mushindu udi Yehowa ubamona, mmumue ne: kubangata bu biuma bia mushinga muvule. (Hag. 2:7, MMM) Patudi tuteleja mêyi adibu bamba bua kuleja ditabuja diabu, dinanga ditudi babanange didi didiunda ne buobumue buetu pabu budi bukola. Udiku mumanyike bu muntu utu ubuela pa tshibidilu mu bisangilu bia tshisumbu anyi?
5 Benji ba mudimu netu mu buambi: Kuyisha lumu luimpe ne bana betu kudi kutusanga mu buobumue bua kuenza disua dia Nzambi. Mupostolo Paulo wakaleja dianyisha bua ‘benzejanganyi nende ba mudimu bua bukalenge bua Nzambi.’ (Kolos. 4:11) Kuyukidilangana malu atudi bamone ne kuambuluishangana patudi mu buambi kudi kutupetesha mushindu wa kuenza mudimu wetu wa bena Kristo ne kukolesha buobumue buetu.—Kolos. 3:14.
6 Mushindu udi nyuma muimpe usanga bantu mu buobumue: Patudi tudifila mu dienza disua diende, Yehowa udi utubenesha ne nyuma wende. Bidi bituambuluisha bua kubenga kulondakaja tulumbulumbu ne kusomba pamue ne bakuetu mu buobumue. (Mus. 133:1) Bidi bitusaka bua ‘kulama buobumue buetu bua mu nyuma muimpe mu tshisuikidi tshia ditalala.’ (Ef. 4:3) Tuetu bonso tudi mua kuambuluisha bua kutungunuja buobumue budi munkatshi mua bantu ba Nzambi pa kuleja mamuma a nyuma mu malu atudi tuenzelangana.—Gal. 5:22, 23.
7 Kusadila mu buobumue ku bulombodi bua Kristo kudi ‘kudiundisha mubidi mujima, too ne patentamabi bu nzubu mu dinanga.’ (Ef. 4:16b) Kabidi, bidi bitumbisha Yehowa “Nzambi wa ditalala.”—Lomo 16:20.