Kalasa ka Mudimu wa Nzambi bua tshidimu tshia 2004

¹ Yehowa udi upesha bantu ba patupu bintu bua kuenza mudimu udi ne mushinga mukole pa buloba bujima. Malu adiye utulongesha mu Kalasa ka Mudimu wa Nzambi kadi kenzeka lumingu luonso ngumue mushindu udiye wenza nunku. Utuku ubuelamu misangu yonso kuyi utupisha bilondeshile nsombelu webe anyi? Kubangila mu ngondo wa kumpala emu, nekuikale mashintulula kampanda ikala mua kuambuluisha balongi mu tshisangilu etshi.

² Dishintuluka dia bafidi ba mibelu bambuluishi: Bana betu ba balume badi benza miyuki ya ndongeshilu ne malu menene a mu dibala dia Bible mbanyishe bikole mibelu mibapesha kudi mufidi wa mibelu muambuluishi. Muaba udiku bakulu bakumbane ba bungi, mudimu wa mufidi wa mibelu muambuluishi badi ne bua kuikala baupesha mukulu mushilashilangane tshidimu tshionso. Nunku, kudi mushindu wa kuabanyangana bujitu ebu; kadi tshidi ne mushinga wa bungi ntshia ne: bakulu ne basadidi ba mudimu bakumbane nebapete mibelu milenga yafumina kudi tshibungi tshia bangamba-malu ne balongeshi bakumbane bashilashilangane.

³ Diambulula dia mukana: Bikala tshisumbu tshienu ne mpuilu wa tshijengu mu lumingu lua diambulula dia mukana, nushintulule programe mujima wa lumingu alu (mbuena kuamba ne: diambulula adi ne miyuki mikuabu) bua kuenza bionso bidi mu lumingu ludi lulonda ne kulua kuenza diambulula adi ne miyuki mikuabu eyi mu lumingu lualonda. Nansha nanku, kabiena bia mushinga bua kushintulula programe yonso mujima wa mbingu ibidi ya mu Kalasa padi diambulula dia mukana dienzeka mu dikumbula dia mutangidi wa tshijengu to. Nunku, nudi ne bua kulama musambu, ngikadilu wa bungamba-malu ne malu manene a mu dibala dia Bible anu bu mudi programe wa kalasa mubileje bua lumingu alu. Muyuki wa ndongeshilu (utu wenzeka kunyima kua ngikadilu wa bungamba-malu) ngua kuenza bilondeshile mudi programe wa lumingu ludi lulonda uleja. Kunyima kua malu manene a mu dibala dia Bible nekulonde Tshisangilu tshia Mudimu tshia minite makumi asatu, tshidibu mua kukosolola mu bitupa bisatu bia minite 10 ku tshitupa ne tshitupa tshionso anyi bibidi bia minite 15 ku tshimue ku tshimue. (Kanuenji mamanyisha to.) Kunyima kua Tshisangilu tshia Mudimu, musambu ne muyuki wa mutangidi wa tshijengu wa minite makumi asatu nebilonde. Kalasa ka Mudimu wa Nzambi ka lumingu lualonda nekenzeke ne ngikadilu wa bungamba-malu ne malu manene a mu dibala dia Bible bidi bilongolola bua lumingu alu, ne pashishe diambulula dia mukana nedienzeke.

⁴ Tumikila malu onso aa bua kukola mu nyuma. Padi Kalasa ka Mudimu wa Nzambi kakuambuluisha bikole, udi ukolesha tshisumbu tshienu, wela diebe diboko mu dikumbana dia milayi ya mu Bible, ne upesha Muena mukenji mulenga utudi tumanyisha lumu.​—Yesh. 32:3, 4; Buak. 9:19.