Mukanda wa Kudi Kasumbu Kaludiki

Bana betu basuibue,

Bidi bienza disanka dia bungi menemene bua kunufundila! Tudi tunuela kalumbandi bua dinanga ne didifila binudi nutungunuka amu ne kuleja. Panuabala Annuaire wa tshidimu etshi nenumone ne: malu a bungi mmenzeke mu tshidimu tshia mudimu tshishale. Tshidimu etshi kabidi tudi benze mêba mapite pa muliyare mujima mu mudimu wa diyisha ne dilongesha mutudi tukankamija bantu mpala ne mpala bua kusemenabu pabuipi ne Yehowa. Kabienaku bualu bua lumu bua kuikala benji ba mudimu pamue ne Nzambi wetu wa butumbi, Tatu wetu wa mu diulu anyi?​—1 Kol. 3:9.

Patudi tumona mudimu udi kumpala eku, tudi batekemene ne: nenutungunuke ne kuidikija lukunukunu ne ditabuja bia basadidi ba Nzambi anu bu mudibu babileje mu Bible. Tshilejilu, mupostolo Paulo uvua ne dijinga dikole dia kuenza mudimu wa bungi bua kuambuluisha bua malu a Bukalenge kutanta kuyawu kumpala. Mbimueneke ne: wakafunda mukanda wende wa kumpala uvuaye mutumine tshisumbu tshia bena Kristo ba ku Kolinto mu tshidimu tshia ndekelu tshia kusomba kuende kua mu Efeso. Bua bivua bitangila malu avuaye mulongolole bua kuenza dîba adi, wakafunda ne: ‘Nenshale ku Efeso too ne ku dituku dia Pentekoste; bualu bakumana kungunzuluila tshibi tshinene ne tshia kuenza mudimu mukole, ne bapumbishi ba bungi badiku.’​—1 Kol. 16:8, 9.

Paulo uvua mulongolole bua kuenza luendu kuya ku Makedonia ne ku Kolinto. Kadi wakajingulula ne: kuvua mushindu wa kuenzaye mudimu munene yeye mushale tshikondo bule kampanda ku Efeso. Paulo mmuntu uvua mumanye mua kuibidilangana ne malu mapiamapia; wakapeta mushindu kampanda muimpe uvuaye mua kubuelela bua kuyisha malu a Bukalenge kumpala muaba uvuaye au, nanku yeye kushintulula programe wende bilondeshile nsombelu au. Tshiibi tshinene tshivua tshifikisha ku mudimu tshivua tshimunzuluila, nenku Paulo kumvua dijinga dikole dia kulambila pende anu pa mushindu uvua mumueneke au bua kubuelela ku tshiibi atshi.

Bua kuenza nanku bivua bikengela mudimu wa bungi: kuyisha lumu luimpe ne kuasa tshisumbu ku Efeso. Panyima pa matuku Paulo wakalua kuambila bakulu ba mu tshisumbu tshiakasabu mu musoko au ne: ‘Tshiakatshina bua kunuambila malu onso akamanya mua kunukuatshisha ne bua kunuyisha padi bantu bunguile, ne ku nzubu ne ku nzubu, ngambila bena Yuda ne bena Gelika bua kukudimunabu mitshima kudi Nzambi ne bua kuitabujabu Mukalenge wetu Yezu Kristo.’​—Bien. 20:20, 21.

Bia muomumue, ba bungi ba kunudi, bana betu basuibue, mbababidile mishindu yonso ivua mibamuenekele bua kuyisha. Tshidimu tshia mudimu tshishale, muayene wa bantu 798 938 bavua bakaje malu bua kumona mua kudifila mu bumpanda-njila. Bamue ba kunudi mbaye miaba ya kule bua kuenza mudimu wa bumisionere. Nudi nuenda numuangalaja lumu luimpe ne tshisumi ne nuasa ne bisumbu. Bakuabu ba kunudi mbalonge miakulu mikuabu bua kumona mua kuambuluisha bantu badi bakula miakulu mienyi badi nenu mutumba. Bakuabu kabidi mbakaje malu bua kuenza mudimu mu teritware ivua kayiyi ne ba kuyishamu peshi bua kuenza mudimu miaba idibu dijinga ne benji ba mudimu ba bungi. Bakuabu mbalue kumona ne: tshiibi tshinene tshia kuenza mudimu ntshiunzuluke mu tulasa, ku midimu ne miaba mikuabu idibu mua kumanyisha mukenji bimpe menemene, nansha bu mudi ku telefone. Malu mamonamona pa buloba bujima adi aleja ne: bantu ba Nzambi, bansonga ne bakulumpe, badi bakeba ne muoyo mujima mishindu ya kufikisha dimanya dia bulelela kudi bantu ba miaba yonso ne bayipeta kabidi.

