Mudimu udi Nzambi ukuatshisha
1 Munkatshi mua basadidi ba Nzambi ba lelu, bakese patupu ke badi balonge tulasa tua bungi, bakese ke badi bantu babanji anyi bikale bamanyike bikole mu ndongoluelu eu wa malu. Bua malu aa, bamue bantu kabatu bangata mudimu wetu wa buambi ne mushinga nansha mukese ku mêsu kuabu to. (Yesh. 53:3) Nansha nanku, mudimu wa kulongesha bantu Bible utudi tuenza mmukoleshe ne mmupeteshe miliyo ya bantu ditekemena lelu pa buloba bujima. Mmunyi mudi bantu ba tshianana ba nunku mua kufika ku bipeta bilenga bia mushindu eu? Anu bualu Nzambi udi ubakuatshisha. (Mat. 28:19, 20; Bien. 1:8) Mupostolo Paulo wakaleja ne: ‘Nzambi wakasungula bintu bitekete bia pa buloba bua kufuishaye bintu bikole bundu.’—1 Kol. 1:26-29.
2 Bapostolo ne bena Kristo bakuabu ba bungi ba mu bidimu lukama bia kumpala kabavua ‘bamanye mukanda ne [bavua] bantu ba patupu.’ (Bien. 4:13) Nansha nanku, bakatungunuka ne mudimu wabu wa kuyisha lumu luimpe ne dikima dionso, ne Yehowa wakabenesha madikolela abu. Nansha muvuaku ntatu ne buluishi, ‘dîyi dia Yehowa diakadiundadiunda bikole, diakatamba.’ Kakuvua muntu nansha umue uvua mua kulekesha mudimu eu to, bualu Nzambi ke uvua wuukuatshisha wuuyisha kumpala. (Bien. 5:38, 39; 19:20) Ke mudibi kabidi mu tshikondo tshietu etshi. Nansha buluishi bua mushindu kayi bua bakalenge ba bukole ki mbuimanyike lumu luimpe bua kuyalu kumpala ne kudiundalu to.—Yesh. 54:17.
3 Butumbi buonso kudi Nzambi: Kuikala ba ministre ba Nzambi nkabingila ka kuditumbishila anyi? Nansha kakese. Paulo wakafunda bua mudimu wa bena Kristo ne: “Kadi tshiuma etshi, tudi batshiambule mu ngesu ya dibumba, bua bantu bamone bimpe ne: bukole ebu bupite mbua kudi [Nzambi], kabuena bufuma kutudi to.” (2 Kol. 4:7, Mukanda wa Mvidi Mukulu, [Katolike, MMM]) Paulo uvua mumanye bimpe ne: uvua mua kufika ku dienza mudimu eu anu ne dikuatshisha dia bukole bua kudi Nzambi.—Ef. 6:19, 20; Filip. 4:13.
4 Tuetu petu tudi bamanye ne: anu bualu tudi ‘bapete dikuatshisha dia kudi Nzambi’ ke bualu kayi mudimu wa diyisha udi wenda wenzeka. (Bien. 26:22) Ku diambuluisha dia mudimu wa diyisha wa nunku udi wenzeka pa buloba bujima, Yehowa udi wenza netu mudimu mu mushindu wa pa buawu bua kunyukula bisamba, mmumue ne: tshimanyinu tshia kabutu kakadi pa kuenzeka. (Hag. 2:7) Tudi ba muabi bushuwa bu mutudi ‘benzejanganyi ba mudimu ne Nzambi’ mu dinowa edi dinene dia mu nyuma!—1 Kol. 3:6-9.