‘Mudiundisha mu mêyi a ditabuja’
1 Kuikala ne lulamatu kudi Nzambi kudi kulomba didienzeja dia bungi. (1 Tim. 4:7-10) Bu tuetu mua kuteta nsombelu wa buena eu anu ne bukole buetu nkayetu, katuakunenga bua kutshioka ne kudishinda panshi to. (Yesh. 40:29-31) Umue mushindu utudi mua kupetela bukole bua kudi Yehowa mpatudi ‘tudiundishibua mu mêyi a ditabuja.’—1 Tim. 4:6.
2 Biakudia bia mu nyuma bivule: Ku diambuluisha dia Dîyi diende ne dia “mupika wa lulamatu ne wa budimu,” Yehowa udi utupesha biakudia bia mu nyuma bivule. (Mat. 24:45, NW) Utuku wenza tshiebe tshitupa bua wewe kupetelaku masanka anyi? Utuku ubala Bible dituku dionso edi anyi? Tutuku tuangata dîba bua kudilongela ne kuelela meji pa malu aa anyi? (Mus. 1:2, 3) Biakudia ebi bia mu nyuma bilenga bidi bituambuluisha ne bitukuba ku matekete a mu bulongolodi ebu bua Satana. (1 Yone 5:19) Tuetu babueja mu lungenyi luetu malu mimpe ne baatumikile mu nsombelu wetu, Yehowa neikale netu.—Filip. 4:8, 9.
3 Yehowa udi kabidi utukolesha ku diambuluisha dia bisangilu bietu. (Eb. 10:24, 25) Dilongesha dia mu nyuma ne buena muntu bulenga bitudi tupeta mu bisangilu ebi bidi bitukolesha bua kuimana tendee mu tshikondo tshia ntatu. (1 Pet. 5:9, 10) Muanetu wa bakaji mukuabu wakamba ne: “Ntu nya mu kalasa dituku dijima, ne katu kantshiokesha bikole. Kadi bisangilu bidi anu bu mushimi wa mâyi mu tshipela, muaba untu ntalajila mioyo bua kudilongolola ku ntatu ya mu kalasa ya dituku didi dilonda.” Tudi tupeta masanka a bungi patudi tuenza muetu muonso bua kubuela mu bisangilu!
4 Kumanyisha bulelela: Kuyisha bakuabu kuvua bu tshiakudia bua Yezu. Kuvua kumupetesha bukole. (Yone 4:32-34) Bia muomumue, patudi tuambila bantu bakuabu milayi mimpe ya Nzambi, tudi tudikolesha tuetu bine. Kuikala ne bia bungi bia kuenza mu mudimu wa Nzambi kudi kabidi kukuba mioyo yetu ne lungenyi luetu bua kuikalabi bitangija ku Bukalenge ne ku masanka atuapete mu matuku makese emu. Kudi bushuwa kutukolesha.—Mat. 11:28-30.
5 Tudi ne diakalenga dia kupeta mabenesha ku diambuluisha dia biakudia bia mu nyuma bidi Yehowa mulongoluela bantu bende lelu! Nanku, tutungunukayi ne kuela mbila ya disanka bua kumutumbisha.—Yesh. 65:13, 14.