Mandamuna ku nkonko yenu

▪ Mmunyi mutudi mua kukumbaja midimu ya mu tshisumbu?

Bulongame budi tshisumbu tshia bantu ba Yehowa tshienda nabu ntshipeta tshia mudimu mukole muenza mu buobumue. (1 Kol. 14:33, 40) Tuanji kuela meji bua malu adi enzeka mu tshisangilu tshimue patupu tshia tshisumbu. Ku luseke lua ndongamu muine nkayende, kudi malu makuabu a bungi adi enzeka kumpala ne panyima pa bisangilu padi bana betu ba balume ne ba bakaji bakumbaja midimu yabu. Midimu mikuabu idi yenzeka bantu kabayi bamone idi payi ne mushinga wa bungi. Mmunyi mudi yonso wa kutudi mua kutua pende tshianza ku midimu eyi?

Ikala mudiakaje bua kuambuluisha. Aba badi ne lungenyi lua didifila ku budisuile nebamone bintu bia bungi bia kuenza. (Mus. 110:3) Ditatshishaku bua badi basama ne bakulakaje. Ambuluisha bua kukolopa ne kusukula Nzubu wa Bukalenge. Tudi mua kuenza malu a bungi adi ne dikuatshisha nansha kabayi batulombe bua kuenza to. Tshidi tshikengela nkuikala anu ne dijinga dia kuambuluisha.

Wenze mudimu ne budipuekeshi. Badipuekeshi batu basanka bua kuenzela bakuabu mudimu. (Luka 9:48) Budipuekeshi budi butuambuluisha bua kubenga kuitaba midimu ya bungi idibu mua kutulomba bua kuenza petu katuyi ne mushindu wa kuyikumbaja yonso. Kabidi, nebutuambuluishe bua kubenga kusambuka mikalu ya bukokeshi butudi nabu.​—Nsu. 11:2.

Ikala muntu wa kueyemena. Bavua babele Mose bua kukeba ‘bantu ba kueyemena’ bua kuenzabu midimu minene mu Isalele wa kale. (Ekes. 18:21, NW) Ngikadilu umue umue eu udi kabidi ne mushinga lelu. Kumbaja mudimu wonso udibu bakupesha ne muoyo mujima. (Luka 16:10) Wewe mumone ne: kuakuikala ne mushindu wa kukumbaja mudimu kampanda udibu bakupeshe, udianjile kulongolola bua muntu mukuabu kuwenza pa muaba webe.

Udifile ne muebe muonso. Batu babela bena Kristo bua kuenza mudimu ne muoyo mujima nansha mu midimu yabu ya ku mubidi. (Kolos. 3:22-24) Kudi bualu bua mushinga bua kuenzela nanku patudi tuenza mudimu bua kutumbisha ntendelelu mulelela. Nansha bikala mudimu kampanda umueneka bu mushadile anyi kauyi ne mushinga wa bungi, udi wambuluisha tshisumbu patudi tuwenza bimpe menemene.

Mudimu wonso udi umueneka udi utupetesha mushindu wa kuleja dinanga dietu kudi Yehowa ne kudi bana betu bena Kristo. (Mat. 22:37-39) Nanku, tukumbajayi mudimu kayi wonso udibu batupesha ne lulamatu.