Banjelu badi batuambuluisha
1 ‘Monayi, ndi n’enu matuku onso too ne ku nshikidilu kua tshikondo etshi.’ Mêyi aa adi akolesha bantu bonso badi batumikila dîyi dia Yezu dia ne: ‘Yayi bienu, nuvuije ba bisamba bionso bayidi.’ (Mat. 28:18-20) Umue mushindu munene udi Yezu muikale ne bena Kristo balelela nku butuangaji bua banjelu bende. (Mat. 13:36-43) Bidi bienza disanka bua kumanyisha “lumu luimpe lua tshiendelele” tshiapamue ne bifukibua bia mu nyuma ne bia lulamatu ebi!—Buak. 14:6, 7.
2 Mu mudimu wetu: Bible udi uleja ne: badi batuma banjelu bua ‘kukuatshilabu badi bamba kupiana lupandu mudimu.’ (Eb. 1:14) Mu bidimu lukama bia kumpala, banjelu bavua bambuluisha bayidi ba Yezu, babafikisha kudi bantu ba muoyo muimpe. (Bien. 8:26) Lelu’eu kabidi basadidi ba Nzambi badi batungunuka ne kumona malu adi aleja menemene se: banjelu badi babalombola. Misangu ya bungi, tutu tumvua bantu bamba muvuabu bafume ku disambila balomba diambuluisha, diakamue Bantemu bafika bua kubatangila. Bitu bituenza disanka tuetu bonso pamue ne banjelu padi bantu ba mushindu’eu bitaba mukenji wa Bukalenge!—Luka 15:10.
3 Padibu batuluisha: Yehowa wakakuba Danyele, kukuba kabidi balunda bende bansonga basatu bena Ebelu, mupostolo Petelo ne bakuabu bantu bavuabu baluishe bikole ku diambuluisha dia ‘banjelu [bende] ba bukole.’ (Mus. 103:20; Dan. 3:28; 6:21, 22; Bien. 12:11) Nansha mutudi mua kudiumvua imue misangu bu badi kabayi ne tshiakuenza padiku buluishi, tshilejilu tshia muena mudimu wa Elisha tshidi mua kutukolesha ku muoyo nangananga dîba diakamanyaye ne: ‘Badi netu badi bapita badi nabu bungi.’ (2 Bak. 6:15-17) Nansha bu buobu mua kutumbusha ku bukole muaba udi bena Kristo netu bakuabu, katuena ne bua kuteketa mu mikolo nansha. Dîyi dia Nzambi didi ditushindikila ne: ‘Muanjelu wa Yehowa udi wasa tshitudilu tshiende tshinyunguluke badi bamutshina.’—Mus. 34:7.
4 Mu katupa kîpi emu, biluilu bia banjelu nebituadije kumbusha baluishi bonso ba Bukalenge bua Kristo. (Buak. 19:11, 14, 15) Mu dindila dituku adi, tutungunukayi anu kuikala ne muoyo mukole, tutumbisha anu Yehowa, bashindike se: biluilu bia mu diulu ebi bidi ku bulombodi bua Kristo nebituambuluishe bimpe.—1 Pet. 3:22.