Tufilayi mikanda mu teritware idi bantu bakula miakulu ya bungi
1. Bua tshinyi bisumbu bia bungi bidi dijinga ne mikanda ya mu miakulu mikuabu?
1 Mpindieu miaba ya bungi itudi tuyishila idi ne bantu badi bafumine mu matunga mashilashilangane. Ba bungi ba ku bantu aba batu balonga bulelela ne lukasa ne babumvua bimpe padibu babalongeshabu mu muakulu wabu. Ntshinyi tshitudi mua kuenza bua kupesha bantu badi basankidila bulelela mikanda ya kulonga nayi Bible mu muakulu udibu bumvua bimpe?
2. Mmushindu kayi udi bisumbu bibidi anyi bia bungi bia miakulu mishilangane bidi biyisha mu teritware umue mua kueleshangana diboko?
2 Dîba dia kufila mikanda: Padi bisumbu bibidi anyi bia bungi bia miakulu mishilangane biyishila mu teritware umue, tusumbu tua bakulu tua bisumbu ebi netueleshangane diboko; ne batangidi ba mudimu badi ne bua kulongolola malu bimpe mu mushindu udi mua kulengelela tshisumbu tshionso bua kumona mua kuyisha bimpe bantu bonso badi bakula miakulu ayi. Padibu bayisha ku nzubu ne ku nzubu, bua kuamba bimpe, bamanyishi kabena ne bua kufila mikanda ya mu muakulu wa tshisumbu tshikuabu to. Kadi, padi bamanyishi bayisha dîba dionso didi mpunga kampanda umueneka anyi padibu bayisha miaba itu bantu ba bungi, apu badi mua kufila mikanda ya mu miakulu idi bantu badibu bayikila nabu bamanye.
3. Ndîba kayi didi tshisumbu mua kuikala ne stoke wa mikanda ya mu muakulu muenyi?
3 Dîba dia kuikala ne mikanda mu stoke: Kadi tshia kuenza ntshinyi padiku bungi bubandile bua bantu badi bakula muakulu kampanda muenyi kadi kakuyi tshisumbu tshidi tshienza bisangilu mu muakulu au? Dîba dia nanku, bisumbu bidi mua kulama mu stoke ndambu mukese wa mikanda idibu batamba kuenza nayi mudimu ya mu muakulu au, bu mudi trakte, broshire wa Utulomba ne wa Mulunda wa Nzambi, ne mukanda wa Dimanya. Bamanyishi badi mua kufila mikanda eyi dîba dionso didibu bapeta bantu badi mua kuyibala mu muakulu au.
4. Mmunyi munudi mua kupeta mikanda ya mu muakulu mukuabu idi tshisumbu katshiyi nayi mu stoke?
4 Mua kulomba mikanda: Bikala tshisumbu katshiyi ne mikanda ya mu muakulu udi muntu kampanda udi usankidila bulelela mua kubala, mmunyi mudibu mua kuyipeta mu muakulu au? Mumanyishi udi ulonga nende Bible neebeje muanetu udi utangila malu a mikanda bua kumanya mikanda ya mu muakulu au idiku bua kumona mua kuela mikanda idibu nayi dijinga eyi mu dilomba dia mikanda dia tshisumbu dia musangu walonda.
5. Ntshinyi tshitudi mua kuenza padiku dijinga dia mikanda eku kabayi banji kuenza dilomba dia mikanda dia tshisumbu tshijima?
5 Pikalabi bikengela bua kuyipeta pa lukasa, mumanyishi uvua mupetangane ne muntu au udi mua kulomba mukulu wa mu kasumbu ka mudimu ka Tshisumbu bikalaku mushindu wa kuyilombesha kumpala kua dilomba dia mikanda dia tshisumbu kuyadi. Padi bena mu Komite wa Mudimu bitaba bua kuyilomba, muanetu udi utangila malu a mikanda anyi mukuabu wasungulaye neafundile biro bia filiale mukanda bua kuyilombesha pa lukasa. Nebatumine tshisumbu mikanda ayi mu adrese watshi wa pa tshibidilu anyi mu adrese mukuabu wamonatshi ne: mmuimpe.
6. Tutu ne tshipatshila kayi patudi tupesha bantu mikanda yetu?
6 Tuenzayi mudimu bimpe ne mikanda yetu bua kuambuluisha “bantu bonso,” nansha bikale bakula muakulu kayi, bua ‘bafike ku dimanya dia malu malelela ne basungidibue.’—1 Tim. 2:3, 4.