Bansonga wetu, balayi Dîyi dia Nzambi!

¹ Tshikondo tshia bunsonga ntshikondo tshia malu a bungi ne tshia mapangadika manene. Batu benzeja bansonga bena Kristo bua kushipa mikenji ya Nzambi dituku dionso edi. Kumpala kua wewe kuangata mapangadika pa malu bu mudi a tulasa, mudimu anyi dibuela mu dibaka, udi ne bua kuanji kudifundila bipatshila bia mu nyuma. Kuenza nunku ke mushindu umuepele muimpe wa kulua kuangata mapangadika ikala mua kukuambuluisha mu matuku ebe onso a muoyo. Kudifundila bipatshila bia mu nyuma bisunguluke nekukuambuluishe bua kuenza malu ne meji ne nekukupeteshe diakalenga. Wewe ubala Dîyi dia Nzambi dituku dionso ne welelapu meji, nebikusake bua kuenza malu mu diumvuangana ne mibelu mifundisha ku nyuma wa Nzambi idimu ne malu audi wenza neaye kumpala.​—Yosh. 1:8; Mus. 1:2, 3.

² Dîyi dia Nzambi nedikuambuluishe munyi? Buloba bulombola kudi Satana mbuwule tente ne bintu bidi bilobesha bantu, bidi mua kukubueja mu njila mubi. (1 Yone 2:15, 16) Udi mua kuikala mumanye balongi nebe anyi bena mulongo nebe bakuabu bavua bapete ntatu bualu bavua balonde balunda babu. Dishala mulamate ku mibelu ya mu Bible nedikupeshe bukole bua mu nyuma bua kukandamena nabu malu mabi. Kabidi, mibelu ya mu Dîyi dia Nzambi idi mua kukuambuluisha bua kuepuka mateyi masokome a Satana. (2 Kol. 2:11; Eb. 5:14) Kuenda mu njila wa Nzambi nekukupeshe disanka dilelela mu nsombelu webe.​—Mus. 119:1, 9, 11.

³ Bu mudi mikenji ya mu Dîyi dia Nzambi kayiyi ishintuluka, mmipite meji a bantu kule ne kule. (Mus. 119:98-100) Kuibidilangana ne mikenji ya mu Bible ne kuelela meji pa disua dia Yehowa ne muoyo mujima mu disambila, nekukuambuluishe bua kukolesha malanda ebe ne Yehowa Nzambi, Muedi wa mikenji ya meji idi mu Bible. Yehowa udi ulaya ne: ‘Nenkuyishe lungenyi, nenkuleje njila uudi ne bua kuendela. Nenkupe meji patshidi dîsu dianyi kuudi.’​—Mus. 32:8.

⁴ Keba dîba dia kubala Bible: Nsonga kampanda muena Kristo wakadifundila tshipatshila tshia kubala Bible mujima ne wakajikija kumubala mu tshidimu tshimue. Mmasanka kayi akapetaye? Udi wamba ne: “Ngakalonga malu a bungi pa bidi bitangila Yehowa, malu avua menze bua se: nsemene pabuipi nende ne mmutshine mu matuku onso a muoyo wanyi.” (Yak. 4:8) Ukadiku mubale Bible mujima anyi? Biwikale kuyi muanji kumubala, kuenaku mua kudifundila tshipatshila tshia kumubala kumujikija anyi? Bulelela, Yehowa neabeneshe malu audi wenza ne neupete difutu dinene.