Programe mupiamupia wa mpuilu wa tshijengu

¹ Mukalenge wetu wakadianjila kumanyisha ne: bayidi bende bavua ne bua kukengeshibua. (Mat. 24:9) Mmushindu kayi utudi ne bua kuangata mateta? Ntshinyi tshidi mua kutuambuluisha bua kunanukila nansha batukengesha? Programe wa mpuilu wa tshijengu wa tshidimu tshia mudimu tshia 2004 neandamune nkonko eyi. Tshiena-bualu tshiende tshidi ne: ‘Nusanke mu ditekemena; nuikale ne ditantamana mu makenga.’​—Lomo 12:12.

² Miyuki ibidi ya bitupa binayi: Muyuki wa kumpala udi ne tshiena-bualu ne: “Nukuame mamuma mu ditantamana,” newakuile pa mishindu itudi tukuama mamuma. Nebele bamanyishi ba bungi nkonko pa mushindu udibu bayisha ne balongesha bamanye bimpe ne: mudimu ngwa kuenza ne mitalu. Baledi nebatambe kuteya ntema ya bungi ku muyuki udi wamba ne: “Padi Yehowa utupesha dinyoka,” wikala mua kuleja mudi baledi mua kuelangana meji ne bana babu. Ngamba-malu wa ndekelu bua muyuki eu wa bitupa bisatu nealeje patoke tshitudi ne bua kuenza bua bena panu kabafiki ku dinyanga ngenyi yetu ne kutupangisha mua kukuama mamuma.​—Mâko 4:19.

³ Muyuki wa bitupa binayi mukuabu udi ne tshiena-bualu ne: “Nyemayi lubilu ne dinanukila.” Neuleje patoke mudi matuku a muoyo etu mikale bu dinyema dia lubilu. Bua tshinyi tudi ne bua kunyema bilondeshile mikenji? Mmunyi mutudi mua kumusha bujitu buonso ne kushala katuyi tupungila mu lubilu lutudi tunyema bua kupeta muoyo? Mibelu ya mu Bible yafilabu pa dîba diayi menemene neyituambuluishe bua kutungunuka ne kunyema ne dinanukila.

⁴ Patudi tutantamana, Nzambi udi utuanyisha: Miyuki yenzabu kudi batangidi bena ngendu neyikoleshe ditabuja dia bantu badi bateleja ne batumikila mibelu yafilabu. Umue wa ku miyuki yenzabu kudi mutangidi wa distrike newikale ne tshiena-bualu tshia ne: “Ditantamana didi difikisha muntu ku dianyishibua.” Muyuki wa patoke newandamune nkonko eyi: Mmu dîna dia nganyi mudi bisamba ne bua kutekemena? Bidi bikengela tshinyi? Muyuki wa nkomenu eu: “Nenudiangatshile mioyo yenu bualu bua dinanukila dienu,” neukonkonone mushindu uvua Yezu mutantamene malu mabi kayi ukuatshila muntu tshiji.

⁵ Uvuluke bua kulua ne mukanda webe wa Kalasa ka mudimu ne Tshibumba tshia Nsentedi tshialongabu lumingu alu. Wikale wangata note bua bikuambuluishe bua kushala ne ntema; ne kabidi neyikuambuluishe bua kulua kuenza nayi mudimu matuku adi kumpala dîba dialuabu kukonkonona mu tshisumbu tshienu malu avuabu balongeshe mu mpuilu.

⁶ Yehowa nkayende ke udi mulongolole biakudia bia mu nyuma bishême ebi. Luaku, ubidie! Netuele mbila ya disanka tuetu mua kuikala mu mpuilu eu ne kulonda programe wonso mujima.​—Yesh. 65:14.