Udimuke bua mushindu uudi wenza mudimu ne dîba diebe

1. Ndutatu kayi ludi bantu nalu lelu eu pa buloba bujima?

¹ Lelu eu udiku biamu bia bungi bidi biambuluisha muntu bua kuenza malu bipepele ne kumushila dîba dia bungi, bantu ba bungi badi ne bivule bia kuenza kadi bikale ne dîba dikese dia kubienza. Bituku bikukolela bua kulama tshibidilu tshimpe tshia malu a mu nyuma anyi? Udiku musue kupeta dîba divule bua mudimu wa buambi anyi? Mmushindu kayi utudi mua kuenza mudimu bimpe ne dîba dietu?​—Mus. 90:12; Filip. 1:9-11.

2, 3. Ndutatu kayi ludi biamu bia dimanyishilangana malu bilela ne yonso wa kutudi udi ne bua kudiela nkonko kayi mu muanda eu?

² Manya malu adi adia dîba diebe: Tuikalayi tuetu buonso ku musangu ne ku musangu tukonkonona mushindu utudi tuenza mudimu ne dîba dietu. Bible udi wamba ne: ‘Nudimuke bienu bu munudi nuenda, kanuendi bu [bantu] badi kabayi ne meji, kadi nuende bu bena meji; nudisumbile tshikondo patshiditshiku, bualu bua matuku adi mabi.’ (Ef. 5:15, 16) Tukonkononayi ntatu idi ifumina ku dilubuluka dia biamu bia dimanyishilangana malu. Nansha mudibi kabiyi bibi bua kuenza mudimu ne tshiamu tshia ordinatere anyi biamu bikuabu bidi bienda ne nzembu, kadi bintu ebi bidi mua kulua buteyi tuetu katuyi badimuke bua mushindu utudi tuenza mudimu ne dîba dietu bimpe.​—1 Kol. 7:29, 31.

³ Yonso wa kutudi udi ne bua kudiela nkonko eyi: ‘Ntuku mpitshisha dîba dianyi dituku dionso edi mu dibala ne diandamuna mikanda idi kayiyi nansha ne mushinga ku Internet anyi? Ndi muditue mu dibikila bantu ku telefone anyi kubafundila tu-mikanda anyi tu-mikenji ku telefone ya ku bianza pa malu adi kaayi ne mushinga anyi? (1 Tim. 5:13) Ndi musombe anu bua kukangula apa kukanga apa bua kutangila malu adi kaayi ne mushinga ku Internet anyi bua kutua anu mbote ne kushintulula bua kutangila malu ku televizion anyi? Dinaya manaya a ku ordinatere anyi ku biamu bikuabu bia dibandila manaya dikadiku didia dîba dianyi dia kudilongela Dîyi dia Nzambi anyi?’ Malu a mushindu eu adi mua kunyanga makanda etu a mu nyuma.​—Nsu. 12:11.

4. Mmashintuluka kayi akenza nsonga kampanda ne mbua tshinyi?

⁴ Enza mudimu bimpe ne dîba diebe: Biamu bia buena-lelu ebi bidi bikoka ntema yetu ne bidia kabidi too ne dîba dietu. Nsonga kampanda uvua mudifile ne muoyo mujima mu manaya a ku ordinatere wakamba ne: “Imue misangu pamvua nnaya ku ordinatere kumpala kua kuya mu buambi anyi mu bisangilu bia tshisumbu, bivua binkolele bua kushala ne lungenyi kaba kamue. Mvua anu ngela meji dîba dionso pa mushindu muimpe umvua mua kunaya pamvua mpingana ku nzubu. Didilongela ne didibadila dianyi dia Bible bivua difue. Disanka dianyi mu mudimu wa Nzambi diakatuadija kukepela.” Nsonga eu wakafika ku dimona se: bivua bikengela bua ashintuluke, ke kumushaye bintu bionso bia manaya a ordinatere. Udi uvuluka ne: “Bivua bualu bukole menemene. Mvua munange bikole manaya kupita mushindu umvua ngelela meji. Kadi ngakenza muanyi muonso bua kutshimuna lutatu elu bualu mvua mumanye ne: bidi bua diakalenga dianyi.”​—Mat. 5:29, 30.

5. Mmunyi mutudi mua kudisumbila dîba bua malu a mu nyuma, ne mmabenesha kayi atuapeta mu dienza nanku?

⁵ Bidi bia mushinga bua kuangata mapangadika a nunku biwikale ukeba bua kuenza mashintuluka mu bualu kampanda. Udiku mua kudisumbila ndambu wa dîba ku malu adi kaayi ne mushinga dituku dionso anyi? Dîba diudi wangata edi didi mua kukuambuluisha bua kubala Bible mujima mu tshidimu tshimue. Ndisankapu kayi diwapeta mu malu a mu nyuma! (Mus. 19:7-11; 119:97-100) Difundila dîba dijalame ne dimanyike bimpe bua kubala Bible, bua kulongolola bisangilu ne bua mudimu wa buambi. (1 Kol. 15:58) Dienza nunku nedikuambuluishe bua kuepuka malu adi ajimijilangana dîba ne nedikuambuluishe kabidi bua ‘kujingulula mudi disua dia Mukalenge [Yehowa].’​—Ef. 5:17.