Yehowa udi wambuluisha bantu badi bamueyemena
1 Bantu ba bungi batu bamona biuma, bukole ne mamanya kampanda bu bintu bia mushinga bidi bipetesha muntu diakalenga. (Mus. 12:4; 33:16, 17; 49:6) Kadi, bantu badi batshina Yehowa ne bikala bamueyemena, badi ne dishindika edi dia mu Bible: “Yeye udi dikuatshisha diabo ne ngabu wabo.” (Mus. 115:11) Nanku, tukonkononayi mpindieu mishindu ibidi itudi mua kuleja menemene ne: tudi tueyemena Yehowa.
2 Tudi bena mudimu bena Kristo: Dîba dionso ditudi tulongesha mu tshisumbu anyi mu buambi, tudi ne bua kueyemena Nzambi wetu. Tutangilabi tshilejilu tshia Yezu. Nansha muvuaye Muana wa Nzambi, kavua weyemena anu meji ende anyi dimanya diende nansha, kadi uvua weyemena Tatuende wa mu diulu ne muoyo wende mujima. (Yone 12:49; 14:10) Ke bualu kayi tuetu tudi ne bua kueyemena Tatu wetu wa mu diulu bikole menemene! (Nsu. 3:5-7) Anu ku diambuluisha dia Yehowa ke kudi bionso bitudi tuenza nansha mudibi bikese mua kufika ku dimutumbisha ne kuambuluisha bantu netu.—Mus. 127:1, 2.
3 Patudi tusambila Yehowa tumulomba buludiki ne nyuma wende muimpe, tudi tuleja ne: tudi tumueyemena. (Mus. 105:4; Luka 11:13) Tudi kabidi tuleja ne: tudi tueyemena Nzambi patudi tuenza bua dilongesha dietu kuikaladi dishindamene pa Bible, Dîyi diende. Mukenji udi mu Bible udi ne bukole bua kulenga mutshima wa muntu ne kushintulula nsombelu wende. (Eb. 4:12) Patudi ‘tuenza mudimu bu mudi bukole buakatupa Nzambi,’ Yehowa udi utumbishibua.—1 Pet. 4:11.
4 Patudi tuluangana ne ntatu: Tudi kabidi ne bua kulomba diambuluisha kudi Yehowa patudi tupeta ntatu ne makenga. (Mus. 46:1) Tshilejilu, mfumuetu wa mudimu udi mua kubenga bua tuetu kuangata diikisha bua kumona mua kubuela mu mpuilu kampanda, anyi tudi mua kuikala ne ntatu mu dîku dietu. Tudi tuleja mutudi beyemene Yehowa patudi tusambila ne muoyo mujima ne patudi tutumikila mibelu idiye utupesha mu Dîyi diende ne mu bulongolodi buende. (Mus. 62:8; 119:143, 173) Padi basadidi ba Yehowa benza malu aa, Yehowa udi ubambuluisha mu malu abu.—Mus. 37:5; 118:13, 16.
5 Yehowa udi utushindikila ne: ‘Muntu udi weyemena Yehowa ne udi ubala Yehowa nkayende bu tshieyemenu tshiende udi ne disanka.’ (Yel. 17:7) Nanku, tumueyemenayi mu bionso bitudi tuenza!—Mus. 146:5.