Kalumbandi kadi kakankamijangana
1 Muana mukuabu wa bakaji mutekete wakadila kumpala kua kulalaye wamba ne: “Tshienaku panyi muenze malu mimpe lelu anyi?” Lukonko elu luakakemesha mamuende. Nansha muvuaye mumone muanende mutekete wa bakaji uditatshisha bikole bua kuenza malu mimpe dituku adi, mamu au kavua mumuambile dîyi nansha dimue bua kumuela kalumbandi to. Mushindu uvua muana mudile udi utuvuluija ne: tuetu bonso, bana ne bakole tudi dijinga ne kalumbandi. Tutuku tuela bantu badi pabuipi netu kalumbandi bua kubakankamija bua malu mimpe adibu benza anyi?—Nsu. 25:11.
2 Bena Kristo netu badi benza malu a bungi mimpe a tuetu kubelela kalumbandi. Tshilejilu, bakulu, basadidi ba mudimu, ne bampanda-njila badi benza mudimu mukole. (1 Tim. 4:10; 5:17) Baledi badi batshina Nzambi badi benza muabu muonso bua kukolesha bana babu mu njila ya Yehowa. (Ef. 6:4) Bansonga bena Kristo badi baditatshisha bikole bua kukandamena “lungenyi lua bena panu.” (1 Kol. 2:12, MMM; Ef. 2:1-3) Bena Kristo bakuabu nansha mukadibu bakulakaje, bikale ne masama anyi ne ntatu mikuabu badi anu benzela Yehowa mudimu. (2 Kol. 12:7) Bantu bonso aba mba kuela kalumbandi. Tutuku ne dianyisha bua diditatshisha diabu edi didi diakanyine kalumbandi anyi?
3 Kalumbandi kela muntu pa nkayende ne pa bualu busunguluke: Bulelela, tuetu bonso tutu tumvua disanka patubu bela tshisumbu tshijima kalumbandi. Kadi, kalumbandi kela muntu pa nkayende kadi kamukankamija bikole. Tshilejilu, mu mukanda wende mutumina bena Lomo mu nshapita wa 16, Paulo mmuele Foibe, Pisikila ne Akula, Tufaina ne Tufoso, ne Pêsi, ne bakuabu kalumbandi. (Lomo 16:1-4, 12) Mmushindu kayipu uvua mêyi ende au mua kuikala makankamije bena lulamatu aba! Diela bana betu ba balume ne ba bakaji kalumbandi didi dibajadikila ne: tudi basue kuenza nabu mudimu pamue. Ukadiku muele muntu pa nkayende kalumbandi bua bualu kampanda busunguluke budiye muenze matuku adi panshi aa anyi?—Ef. 4:29.
4 Kalumbandi kadi kafuma mu mutshima: Bushuwa, kalumbandi kela muntu ne muoyo mujima kadi kakankamija. Bantu badi ne mushindu wa kumanya dîba ditudi tuakula ne muoyo mujima anyi ditudi ‘tubalabidila.’ (Nsu. 28:23, MMM) Patudi tudibidija bua kumona ngikadilu milenga ya bakuabu, mutshima wetu neutusake bua kubela kalumbandi. Tuikalayi tuelangana kalumbandi ne muoyo umue, bamanye ne: ‘dîyi diamba mu tshikondo tshiakane didi diakane!’—Nsu. 15:23.