Kalasa ka Dilongesha Mudimu: Tshiibi tshinene tshia kuenza mudimu mukole
1 Yehowa wakamanyisha mukana mua muprofete Yelemiya ne: ‘Nenteke balami pa mutu pa [bantu banyi], nebabadishe bimpe; kabena batshina kabidi, kabena bakuatshika buôwa, kakuena kuikala umue wa munkatshi muabu wajimina.’ (Yel. 23:4) Mudimu wa bulami eu udi wenzeka lelu munkatshi mua bantu ba bisamba bionso. Badi bawenza kudi nkama ne nkama ya bakulu ba bisumbu. Bansongalume bungi anu bu lumuma mbadifile kabidi ne disanka mu mudimu wa Yehowa. (Mus. 110:3) Bana betu bena budipuekeshi aba badi bu dibenesha dinene kudi basadidi ba Nzambi! Bu mutshidi mudimu wa disangisha bantu utungunuka, kutshidi dijinga dia bantu balume bakumbane badi mua kukuatshila bana babu mudimu.
2 Kalasa ka Dilongesha Mudimu ntshintu tshimpe tshidibu balongolole bua kulongesha bakulu ne basadidi ba midimu batshidi bajike midimu ya bungi. Balongi bapite pa 22 000 ba mu matunga matue ku 140 mbalonge mu tulasa 999 tudi tuenzeke katshia babangisha kalasa aka mu tshidimu tshia 1987. Bua bana betu aba, kalasa kavua ‘tshiibi tshinene tshia kuenza mudimu mukole.’—1 Kol. 16:9.
3 Kipatshila ka kalasa: Kipatshila ka kalasa aka nka kulongesha mudimu ne kulongolola bana betu ba balume badi bakumbaje malu kampanda bua kuenza midimu muaba wonso udi dijinga mu bulongolodi bua Yehowa. Kalasa kadi kabambuluisha bikole bua kumonabu mua kuikala bantunga-mulongo mu mudimu wa kuyisha, wa kulama mikoko, ne kulongesha tshisumbu. Panyima pa kalasa, bamue balongi badi balua bampanda-njila ba pa buabu anyi batangidi bena-ngendu mu matunga abu anyi mu matunga makuabu. Badi batuma bakuabu mu bisumbu bivuabu kumpala anyi miaba idi ne dijinga kampanda dia bungi mu teritware wa filiale wabu.
4 Munkatshi mua mbingu muanda mukulu ya kalasa, balongi badi batuadija dilonga dia malu mavule a mu Bible. Badi bakonkonona malongesha a bungi a mu Bible pamue ne midimu ya bulami ne mibelu bua kumanya mua kupita ne ntatu itu ikuata bena Kristo. Badi kabidi balonga tshidi Mukanda wa Nzambi ulongesha pa mushindu wa kulombola, kulumbuluisha ne kulongolola malu. Badi babalongesha mu mushindu wa pa buawu bua kumanya mua kuakula munkatshi mua bantu ne bambuluisha muntu ne muntu bua kudiundaye ne lukasa mu nyuma.
5 Malu malomba: Anu mutudi mua kuikala bamanye, malu adibu balomba bua kubuela mu kalasa mmakole. Balongi badi ne bua kuikala bakadi bakulu anyi basadidi ba midimu kukadi bidimu biobi bikese mbibidi. Badi ne bua kuikala bajike ne bikale ne bidimu pankatshi pa 23 ne 50. Balongi badi ne bua kuikala bamanye mua kubala, kufunda ne kuakula bimpe muakulu udibu bakuata nawu mudimu mu kalasa, ne badi ne bua kuikala ne makanda a mubidi mimpe, kabiyi bikengela dibondapisha anyi bikale ne biakudia kampanda bidibu bajile ne bikuabu bidibu badia to. Nangananga bampanda-njila ba pa tshibidilu ke batubu batamba kukeba.
6 Aba badi basue kubuela mu kalasa aka badi ne bua kudiakaja bua kuitaba bua kuya kuenzela mudimu muaba wonso udibu nabu dijinga. Bidi bilomba lungenyi bu lua muprofete Yeshaya uvua mudifile ne disanka dionso bua kuenza mudimu wa pa buawu. Muprofete eu wakambila Nzambi ne: ‘Ke meme eu, untume meme!’ (Yesh. 6:8) Uvua kabidi ne budipuekeshi mu nsombelu wende mujima. Bantu badi basue kubuela mu kalasa aka badi ne bua kuikala bantu badi banange bana babu ne kabidi kuikala ne dijinga dia kubakuatshila mudimu pamutu pa kukeba mianzu. Ku ndekelu kua dilonga dimpe dia nunku, mbatekemene bua balongi kuenza mudimu ne malu avuabu balonge bua kuambuluisha bakuabu.—Luka 12:48.
7 Masanka: Munkatshi mua bingu muanda mukulu ya dilonga dia malu a bungi edi, badi ‘badiundisha [balongi] ne mêyi a ditabuja ne mu diyisha dimpe.’ (1 Tim. 4:6) Ebi bidi bibalongolola bua kuambuluisha ne kukolesha bakuabu mu bisumbu ne mu bijengu bidibu babatuma. Miaba ya bungi ivuabu batume balongi aba, mudimu wa buambi mmuye kumpala; mbasake bantu, nangananga bansonga bua kuenza mudimu wa bumpanda-njila; ne mbatambe kutabalela bantu bapiabapia ba bungi badi badisangisha ne basadidi ba Nzambi.
8 Udi mukulu anyi musadidi wa midimu udi kayi muanji kusela muikale ne bidimu pankatshi pa 23 ne 50 anyi? Bua tshinyi kubenga kuela meji bua kulomba bua kubuela mu Kalasa ka Dilongesha Mudimu? Udi nsongalume utshidi wela meji ku malu audi ujinga bua kukumbaja matuku atshilualua mu mudimu wa Yehowa anyi? Bua tshinyi kubenga kuenza bua nsombelu webe ikale mukumbanyine wa kayi ne malu adi mua kukupangisha bua kubuela ku ‘tshiibi tshinene etshi tshia kuenza mudimu mukole’? Nsombelu eu udi mua kukutuadila masanka a bungi. Bulelela, Kalasa ka Dilongesha Mudimu ndibenesha dinene ki ng’anu bua balongi badi bajikijamu to, kadi kabidi ne bua bisumbu bionso bia basadidi ba Nzambi pa buloba bujima.
[Kazubu mu dibeji 3]
Masanka adi kalasa kabapeteshe
“Kalasa nkalengeje mudimu wanyi wa buambi ne mushindu undi ngenza mudimu wa bulami ne meji, nkuata mudimu ne Mukanda wa Nzambi.”
“Kalasa nkapeshe bukole bua kuenza midimu yanyi mishilashilangane mu tshisumbu ne dishindika dionso.”
“Nkashintulule nsombelu wanyi bikole, nansha mushindu undi mmona mudi Yehowa wenza malu ne bulongolodi buende.”
“Kalasa nkangambuluishe bua kumona bua tshinyi bidi bikengela kuitaba bua kuya kuenzela mudimu muaba udi dijinga dimueneka.”