Mandamuna ku nkonko yenu

▪ Ntshinyi tshitudi ne bua kuenza bua kumona mua kunemeka bimpe dîba dikosela bisangilu bia tshisumbu?

Dîba ditu diya lukasa patutu tuyukila malu mimpe ne balunda betu. Ki bualu kayi bitu bikolele bamue bana betu bua kuenza midimu idibu babapeshe mu programe wa bisangilu kabayi bapitshisha dîba dibakosela. Kadi ntshinyi tshidi mua kutuambuluisha bua kujikija tshilumbu etshi?

Tubituadija pa dîba. Padi tshisumbu tshidisangishe, mbimpe kulomba bateleji bua kusombabu pa miaba yabu padiku kushala munute umue anyi ibidi kumpala kua programe kutuadijaye bua bisangilu bimone mua kutuadija anu pa dîba difunda mu bulongame buonso. (Muam. 3:1) Bua bisangilu bia tusumbu tua bantu bakese bu mudi tshisangilu tshia mudimu wa buambi, kanuena ne bua kuindila bakuabu badi mua kulua kunyima to, nudi ne bua kubituadija pa dîba.

Tudilongololayi bimpe menemene. Didianjila kudilongolola bimpe mbumue bualu buimpe budi bukengela kuenza bua kumona mua kunemeka dîba. Ikala mumanye bimpe mu lungenyi tshipatshila tshia mudimu webe. Patula malu manene a mu mudimu webe ne aleje patoke. Epuka diakula malu too ne mu katoba kawu. Mbimpe malu audi wamba ikale mapepele. Bikala mudimu webe muikale ne tshitupa tshia manaya a tshilejilu anyi diela bantu nkonko, ambulula midimu eyi yonso kumpala kua dîba. Bua kukumbaja bualu ebu, ikala utangila dîba paudi wambulula mudimu webe ne dîyi dikole.

Kosolola mudimu webe mu bitupa. Bikale mudimu webe ngua kuenza bu muyuki anyi diyukidilangana ne bateleji, udi mua kuukosolola mu bitupa mu bitupa. Kosela tshitupa ne tshitupa tshionso buatshi bungi bua minite ne uyifunde ku luseke lua dibeji didi ne mudimu webe. Pashishe wikale utangila dîba paudi wenza mudimu eu. Bikale ndiyukidilangana ne bateleji, epuka buteyi bua dipesha bateleji njila wa diakula bia bungi ku ntuadijilu mu mbuelelu webe wa muyuki bualu nebikulombe bua ulua kupita ne lubilu panuafika mu bitupa bidi ne malu manene adi ne mushinga wa bungi. Balombodi ba dilonga dia Tshibumba tshia Nsentedi badi ne bua kuenza muabu muonso bua kushiya dîba dikumbane dia mua kumona mua kukonkonona nkonko ya diambulula idi ku ndekelu kua tshiena-bualu. Kabena ne bua kubuela ne dilonga mu minite milongolola bua musambu ne disambila bia nkomenu to.

Jikija anu pa dîba. Tshisangilu tshiotshi ne bitupa bia bungi bu mudi Tshisangilu tshia Mudimu, ngamba-malu onso udi ne bua kumanya dîba didi mudimu wende ne bua kutuadija ne didiwu ne bua kujika. Kadi tshia kuenza ntshinyi padibi bimueneka ne: bisangilu ki mbifuane kujika pa dîba? Bana betu badi balombola bitupa bidi bishale badi mua kukepesha amue malu anyi kumusha ngenyi mikuabu ya mu midimu yabu bua kupetulula dîba dijimija edi. Kuikala mumanye mua kuenza nunku ntshimanyinu tshia balongeshi bapiluke.

Bua bidi bitangila bateleji, badi mua kueleshangana diboko ne muanetu udi ulombola tshisangilu bua kunemeka dîba pa kupatula malu manene ne kufila mandamuna mîpi. Nunku, buonso buetu tudi mua kuenza bua se: bisangilu bienjibue ‘bilengele ne bilondangane biakane.’​—1 Kol. 14:40.