Mudimu udi ulomba budipuekeshi
1 Dîyi dia Nzambi didi ditubela bua tuikale ‘ne bupuekele; katupingaji bubi pa bubi, kadi tujingilangane diakalenga.’ (1 Pet. 3:8, 9, MMM) Mubelu eu udi menemene utangila mudimu wa buambi. Bushuwa, mudimu wa buena Kristo udi mua kuikala diteta dia budipuekeshi buetu.
2 Budipuekeshi ngikadilu udi utuambuluisha bua kutantamena malu adi kaayi asankisha. Patudi tuyisha, tutu tuya bua kuyikila ne bantu batudi katuyi bamanye badi kabayi bakidilangana bilenga, bamanya ne: bamue ba kudibu nebatuandamune bibi. Bua kutungunuka ne kuyisha nansha tuetu tumona malu a nanku bidi bikengela budipuekeshi. Bana betu ba bakaji babidi bampanda-njila bakenza mudimu mu teritware mukuabu wa bantu ba ngikadilu mikole ya menemene, bakayishamu ku nzubu ne ku nzubu e kuenza nanku dituku dionso diendende edi bidimu bibidi bijima kabayi bapetaku muntu wa kubateleja to! Kadi bakasuminyina, ne lelu’eu kukadi bisumbu bibidi mu teritware au.
3 Tumanyayi tshia kuenza muaba udi bantu ba ngikadilu mukole: Budipuekeshi nebutuambuluishe bua kuidikija Yezu padi bantu batuandamuna bibi ta bamueneka bapange malu. (1 Pet. 2:21-23) Muanetu wa bakaji mukuabu bakamuandamuna mêyi mabi ku munga nzubu musangu wa kumpala kudi mukaji wa ku nzubu aku ne musangu muibidi kudi bayende wa mukaji au, wakamuipata ne kumuipata mu lupangu. Muanetu au wakafukisha anu mimuemue e kuambaye ne: uvua usanka bua kulua kuyikila nabu musangu mukuabu. Biakakemesha mulume au ne mukajende ne bakalua kuitaba bua kuyikila ne Ntemu mukuabu wakalua kuabu, e kuitababu bua kuya mu bisangilu ku Nzubu wa Bukalenge. Kuine aku, muanetu wa bakaji uvuabu bipate au wakalua kubela muoyo ne kubayishaye kabidi malu makuabu. Tudi petu mua kutuyisha bantu ba ngikadilu mukole pa kuleja “bupole ne kanemu.”—1 Pet. 3:15, Muanda Mulenga Lelu; Nsu. 25:15.
4 Tuepukayi diambu: Dimanya ditudi nadi dia Bible kadiena ditupesha bukenji bua kupepeja bantu ta kubamba mêyi a dibapuekesha nawu mishinga to. (Yone 7:49) Pamutu pa nanku, Dîyi dia Nzambi didi ditubela ne: ‘katupendi muntu.’ (Tito 3:2 MMM) Patudi tudileja bantu ba mitshima mipuekele, anu bu muvua Yezu, tudi tukolesha bakuabu ku muoyo. (Mat. 11:28, 29) Diasa muyuki ne budipuekeshi didi dienza padi bua mukenji wetu kulengelelawu bantu.
5 Eyowa, budipuekeshi budi butuambuluisha bua kutungunuka ne kuyisha mu teritware mua bantu ba malu makole. Budi mua kutuyisha tshilunji tshia bantu ba ngikadilu mikole, kabidi budi bukoka bakuabu bua kuteleja mukenji wa Bukalenge. Ndekelu wa bionso, budi busankisha Yehowa, yeye ‘udi upa badi badipuekesha ngasa.’—1 Pet. 5:5.