Ikala ushila bantu bibejibeji pa tshibidilu bua kukolesha dijinga diabu dia kumanya bivule
1. Mmunyi mutudi mua kuikala tushila bantu bibejibeji pa tshibidilu bua kukolesha dijinga diabu dia kumanya bivule?
1 Bantu ba bungi batutu tupetangana nabu mu buambi batu batuakidila bimpe ne banyisha ne disanka dionso mikanda yetu, kadi batu belakana bua kutuadija kulonga Bible. Umue mushindu utudi mua kukolesha dijinga diabu dia kumanya bivule nkuikala tubashila bibejibeji pa tshibidilu. Paudi ufila bibejibeji kudi muntu, angata dîna diende ne adrese wende, dituku diudi mumushilabi, nimero ya bibejibeji bidiye muangate, ne mvese unudi bakonkonone nende, ne bualu buonso budi buleja ne: muntu eu mmusue kumanya bivule. Padi bibejibeji bipiabipia bifika, kebamu malu ikale mua kusankisha bantu bautu ushila bibejibeji pa tshibidilu, ne paudi uya kubatangila ubalejabi. (1 Kol. 9:19-23) Mu bule bua matuku, malu adibu babala mu bibejibeji bietu adi mua kubasankisha ne kubasaka ku dijinga dia kumanya bivule.
2. Bu mudibi bikengela bua bantu kukebabu Yehowa mpindieu ne lukasa luonso, ntshinyi tshikuabu tshitudi mua kuenza bua kubambuluisha?
2 Kadi tudi bamanye ne: bantu ba bungi kabena mua kulua basadidi ba Yehowa anu ku didibadila patupu dia bibejibeji bietu to. Bu mudibi bikengela bua bantu kukeba Yehowa mpindieu ne lukasa luonso, ntshinyi tshikuabu tshitudi mua kuenza bua kubambuluisha? (Sef. 2:2, 3; Buak. 14:6, 7) Tudi mua kukolesha dijinga diabu dia kumanya bivule pa kubabadila mvese musungula bimpe dîba dionso ditudi tufila bibejibeji.
3. (a) Mmunyi mutudi mua kulongolola tu-miyuki tua kubadila muntu anu mvese umue misangu yonso? (b) Mbiena-bualu kayi bitu bitamba kusankisha bantu ba mu teritware wetu?
3 Mua kuyisha ne mvese umue: Ela meji bua bantu bautu ushila bibejibeji pa tshibidilu, ubalongoluele ka-muyuki ka kubabadila anu mvese umue muntu ne muntu bilondeshile majinga ende. (Filip. 2:4) Tshilejilu, bikala muntu ufuma ku difuisha mulele wende kampanda, udi mua kumupinganyina misangu ya bungi bua kuyukila nende pa tshidi Bible wamba bua bafue ne bua ditekemena dia dibika ku lufu. Udi mua kuenza mudimu ne ngenyi idi mu mukanda wa Comment raisonner, mu biena-bualu bia: “Mort“ (Lufu) ne “Résurrection“ (Dibishibua ku lufu) bua kulongolola tu-miyuki tua kumubadila anu mvese umue misangu yonso iudi uya kumumona. Udi mua kulua kuakula kabidi nende pashishe bua biena-bualu bikuabu bia muomumue, bu mudi bia mushindu walua masama, bukulakaje ne lufu kujika bua kashidi. Tshidi ne mushinga ntshia kupeta tshiena-bualu tshidi tshisankisha muntu ne kumuleja ku kakese ku kakese tshidi Bible wamba pa tshiena-bualu atshi.
4. Bua tshinyi bidi ne mushinga bua kuambuluisha bakuabu bua kumvuabu mvese utudi tubabadila, ne mmunyi mutuenza nanku?
4 Longesha bua bantu bumvue: Nansha mutubi bitambe buimpe pa tshibidilu bua kuvuija muyuki wetu ne muntu mupepele ne kuwipidija, kudi kabidi tshintu tshikuabu tshia mushinga tshia kuenza pamutu pa kubala anu mvese musungula bimpe patupu. Satana mmufofomije mêsu a meji a bantu bua kabumvu lumu luimpe. (2 Kol. 4:3, 4) Nansha bantu batu bibidilangane ne Bible badi dijinga ne diambuluisha bua kumumvuabu bimpe. (Bien. 8:30, 31) Ke bualu kayi wikale ne dîba dia kumvuija mvese ne kumufidila bilejilu anu bu muutu wenza pautu ne mudimu mu Kalasa ka mudimu wa Nzambi. (Bien. 17:3) Enza bua muntu amone mushinga udi nawu Dîyi dia Nzambi mu nsombelu wende.
5. Mmunyi mudi dishila bantu bibejibeji pa tshibidilu mua kubafikisha ku dilonga dia Bible?
5 Bikala muntu usanka bua malu adiye ulonga, ikala umubadila ku kakese ku kakese mu muyuki wenu mvese ibidi anyi isatu ku dikumbula dionso. Keba mushindu wa kubueja broshire wa Utulomba anyi mukanda wa Dimanya mu muyuki wenu. Mushindu eu ke udi dishila bantu bibejibeji pa tshibidilu mua kubafikisha ku dilonga dia Bible.