Tuelayi Yehowa tuasakidila bua luse luende lujalame
Netuvuluke lufu lua Kristo mu dia 24 ngondo muisatu
1. Mmunyi mudi Yehowa mutuleje luse luende lujalame?
1 Mufundi wa Misambu wakamba ne: ‘Basakidile Yehowa bua luse luende lujalame ne bua bienzedi biende bia kukema bidiye wenzela bana ba bantu!’ (Mus. 107:8) Luse lujalame lua Nzambi ndupite luse lukuabu lua tshianana lutuye umvuila bantu. Bualu ebu budi bumuenekela mu mêyi a butumbi aa mafundisha ne diambuluisha dia nyuma muimpe: “Luse luebe lujalame, Yehowa, luakangimanyika.” (Mus. 94:18) Yehowa mmutuleje luse lujalame lua dikema padiye mufile Muanende umuepele mulela bua bualu buetu.—1 Yone 4:9, 10.
2. Mmushindu kayi utudi mua kuleja Yehowa dianyisha dietu?
2 Bu mudi Tshivulukilu tshia lufu lua Kristo tshienda tshisemena pabuipi, mmunyi mutudi mua kuela ‘Nzambi udi netu luse lujalame’ tuasakidila? (Mus. 59:17) Yonso wa kutudi udi ne bua kuelangana meji pa bidi bitangila matuku a ndekelu a muoyo wa Yezu pa buloba. (Mus. 143:5) Tudi kabidi ne bua kulonda programe wa pa buende wa dibala dia Bible udibu batulongoluele bua Tshivulukilu, bu mudibi bileja mu broshire wa Tukonkononayi Mifundu dituku dionso 2005, ne pikalaku mushindu, kubala kabidi nshapita wa 112-116 ya mukanda wa Muntu mutambe bunene pamue ne mikanda mikuabu idi yakula malu a mu Bible. Welangane meji a mvese iudi ubala ne ukebe mua kuyumvua bimpe. (1 Tim. 4:15) Kuelangana meji a Dîyi dia Nzambi ne kusambila kakuena anu kudisha mutshima wetu patupu to, kudi kabidi kuleja dinanga ditudi nadi kudi Yehowa.—Mat. 22:37.
3, 4. (a) Mmunyi mutudi mua kuidikija lungenyi lua bana betu ba mu ditunga dia Liberia? (b) Nnganyi uudi ujinga bua kubikila mu Tshivulukilu?
3 Saka bakuabu ku diela Nzambi tuasakidila: Tshidimu tshishale, bantu 16 760 607 bavua babuele mu Tshivulukilu pa buloba bujima. Mu musoko kampanda wa mu Liberia, bana betu bavua bafundile mfumu wa musoko au mukanda, bamuleja dijinga diabu dia kuenzela Tshivulukilu tshia lufu lua Mukalenge mu musoko wende. Mfumu au kuanyishilaye bana betu bua kuenzelabu Tshivulukilu mu tshipalu tshia ndundu tshia mu musoko wende ne kufidishaye dimanyisha kudi bena musoko bua tshibilu atshi ubabikila bua kubuelamu. Nansha muvua mu musoko amu bamanyishi anu batanu patupu, bantu 636 bakabuela mu Tshivulukilu atshi!
4 Bia muomumue, tudi basue kubikila bantu ba bungi bua kubuela netu mu Tshivulukilu. Kuenaku mua kufunda mêna a bantu baudi musue kubikila anyi? Bimfuanyi bidi pa dibeji dia ndekelu dia Réveillez-vous! wa dia 8 Luabanya ne pa dia Tshibumba tshia Nsentedi tshia dia 15 Luabanya bidi ne mêyi a kubikila nawu bantu bua kubuela mu Tshivulukilu. Tubeji tua dibikila natu bantu mu Tshivulukilu tudi mua kutuambuluisha kabidi bua kubabikila. Udi mua kufunda ku tshiamu anyi ku tshianza dîba ne muaba wenzekela Tshivulukilu pa kabeji aka, ne kukashila muntu yonso uudi ubikila. Padi dituku dia 24 ngondo muisatu disemena pabuipi, vuluija kabidi muntu yonso bua kumonaye mua kudilongolola bua kulua mu Tshivulukilu.
5. Mmunyi mutudi mua kukolesha mulongi wa Bible bua kubuela mu Tshivulukilu?
5 Mmunyi mutudi mua kuambuluisha balongi ba Bible badi kabayi banji kubanga kubuela mu bisangilu bua babuele mu tshibilu etshi bua kumonatshi mua kubambuluisha bimpe? Wikale wangataku minite mikese patupu misangu yonso panudi nulonga bua kujula munda mua mulongi dijinga dia kuangata disekelela edi ne mushinga. Nudi mua kupeta ngenyi mikuabu mu Tshibumba tshia Nsentedi tshia dia 15 Luabanya 2004, dibeji 3-7, ne mu mukanda wa Comment raisonner, dibeji dia 241-245.
6. Bua tshinyi mbimpe kuakidila bengi badi balua mu Tshivulukilu ne disanka?
6 Tuakidile benyi ne disanka: Mu Tshivulukilu, yikilaku ne benyi ne ubajingile difika dilenga. (Lomo 12:13) Wenze bua nuenu kusomba pamue ne bantu baudi mubikile, ubakebelaku kabidi Bible ne mikanda ya misambu. Netuenze muetu muonso bua kusekelela nangananga bana betu ba balume ne ba bakaji batu kabayi kabidi babuela mu bisangilu anyi bayisha badi baditatshishe bua kubuela mu Tshivulukilu bua kubela muoyo ne disanka. Dibatabalela ne dinanga dia mushindu’eu didi mua kubasaka bua kupingaja kabidi malanda abu ne tshisumbu. (Luka 15:3-7) Bua tshibilu tshia tshijila etshi tshia mushinga mukole, tudilongololayi bua kukolesha bantu bonso bua baditue netu mu diela Yehowa tuasakidila bua ‘luse luende lujalame.’—Mus. 31:21.