Programe mupiamupia wa mpuilu wa tshijengu
Tudi dijinga ne meji a Nzambi mu ‘matuku a malu makole’ atudi aa bua kupeta ne kuikala amu ne dianyisha dia Yehowa. (2 Tim. 3:1) Programe wa mpuilu wa tshijengu wa tshidimu tshia mudimu tshia 2005 neatupeshe mibelu milenga ne neatukoleshe ku diambuluisha dia tshiena-bualu etshi: “‘Meji adi afuma mu diulu’ anulombole.”—Yak. 3:17.
Muyuki wa kumpala wa bitupa binayi udi wamba ne: “Tuleje ‘meji adi afuma mu diulu’ mu nsombelu wetu,” neutuambuluishe bua kumona tshidi tshikengedibua bua kuikala bantu bimpe, bena ditalala, batshintshikidi ba malu ne badiakaje bua kutumikila. Pashishe mutangidi wa tshijengu neakule bua nseke mikuabu isatu ya meji adi afuma mu diulu. Mutangidi wa distrike neakome dituku dia kumpala pa kuleja mudi bena Kristo balongolola bua kuamba mêyi a meji a Nzambi, nansha mudi bakuabu babangata bu ‘kabayi bamanye mikanda’ ne ‘bantu ba patupu.’—Bien. 4:13.
Dituku dibidi, muyuki wa bitupa binayi udi ne tshiena-bualu tshia ne: “Tulonde malu adi adiundishangana,” neutuambuluishe bua kumanya ne kuepuka bintu bidi mua kututekesha mu nyuma. Neutuleje kabidi mutudi mua kukolesha bakuabu mu bisangilu, mu buambi ne mu dîku. Muyuki wa patoke udi wamba ne: “Mushindu udi meji a Nzambi atuambuluisha” neukoleshe dianyisha dietu bua masanka atudi tupeta patudi tutumikila mikenji ya Nzambi mu nsombelu wetu. Muyuki wa ndekelu wa “Kulonda meji a Nzambi kudi kutukuba,” neukoleshe dipangadika dietu dia kukeba meji kudi Yehowa mu matuku a ku nshikidilu aa.
Muanda munene wa mpuilu yonso utu ditambula dia bayidi bapiabapia. Mu programe nemuikale kabidi Kalasa ka Mudimu wa Nzambi ne Dilonga dia Tshibumba tshia Nsentedi. Yehowa mmusue tuetu bonso tupete meji adi afumina kudiye. Mibelu ne malu mimpe adi matuindile mu mpuilu wetu wa tshijengu neatukoleshe mu nyuma.—Nsu. 3:13-18.