Mushindu mupiamupia wikala bisangilu bietu bienzeka
1, 2. Kubangila mu ngondo wa 1 wa 2009, mmushindu kayi washintuluka bisangilu bietu?
1 Kuvua dimanyisha dia disanka divuabu benze pa buloba bujima mu lumingu lua dia 21 too ne dia 27 mu ngondo muinayi 2008. Dimanyisha edi divua diamba ne: “Kutuadijila mu dituku dia 1 dia ngondo wa 1 tshidimu tshia 2009, Dilonga dia Mukanda dia Tshisumbu nedienzeke pamue ne Kalasa ka Mudimu wa Nzambi ne Tshisangilu tshia Mudimu kabidi. Netutuadije kubikila Dilonga dia Mukanda dia Tshisumbu edi ne: Dilonga dia Bible dia Tshisumbu.”
2 Programe wa bisangilu ebi: Bisangilu bionso ebi kusangisha ne misambu ne masambila nebienzeke mu dîba 1 ne minite 45. Bisangilu nebituadije ne musambu ne disambila (min. 5), pashishe Dilonga dia Bible dia Tshisumbu nedienzeke mu minite 25. Padi dilonga edi dijika, musangu umue Kalasa ka Mudimu wa Nzambi kadi kalonda paku mu minite 30. Padi kalasa kajika, netuimbe musambu (min. 5) wa kutuadija nawu Tshisangilu tshia Mudimu tshikala mua kuenzeka mu minite 35. Bisangilu nebijike ne musambu ne disambila (min. 5). Netuikale tupatula programe wa Dilonga dia Bible dia Tshisumbu, wa Kalasa ka Mudimu wa Nzambi ne wa Tshisangilu tshia Mudimu ku ngondo yonso mu Mudimu wetu wa Bukalenge bua kunuambuluisha bua kulongolola bisangilu bionso ebi bimpe.
3. Mmushindu kayi wenzeka Dilonga dia Bible dia Tshisumbu?
3 Dilonga dia Bible dia Tshisumbu: Tshisangilu etshi ntshia kulombola anu mutu dilonga dia Tshibumba tshia Nsentedi dienzeka amu. Kabiena anu bikengela kuambulula malu anuvua balonge lumingu lushale to. Nunku, mbimpe kutuadija tshisangilu etshi ne mêyi makese. Kuenza nanku nekushile bantu bonso dîba dia bungi dia kufilabu mandamuna mu tshikoso. Mutangidi-muludiki neenze programe bua bakulu kulombola tshisangilu etshi; bashintulukangana lumingu luonso.
4. Mmalu kayi ashintuluka mu Tshisangilu tshia Mudimu?
4 Tshisangilu tshia Mudimu: Tshisangilu tshia Mudimu netshikale tshienzeka anu mushindu wa muomumue ne lelu, kadi dîba ke didibu bakepeshe. Mamanyisha neikale enzeka mu minite 5. Minite eyi mmikumbane bua kubala anu mamanyisha a mushinga mukole, ne imue mikanda idi Betele mutume. Mamanyisha makuabu (bu mudi dia programe wa mudimu wa buambi ne wa dikomba mu Nzubu wa Bukalenge, luapolo lua konte, ne mikanda imue imue itu Betele utuma) kaakuikala a kubala to, kadi nga kulamika ku tshibasa anyi tablo wa mamanyisha. Bana betu badibu bapesha midimu mu tshisangilu etshi badi ne bua kudilongolola bimpe, kunemeka dîba didibu babakosele ne kulonda mibelu idibu bafile ya mua kuenza midimu ayi.
5. Mmushindu kayi wenzeka bisangilu bia mu lumingu lua dikumbula dia mutangidi wa tshijengu?
5 Dikumbula dia mutangidi wa tshijengu: Kakuena dishintuluka bua programe wa dikumbula dia mutangidi wa tshijengu nansha. Mu Dibidi, nekuikale Kalasa ka Mudimu wa Nzambi ne Tshisangilu tshia Mudimu, ne musambu ulua kulonda. Pashishe, mutangidi wa tshijengu neenze muyuki wa minite 30. Anu bu mututu tuenza lumingu lua dikumbula dia mutangidi wa tshijengu, nekuikale tshisangilu tshia Dilonga dia Bible dia Tshisumbu dituku dikuabu dilolo, dilonda kudi musambu ne muyuki mukuabu wa mudimu wa mutangidi wa tshijengu. Tshisangilu etshi netshijike ne musambu ne disambila.
6. Mmudimu kayi udi nawu mutangidi wa kasumbu?
6 Bisangilu bia mudimu wa buambi: Kasumbu ka bakulu ke kasungula batangidi ba tusumbu bua kulombola mudimu wa buambi wa mu tusumbu ne kutangila majinga mu nyuma a bantu bonso badimu. Padibi bikengela bua musadidi wa mudimu kuenzaye mudimu eu, nebamubikile ne: “musadidi wa kasumbu.”
7. Bisangilu bia mu lumingu nebituambuluishe ku tshinyi?
7 Mbimueneka ne: malu adi atangila dishintuluka dia bisangilu bietu bia mu lumingu aa neatuambuluishe bua kupeta mibelu yakolesha malanda etu ne Yehowa. Nebituambuluishe kabidi bua kuikala bayishi ne balongeshi bakumbane, badi balongeshibue bimpe bua kupatula bipeta bilenga mu mudimu.—Ef. 4:13, 14; 2 Tim. 3:17.
8. Mmushindu kayi wikala didilongolola dimpe mua kutuambuluisha ne kuambuluisha bakuabu kabidi?
8 Tuetu bikale tudianjila kubala malu a mu bisangilu ebi, nebituambuluishe bua kukuata ngenyi minene yakuilabu mu tshisangilu tshionso. Netupete mushindu wa kukoleshangana bimpe ne mandamuna etu. (Lomo 1:11, 12; Eb. 10:24) Tshipatshila tshietu tshidi ne bua kuikala tshia kuenza bua ‘kudiunda kuetu kumueneke’ patudi ‘tuludikila bantu njila mululame mu dîyi dia Nzambi dia bushuwa.’—1 Tim. 4:15; 2 Tim. 2:15.
9. Mbimpe tuangate dipangadika kayi? Bua tshinyi?
9 Tudi ne disanka dia bungi bua muashintuluka malu a bungi a bisangilu bietu. Tutungunukayi ne kulonda bulombodi bua ‘mupika wa lulamatu ne wa budimu’ ne tushale balamate Mulami wetu Munene padiye wenda utulongolola bua “dikenga dinene” dikadi pabuipi.—Mat. 24:21, 45, NW; Eb. 13:20, 21; Buak. 7:14.