Numanye ne: Yehowa mmumone munudi nuenza bukole buenu buonso ne udi usanka bikole. Bible udi wamba ne: ‘Nzambi kêna upanga buakane bua kupuaye muoyo wa mudimu wenu ne wa dinanga dinuakaleja bua dîna diende.’ (Eb. 6:10) Tungunukayi ne kubabidila mishindu idi inumuenekela bua nuenu kumona mua kuyisha ntendelelu mulelela kumpala. Bamue ba kunudi badi pamu’apa ne bukole bua kualabaja mudimu eu. Tuetu bonso tudi mua kuluangana bua kuvuija mudimu wetu mudimu udi upatule bipeta bitambe bulenga.

Katuena tukumbaja mudimu wetu wa diyisha eu katuyi tumona buluishi to. Vuluka ne: Paulo mumane kuakula bua tshiibi tshinene tshimunzuluila bua mudimu, wakafunda ne: ‘Bapumbishi ba bungi badiku.’ Bua Paulo, bapumbishi abu bavua bena Yuda ne bantu ba bisamba bia biende, bamue ba kudibu bakamuluisha mpala ne mpala ne bakuabu bakamuelela tshifufu mu musokoko.​—Bien. 19:24-28; 20:18, 19.

Lelu’eu kabidi tudi tumona malu a muomumue. Mutudi tuenda tusemena ku kabutu ka ndongoluelu eu, tudi batekemene buluishi bukole. Satana udi ne ‘tshiji tshikole,’ ne tshiji atshi udi utshitekela nangananga bantu badi bakuatshila Nzambi mudimu. (Buak. 12:12) Kanupu muoyo nansha kakese bua ne: Satana udi “mukokeshi wa buloba.” Yezu wakambila bayidi bende ne: ‘Bu nuenu bikale ba pa buloba, ba pa buloba bakadi kusua bantu babu; kadi bualu bua nuenu kanuena ba pa buloba, ngakunusungulula mu ba pa buloba, nunku ba pa buloba badi nenu lukuna.’​—Yone 14:30; 15:19.

Tudi bapangadije bua kubenga kulekela muntu nansha umue utekesha ditabuja dietu kudi Nzambi anyi ukepeshisha mudimu wetu wa buambi. Tudi bamanye ne: nekuikale anu bantu batuluisha ne batuyila mu tshipangu. Nansha nanku, tudi anu tuya kumpala mu diyisha dia lumu luimpe lua Bukalenge, bikale ne dieyemena se: Yezu neabutule Satana ne bena diende mu tshikondo tshidi Yehowa mulongolole. Baluishi kabavua bakangishe mukana mua mupostolo Paulo to; kabena bakangisha mua basadidi ba Yehowa ba lelu’eu to. Nansha mudi Satana ne tshiji ne bena panu apa bikale netu lukinu, nyuma wa Yehowa udi wenza mudimu ne bukole buonso munkatshi mua bantu Bende. Ndisankapu kayi dia kumanya ne: bantu badi bamanyisha lumu luimpe mbafike mpindieu ku bungi bukuabu bubandile bua bantu 6 304 645!

Tudi amu tusambila bua se: nutungunuke ne kudifila mu mishindu yonso idi imueneka bua kutuma malu a Bukalenge bulengele bua Yehowa kumpala. Tudi tunujadikila se: tudi nenu mu lungenyi luetu ne dinanga dionso bu mutudi “bonso mu buobumue” mu mudimu wa Yehowa Nzambi Mutambe Bunene.​—Sef. 3:9, Mukanda wa Mvidi Mukulu [Katolike, MMM].

Bana benu,

Kasumbu Kaludiki ka Bantemu ba Yehowa