Tshitupa 3: Tulombolayi malonga a Bible mimpe
Enza mudimu bimpe ne Bible
1. Bua tshinyi tudi ne bua kutamba kuimanyina pa Bible patudi tulonga Bible ne bantu?
1 Tshipatshila tshietu patudi tulonga Bible ne bantu ntshia ‘kubavuija bayidi’ pa kubambuluisha bua kumvua ne kuitaba malongesha a mu Dîyi dia Nzambi ne kabidi kuatumikila mu nsombelu wabu. (Mat. 28:19, 20; 1 Tes. 2:13) Ke bualu kayi dilonga edi didi ne bua kuimanyina pa Bible. Tshia kumpala, mbimpe kuambuluisha balongi bua kumanya mua kupeta mvese mu Bible yabu. Nanku mmunyi mutudi mua kufika ku dibambuluisha bua kukolabu mu nyuma?
2. Mmunyi mutudi mua kusungula mvese ya kubala ne kuyukidilangenapu?
2 Sungula mvese ya kubala: Paudi udilongolola, keba bua kumanya mushindu udi mvese idibu kabayi batele mêyi ayi ipetangana ne tshiena-bualu tshinudi nulonga, usungule inuikala ne bua kubala ne kuyukidilangenapu. Pa tshibidilu, mbimpe kubala mvese idi ne malongesha a nshindamenu. Mvese idi ileja patupu mushindu uvua nsombelu wa bualu kampanda kayena ne mushinga wa bungi bua kuyibala to. Wikale utangila majinga a mulongi ne mulongi yonso ne nsombelu wende.
3. Mmalu kayi mimpe adi afumina ku diela nkonko, ne mmunyi mutudi mua kuenza nayi mudimu?
3 Ela nkonko: Pamutu pa wewe kumvuija mulongi mvese, umulombe bua yeye akumvuijayi. Udi mua kumusaka bua kuenza nunku pa kuikala kumuelaku tukonko bimpe. Bikala mvese mutokesha bimpe, udi mua kukonka patupu mushindu udiye usuikakana ne bidi mu tshikoso. Kadi bikala mvese kayi mupepele, kuela lukonko lusunguluke anyi mulongolongo wa nkonko kudi mua kuikala ne mushinga bua kumona mua kufikisha mulongi ku nkomenu muimpe. Bikalabi bikengela kusakidila amue malu, udi mua kuasakidila panyima pa mulongi mumane kuandamuna.
4. Ndiumvuija dia mushindu kayi didi dikengela bua mvese inudi nubala?
4 Dilonga dikale dipepele: Muedi wa mikete mupiluke utu misangu mivule dijinga amu ne mukete umue bua kuasaye tshidiye musue kuasa. Mu mushindu wa muomumue, mulongeshi mupiluke kêna dijinga ne miaku ya bungi bua kumona mua kumvuija bualu kampanda nansha. Udi mua kuamba malu mu mushindu mupepele, mutoke ne mujalame. Imue misangu, bidi mua kulomba bua wewe kuenza makebulula mu mikanda ya bena Kristo bua kumvua bimpe mvese kampanda ne kumumvuija bilenga. (2 Tim. 2:15) Kadi kuikadi umvuija mvese yonso udi mu dilonga mu bule ne mu butshiama to. Wakuile anu pa malu adi ne mushinga bilondeshile tshinudi nulonga.
5, 6. Mmunyi mutudi mua kuambuluisha balongi bua kutumikila Dîyi dia Nzambi mu nsombelu wabu, ne ntshinyi tshitudi ne bua kubenga kuenza?
5 Leja mushindu muimpe wa kutumikila mvese: Padiku mushindu, ambuluisha mulongi bua umvue mudi malu adi mvese yamba amutangila. Tshilejilu, panudi nukonkonona Ebelu 10:24, 25 ne mulongi udi kayi muanji kutuadija kubuela mu bisangilu, udi mua kuyukidila nende pa tshisangilu tshimue ne kumubikila bua yeye kubuelamu. Kadi kumuenzeji malu ku bukole to. Ulekele Dîyi dia Nzambi nkayadi bua dimusake bua kuenza malu adi akengedibua bua kusankisha Yehowa.—Eb. 4:12.
6 Patudi tuenza mudimu wa kuvuija bantu bayidi, tubakankamijayi ku ‘ditumikila mu ditabuja’ pa kuenza mudimu bilenga ne Bible.—Lomo 16:26.