Dibuela mu bisangilu pa tshibidilu mbualu bua mushinga

¹ Mêku a bena Kristo atu angata dibuela mu bisangilu pa tshibidilu bu bualu bua mushinga mukole menemene. Kadi malu a mu nsombelu wa lelu adi alela pawu ntatu. Midimu ya ku nzubu, malu a ku mudimu anyi a kuenza a mu kalasa adi enda adia dîba dituvua balame bua ntendelelu wa Yehowa anyi? Kadi kumona malu bu mudi Yehowa uamona kudi mua kutuambuluisha bua kuteka malu adi ne mushinga pa muaba wa kumpala.​—1 Sam. 24:6; 26:11.

² Bua diangula nkunyi dituku dia Nsabatu, muena Isalele kampanda wakapangila mua kuikala ne mmuenenu wa malu wa buena wa Yehowa. Uvua mua kuikala wela meji ne: uvua anu ukebela bena mu dîku diende bivuabu nabi dijinga anyi se: kuangula nkunyi kuvua ka bualu kakese patupu. Kadi ku mushindu wakakosabu tshilumbu atshi, Yehowa wakaleja ne: kuenza midimu ya tshianana tshikondo tshivuabu balongolole bua ntendelelu kuvua bualu bunene buvua kabuyi bua kunaya nabu to.​—Nom. 15:32-36.

³ Tutantamenayi ntatu: Bua bantu ba bungi bitu mvita mikole bua kupeta mudimu udi ubashila dîba dia kubuela mu bisangilu. Bamue batu bajikija lutatu elu pa kuyukila ne mfumuabu wa mudimu, pa kushintakaja mêba a mudimu ne muena mudimu nende mukuabu, pa kukeba mudimu mukuabu udi mukumbane anyi kupepeja nsombelu wabu. Bushuwa diditatshisha dia mushindu eu bua ntendelelu mulelela didi disankisha Nzambi.​—Eb. 13:16.

⁴ Midimu ya mu tulasa ndutatu lukuabu. Nsonga mukuabu wakamba ne: “Ntu ngenza imue ya ku midimu yanyi kumpala kua kuya mu bisangilu ne idi ishala pandi mpingana ku mbelu.” Bikala midimu yonso kayiyi mua kujika dilolo adi dia kunyima kua bisangilu, bamue baledi batu baleja balongeshi ba bana babu ne: dibuela mu bisangilu didi ne muaba wa kumpala mu dîku diabu.

⁵ Dieleshangana diboko ne didilongolola bimpe ku midimu ya ku nzubu ke nsapi wa diakalenga mu didilongolola bua dîku dijima kubueladi mu bisangilu. (Nsu. 20:18) Nansha bana bakese badi mua kulonga mua kuvuala bilamba ne kuikala badiakaja pa dîba kampanda disunguluke bua kumona mua kuya mu bisangilu. Ku tshilejilu tshiabu, baledi badi mua kubueja mu ngenyi ya bana babu mushinga wa bisangilu.​—Nsu. 20:7.

⁶ Bu mudi ntatu ya mu tshikondo etshi yenda ivula anu kuvula, nanku bidi bikengela tuetu kuikala tubuela mu bisangilu bia tshisumbu pa tshibidilu. Tutungunukayi ne kumona malu bu mudi Yehowa uamona ne tuangate dibuela dia mu bisangilu pa tshibidilu bu bualu bua mushinga mukole budi pa muaba wa kumpala mu nsombelu wetu.​—Eb. 10:24, 25.