Mushindu mupiamupia wa kuambulula programe ya mpuilu

Bu mudi bulongolodi bua Satana buenda anu bunyanguka bikole, Yehowa udi utukankamija bua ‘kupidia malu adi kaayi a Nzambi ne nkuka ya pa buloba, kuikala ne meji mapuekele ne makane ne a Nzambi patutshidi pa buloba ebu.’ (Tito 2:12) Munkatshi mua malu adiye utulongoluela ku butuangaji bua “mupika wa lulamatu ne wa budimu” mudi mpuilu wa tshijengu ne mpuilu wa pa buende, itu yenzeka tshidimu tshionso. (Mat. 24:45, NW) Masangisha a malu a mu nyuma aa adi atukolesha bikole menemene!

Bua kutuambuluisha bua kulama ne kutumikila malongesha atudi tupeta, mbalongolole mushindu mupiamupia wa kuambulula programe ya mpuilu eyi mu tshidimu tshia mudimu tshia 2005. Dibeji 5 ne 6 dia tshisakidila etshi adi ne biena-bualu bidi bituleja malu ikalabu ne bua kulongesha mu mpuilu eyi pamue ne nkonko ya diambulula bua mpuilu ne mpuilu. Bisumbu nebikonkonone malu aa mu Tshisangilu tshia Mudimu matuku makese kumpala ne kunyima kua mpuilu. Nebienzeke bishi?

Lumingu lumue anyi ibidi kumpala kua tshisumbu kuyatshi mu mpuilu wa tshijengu, nebenze muyuki wa minite dikumi mushindamene pa tshiena-bualu tshidi tshiamba ne: “Programe mupiamupia wa mpuilu wa tshijengu” mu Tshisangilu tshia Mudimu bua kusonsola bantu dijinga dia kuteleja malu ayabu kumvua mu programe. Ngamba-malu neakoke kabidi ntema ku nkonko ya diambulula ne neakankamije bantu bonso bua kufunda malu a mushinga a mu mpuilu bua kudilongolola ku diambulula dikala mua kuenzeka mbingu mikese kunyima kua mpuilu.

Mbingu mikese panyima pa mpuilu, nebambulule munkatshi mua minite 15 malu a dituku dia kumpala dia mpuilu mu Tshisangilu tshia Mudimu. Lumingu lualonda, nebenze kabidi minite 15 bua kuambulula malu a dituku dibidi dia mpuilu. Bitupa bia bisangilu ebi nebishindamene pa nkonko ya diambulula idi mu tshisakidila etshi. Diambulula didi ne bua kuleja mushindu wa kutumikila malu avuabu balongeshe mu mpuilu. Bakulu badi mua kuipidija, kumbusha anyi kutentemuna bitupa bikuabu bia Tshisangilu tshia Mudimu bua kuenza diambulula edi.

Nebenze bia muomumue bua mpuilu wa pa buende, kadi apa diambulula diodi nedienzeke anu mu minite 15 bua programe mujima. Tulamayi tshisakidila etshi bimpe ne tukuate natshi mudimu bua kupeta masanka adi afumina ku dilongesha dimpe didi Yehowa utupesha.​—Yesh. 48:17, 18.