Mpungilu wa Distrike udi utusaka bua kuenda ne Nzambi

Mu Mpungilu wa Distrike wa “Tuendayi ne Nzambi” bavua batele misangu ne misangu dîyi dia Yehowa dia ne: ‘Njila nyeye eu, endelamu’! (Yesh. 30:21) Tuetu batumikile mibelu ituvua bapetamu, nebituambuluishe bua ‘kudimuka bu mutudi tuenda.’ (Ef. 5:15) Kuelela meji pa malu atudi bumvue nekutuambuluishe bua tuetu ‘kuenda mu bulelela.’​—3 Yone 3.

Angata nkonko idi ilonda pamue ne malu auvua mufunde a mu mpungilu wa distrike wa tshidimu etshi bua kudilongolola bua kuandamuna mu diambulula dia malu atuvua bumvue mu mpungilu. Diambulula edi ndia kuenza mu Tshisangilu tshia Mudimu tshia lumingu lua dia 18 Kasuamansense.

1. Mmushindu kayi uvua Hanoka mufike ku dienda ne Nzambi nansha muvuaye ne muoyo mu tshikondo tshia ntatu? (Eb. 11:1, 5, 6; Yuda 14, 15; “Tuendayi ne Nzambi mu bikondo bia ntatu”)

2. Mmu malu kayi a mu nsombelu mutudi mua kutumikila mubelu udi mu Luka 16:10? (“Utuku ne ‘lulamatu mu malu adi makese’ anyi?”)

3. (a) Tela malongesha anayi atudi tusangana mu Hoshea nshapita 6 too ne wa 9 adi mua kutuambuluisha bua kuenda ne Nzambi. (Hosh. 6:6, 7; 7:14; 8:7) (b) Mmalu kayi makuabu adi mu Hoshea nshapita wa 10 too ne wa 14 adi atuambuluisha bua kuenda ne Nzambi? (Muyuki wa bitupa bisatu: “Mulayi wa Hoshea udi utuambuluisha bua kuenda ne Nzambi”)

4. Mmalu kayi adi ne dikuatshisha dia bushuwa adi balume ne bakaji bena Kristo badi baselangane mua kuenza bua mabaka abu kuikalawu mashindame? (Nsu. 12:4; Ef. 5:29; “Muntu kapanduludi ‘tshidi tshibumbakaja kudi Nzambi’”)

5. Mmunyi mututu tuleja kanemu bua bisangilu bietu bia tshijila? (Muam. 5:1; Yesh. 66:23; “Tulejayi kanemu bua bisangilu bietu”)

6. (a) Mbitupa kayi binene bisatu bia mudimu wetu wa buambi bitudi ne bua kukonkonona bua kujadika ne: tudi badifilamu mu mushindu mukumbane? (Yesh. 52:7; Zek. 8:23; Mâko 6:34) (b) Mmalu kayi adi mu broshire wa Lumu luimpe bua bantu ba mu bisamba bionso adi ne dikuatshisha dia pa buadi kuudi? (“Lumu luimpe bua bantu ba mu bisamba bionso”; “Tuambuluishayi badi bakula muakulu muenyi”)

7. Mmunyi mutudi mua kuambuluisha bapiabapia bua kupeta dikima dia kumanyisha mukenji wa Bukalenge? (Bal. 7:17; “Tuambuluishayi misumba ya bantu bua iditue payi mu mudimu wetu wa Nzambi”)

8. Mmunyi mutudi tuleja mutudi batuishibue se: ‘dituku dinene dia Yehowa didi pabuipi’? (Sef. 1:14; “Tudi tuenda bua ditabuja, ki mbua bintu bidi bimueneka ku mêsu”)

9. (a) Mmunyi mudi kulenduisha bakuabu kuikale muanda munene? (Mâko 9:42-48) (b) Mmunyi mutudi mua kuepuka bua kabatulenduishi? (Mus. 119:165) (c) Mmunyi mutudi mua kuepuka bua kulenduisha bakuabu? (1 Kol. 10:24; “Katulenduishi muntu nansha ku bualu bumue”)

10. Mmunyi mutudi mua kushala ne nkatshinkatshi patudi mu dikeba dia muntu wa kubuela nende mu dibaka, patudi tukeba bua kudiondapisha anyi mu malu a mishinga? (Mus. 26:4; Mat. 6:25; 1 Tim. 6:9; “Nutabale muenu muonso”)

11. (a) Ntshinyi tshidi tshikoka ntema yetu bua tshivua Yezu wenza misangu ivua bantu bakuabu bamuakidila kumbelu kuabu? (Luka 10:42; 24:32) (b) Mmunyi mutudi mua kujikija lutetuku mu mushindu udi utukolesha tuetu ne binetu kabidi? (1 Kol. 10:31-33; “Malu mimpe adi atukolesha”)

12. Bilondeshile Musambu wa 23, mmalu mimpe kayi atudi tupeta patudi mikoko ya Yehowa, ne bidi bitupesha bujitu kayi? (1 Kol. 10:21; “Yehowa udi Mulami wetu”)

13. Mmunyi mudi bena Kristo batumikila mubelu wa ‘kudisumbila tshikondo patshiditshiku’? (Ef. 5:16; “Tudisumbilayi tshikondo patshiditshiku”)

14. (a) ‘Dîba dia dilumbuluisha’ didibu batele mu Buakabuluibua 14:7 didi diumvuija tshikondo kayi? (b) Mmunyi mutudi tuleja patoke ne: tudi bushuwa batapuluke ne Babulona Munene? (“‘Nushale batabale’ bualu dîba dia dilumbuluisha diafiki”) (c) Mmalu kayi adi makusankishe mu broshire wa Nushale anu batabale!?

15. Tela ngikadilu isatu idi ikengedibua bua “kubenga kulekela njila mululame.” (2 Pet. 2:15; “Kanulekedi njila mululame”)

16. Mmunyi mudi bansonga mua kukina ‘njila wa bantu babi’? (Nsu. 4:14; “Bansonga wetu, endayi mu njila wa buakane”)

17. (a) Mmu mushindu kayi muvua Paulo muikale tshilejilu tshilenga tshia dinanukila? (Bien. 14:19, 20; 16:25-33) (b) Bua tshinyi katuena ne bua kutshina baluishi ba ntendelelu mulelela? (Drama ne muyuki wa: “Yisha, yishilamu lumu luimpe lelu nansha kuikale buluishi”)

18. Mmasanka kayi adi bantu badi benda ne Nzambi bapeta? (“Kuenda ne Nzambi kudi kutupetesha masanka mpindieu ne tshiendelele”)

Tuangatayi dipangadika dia kuteleja ‘dîyi didi difuma panyima petu’ bua kumona mua kuenda ne Tatu wetu wa mu diulu kashidi ne tshiendelele.​—Yesh. 30:21; Yone 3:36.