Tshitupa 5: Tulombolayi malonga a Bible mimpe
Ikala mujadike bungi bua malu anuikala mua kulonga
1 Pavuaye ulongesha, Yezu uvua wangata ne mushinga mikalu ya bayidi bende, wakabambila mêyi ‘avuabu mua kumvua.’ (Mâko 4:33; Yone 16:12) Bia muomumue lelu’eu, balongeshi ba Dîyi dia Nzambi badi ne bua kuikala ne nkatshinkatshi bua kumanya bungi bua malu adibu mua kulonga ne mulongi wa Bible mu bule bua minite bungi kampanda. Bungi bua malu adi akengedibua bua kulonga budi bulondeshila tshidi mulongeshi ne mulongi mua kukokesha ne bilondeshila kabidi nsombelu yabu buonso.
2 Kolesha ditabuja diende: Bamue balongi badi mua kumvua ne lukasa malu adibu balonga anu musangu umue kadi bua bakuabu bidi bilomba kupinganyina pa malu aa misangu ibidi anyi isatu. Katuena basue bua kulongesha muntu bintu bia bungi mu minite mikese kadi kayi mubiumvue to. Mulongi yonso udi dijinga ne bishimikidi bijalame bua ditabuja diende dipiadipia kushindamadi mu Dîyi dia Nzambi.—Nsu. 4:7; Lomo 12:2.
3 Paudi ulombola dilonga ku lumingu luonso, wikala upitshisha ne mulongi dîba dionso didi dikengedibua bua yeye kumvua ne kuitaba malu adiye ulonga mu Dîyi dia Nzambi. Epuka dipita lukasa pa malu padi mulongi kayi mumvua bimpe bulelela buudi umulongesha. Angata dîba dikumbane bua kuimanyina bikole pa malu adi ne ngenyi minene ne kukonkonona mvese minene idi yenza nshindamenu wa malongesha.—2 Tim. 3:16, 17.
4 Tungunuja dilonga kumpala: Patudi eku tuepuka bua kuya lubilu lubilu ne dilonga, tudi ne bua kuepuka kabidi dipatuka mu tshiena-bualu. Bikala mulongi utamba kulaluka bua kuakula bikole pa malu adi amutangila, mbimpe bua kulua kuyukila nende pa malu a mushindu’eu panyima pa dilonga.—Muam. 3:1.
5 Ku lukuabu luseke, mushindu utudi tusankidila bulelela kautusaki bua kuakula bikole mu dilonga to. (Mus. 145:6, 7) Patudi tuakula anu mu mpukampuka bua bualu kampanda bua mushinga anyi tuleja bualu bumona, tudi tulengeja dilonga, kadi kabiena bikengela mu diakula kutua mu nsampu kutua mu kaleji anyi kulonda malu bungi tshianana adi mua kupangisha mulongi mua kumvua bimpe malongesha a nshindamenu a mu Bible.
6 Patudi tulonga bungi bukumbanyine bua malu ku dilonga dionso, tudi tuambuluisha mulongi wa Bible bua ‘kuenda mu munya wa Yehowa.’—Yesh. 2:5.