Diasa dia Nzubu ya Bukalenge pa buloba bujima mu amue matunga a ku Mputu
1 Mu bidimu bivule bidi bipite ebi, bavua bakandike mudimu wa Bantemu ba Yehowa mu matunga a bungi a ku Mputu, kusangishamu ne matunga a ku Mputu wa ku Est. Mu miaba ya bungi, mikenji ivuabu bele ya dikandika nayi mudimu eu ivua mikole ya dikema. Bivua bikole bua kuenza bisangilu patoke, ne kakuvua mene nansha mushindu wa kupeta Nzubu wa Bukalenge wa kuenzela bisangilu to. Kadi mu bidimu bidi panshi ebi, ‘Yehowa mmutuenzele malu manene ne tudi ne disanka.’—Mus. 126:3.
2 Kubangila mu tshidimu tshia 1983, ditamba kutatshisha Bantemu ba Yehowa diakatuadija kukepela. Mu tshidimu tshia 1989, mbulamatadi wa ditunga dia Pologne ne dia Hongrie yakanyishila Bantemu ba Yehowa bua benze mudimu wabu. Mu tshidimu tshia 1991, mbulamatadi wa ditunga dia Russie wakitaba bua kuela ku mikanda yende mudimu wa Bantemu ba Yehowa. Kubangila anu tshikondo atshi, mudimu mmuye kumpala mu Russie ne mu matunga avua kale enza Union Soviétique. Mu ngondo muisatu wa tshidimu tshia 1996 too ne mu ngondo wa dikumi wa tshia 1998, Kasumbu Kaludiki kakitaba bua kufila makuta avua komite ya filiale idi itangila mudimu mu matunga 11 a ku Mputu milombe bua kuasa Nzubu ya Bukalenge 359.
3 Anu munudi numona bimfuanyi mu tshisakidila etshi, tetayi kuela meji bua malu manene a dikema adi Yehowa muenzele bantu bende. (Mus. 136:4) Tusankayi pa kumanya ne: mapa adi bana betu ba pa buloba bujima bafila kabena baatulakaja patupu to, badi benza nau mudimu bimpe, bileja tshivua Yezu muambe mu Yone 13:35 ne: ‘Bua bualu ebu bantu bonso nebamanye ne: nudi bayidi banyi, [binuanangangana] nunku.’
4 Ku matunga a ku Mputu adi ne bumonyi bukese adibu bateke mu mulongo wa matunga a kuambuluisha bua mudimu wa dibaka dia Nzubu ya Bukalenge, kudi ditunga dia Roumanie mudibu base Nzubu ya Bukalenge 36 kumbukila mu ngondo wa muanda-mutekete wa tshidimu tshia 2000. Mu dilonda plan uvuabu bafile bua Nzubu ya Bukalenge pabuipi ne yonso ivuabu ne bua kuasa, bena mu ditunga dia Ukraine mbase nzubu 61 mu tshidimu tshia 2001, ne mikuabu 76 mu tshia 2002. Ne makuta adi bantu bela mu kashete kalongolola bua kukuatshisha mudimu wa dibaka dia Nzubu ya Bukalenge, mbafike ku diasa nkama ne nkama ya Nzubu ya Bukalenge mu matunga aa: Bulgarie, Croatie, Macédoine, Moldavie, Russie, Serbie ne Monténégro.
5 Diasa dia Nzubu ya Bukalenge mu amue matunga kadivua bualu bupepele to, nanku bavua ne bua kuenza muabu muonso bua kujikija malu makuabu onso kumpala kua kutuadija mudimu wa diasa. Misangu ya bungi malu aa atu adia dîba dia bungi. Kabidi bidi bitudisha makuta mapite bungi bua kuasa Nzubu wa Bukalenge mu tshitupa tshia ku Mputu atshi kupita adibu mua kutula mu matunga a bungi a mu Afrike ne a mu Amérike wa ku Sud. Kadi bu mudi batendeledi ba Yehowa benda bavula bikole, kudi dijinga dikole dia kupeta Nzubu ya Bukalenge nkama ne nkama mu matunga a ku Mputu adi ne bumonyi bukese.
6 Bidi bienza disanka pa kumona mudi dibaka dia Nzubu ya Bukalenge dienda divulangana ne lukasa miaba ya bungi! Bantu ba bungi ba mu turtié mudibu basa nzubu ayi mbanyishe bikole bidi bienzeke ebi anu mudi malu a bungi avua menzeke aa aleja. Mu imue miaba, banene ba mbulamatadi badi bakema pa kumona mudi Bantemu balonda mikenji idibu bele bua ngibakilu ya nzubu mimpe.
7 Bulelela, Yeshaya uvua muambilemu mu mulayi bua bualu bua didiunda divua ne bua kuenzeka mu ntendelelu mulelela mu tshikondo tshietu etshi. Nzambi wakakuila mukana mua muprofete eu wamba ne: ‘Meme Yehowa nengendeshe muanda eu mu tshikondo tshiawu.’ (Yesh. 60:22) Bulelela, bidimu dikumi bidi bipite ebi bivua bimueneke menemene ne: bivua tshikondo tshia Yehowa tshia diyisha mudimu wende kumpala ku Mputu wa ku Est. Tudi tulomba Yehowa bua atungunuke ne kutulokeshila mabenesha ende patudi eku tuenza muetu muonso bua kuendesha lukasa mudimu eu wa dibaka dia Nzubu ya Bukalenge mu matunga a bungi ne kabidi tufila makuta bua muine mudimu eu! Ebi nebitufikishe ku dibaka Nzubu ya Bukalenge mikuabu ya bungi mu matunga adi ne bumonyi bukese. Nebiambuluishe bua ntendelelu mukezuke kudiundayi mu matunga a bungi a ku Mputu ne bua bantu ba bungi bamanye bualu buende “too ne ku ntengu ya buloba.”—Bien. 13:47, MMM.
[Bimfuanyi mu dibeji 3]
Nzubu wa Bukalenge munene, Moscou (Russie)
[Bimfuanyi mu dibeji 4-6]
Nzubu ya Bukalenge mipiamipia ku Mputu wa ku Est
Strumica (Macédoine)
Daruvar (Croatie)
Bitola (Macédoine)
Sokal, provense wa Lviv, (Ukraine)
Sofia (Bulgarie)
Krasnooktyabrskiy, teritware wa Maykop (Russie)
Bački Petrovac (Serbie ne Monténégro)
Plovdiv (Bulgarie)
Tlumach, provense wa Ivano-Frankivsk (Ukraine)
Rava-Ruska, provense wa Lviv (Ukraine)
Stara Pazova, (Serbie ne Monténégro)
Zenica (Bosnie ne Herzégovine)
Sokal, provense wa Lviv (Ukraine)
Zhydachivl provense wa Lviv (Ukraine)