Lama

Mishindu ya kufila broshire mu buambi: Tshitupa 2

Ngenyi idi mu tshisakidila etshi idi mua kunuambuluisha bua kufila broshire mu buambi. Nudi mua kuyishintulula bilondeshile muaba unudi basombele.​—Tangila Mudimu wetu wa Bukalenge wa Tshiongo 2005, dib. 8 ne wa Kabalashipu 2005, dib. 3, 4.

Quel est le but de la vie? Comment le découvrir?

Wewe mumane kuela muntu muoyo, udi mua kuamba ne:

“Nsombelu wa lelu udi anu wa ntatu ne malu adi atekeshangana ku muoyo. Udi wela meji ne: ke muvua malu ne bua kuikala nunku anyi? [Lekela muntu andamune.] Broshire eu udi uleja muakumbana disua dia Nzambi dia ku ntuadijilu bua bantu ne buloba. [Umvuija tshimfuanyi tshidi mu dibeji dia 20-21. Pashishe bala tshikoso tshia 9, leja malu manene adi mu Yeshaya 14:24 ne 46:11.] Musangu udi ulonda, nenkuleje mu Bible mualua Nzambi kuvuija buloba ebu Mparadizu.” Mupesha broshire ne numvuangane bua dituku dia kumupinganyina.

Paudi upingana, udi mua kuamba ne:

“Mvua mukuleje musangu mushale ne: Nzambi mmusue bua bantu basombe kashidi pa buloba bukudimuna mparadizu. [Muleje tshiakabidi tshimfuanyi tshidi mu dibeji dia 20-21.] Umanye ne: Yezu, Petelo ne Davidi bakakula bua Mparadizu.” Mulomba bua angate broshire uuvua mumushile. Pashishe ndayi mu dibeji dia 21-22 ne konkononayi tshikoso tshia 10-13. Mulomba bua nuikale nulonga nende Bible anyi bua nulue kukonkonona ka-mutu ka bualu kamue ku tudi mu dibeji dia 29-30 musangu udi ulonda.

**********

Mumanyishi utshidi nsonga udi mua kuamba ne:

“Bana ba bungi ba mulongo wanyi batu belakana bua matuku atshilualua. Udi umona pebe ne: nsombelu neikale muimpe bua bana balua panyima petu anyi? [Lekela muntu andamune.] Bible udi wakula bua malu mimpe enzekela bantu mu matuku atshilualua. [Muleja tshimfuanyi tshidi mu dibeji dia 31 dia broshire, ne bala mêyi adi munkatshi muatshi. Pashishe bala 2 Petelo 3:13.] Broshire eu udi wakula bua malu malenga adi Nzambi mulongoluele bantu. [Akula bua tu-mitu tua bualu tufikisha bikole tudi mu dibeji dia 29-30 ne mupesha broshire.] Nendue kukutangila kabidi bua kukuleja mushindu udi Nzambi mulaye bua kujikija mvita.” Muambila dituku diwapingana.

Paudi upingana, udi mua kuamba ne:

“Musangu mushale umvua mulue kukutangila, mvua muakule mu tshikoso bua disua dia Nzambi dia kuvuija buloba ebu mparadizu. [Tangila tshiakabidi tshimfuanyi tshidi mu dibeji dia 31.] Ndi musue kumanya tshiudi pebe wamba bua bualu budi Nzambi mulaye ebu bua kujikija mvita.” Mulomba bua angate broshire wende. Pashishe nubale nende tshikoso 3-6 mu dibeji dia 29 ne nuyukidilepu. Umuleje ne: musangu udi ulonda nenukonkonone tshikoso tshia 7-8.

**********

Padi muntu mukole uyisha ne muana mukese, muntu mukole udi mua kuamba ne:

“Muanetu ________ mmusue kukulejaku tshimfuanyi kampanda ne kukubadila mvese umue mu Bible. [Muana udi uleja tshimfuanyi tshidi mu dibeji dia 31, ubala miaku idi munkatshi muatshi ne pashishe ubala Buakabuluibua 21:4.] Broshire eu udi umvuija tshikala Nzambi mua kuenza bua ntatu itudi nayi lelu. [Akula mu tshikoso bua tu-mitu tua bualu tufikisha bikole tudi mu dibeji dia 29-30, ne mushila broshire.] Patualukila, nenkuleje tshidi Bible wamba bua mushindu wajika masama onso.”

Panudi nupingana, muntu mukole udi mua kuamba ne:

“Musangu mushale, mvua mukuambile ne: nenkuleje tshidi Bible wamba pa mushindu wajika masama onso. Tangila tshidibu bafunde muaba eu.” Mulomba angate broshire wende, ne nukonkonone nende tshikoso tshia 9-14 mu dibeji dia 29. Mulomba bua kulonga nende Bible anyi bua kulua kukonkonona tshikoso tshia 15-17 musangu udi ulonda.

Broshire bua bantu badi mu bitendelelu bidi kabiyi bitaba Kristo

Connaîtrons-nous un jour un monde sans guerre?

Paudi uyisha muena Yuda, udi mua kuamba ne:

“Ba bungi ba kutudi bakadi bafuishe muntu. Buebe wewe, ntshinyi tshidi tshitufikila patudi tufua?” [Lekela muntu andamune.] Pashishe muleje kazubu kadi mu dibeji dia 22 kadi kamba ne: “Que sont la mort et l’âme?” (Lufu ntshinyi, ne anyima ntshinyi?) Bala tshikoso tshia 17 mu dibeji dia 23 tshidi tshiakula bua dibika dia bafue. Muleja ne: Yobo uvua ne ditekemena dia kubika ku lufu. Mupesha broshire ne nupetangane bua kulua kukonkonona mvese idi ku ndekelu kua tshikoso tshia 17.​—km 10/99 dib. 8.

La direction venant de Dieu: le chemin qui mène au Paradis

Paudi uyukila ne Mizilman, udi mua kuamba ne:

“Ntu nditatshisha bikole bua kuyukila ne ba-Mizilman. Ndi mumanye ne: ba-Mizilman batu bitaba Nzambi umuepele mulelela ne batu bitaba kabidi baprofete bonso. Ki mmuomu anyi? [Lekela muntu andamune.] Mvua njinga kuyukila nebe bua mulayi kampanda wa kale udi wakula bua dikudimuna dia buloba ebu mparadizu. Ndiku mua kukubadila tshivua umue wa ku baprofete aba mufunde anyi? [Lekela muntu andamune. Pashishe bala Yeshaya 11:6-9.] Mulayi eu udi umvuluija mêyi a mu Koran adi mu broshire eu.” Bulula broshire mu dibeji dia 9 ne bala mêyi adi mafunda mu maleta mafikisha bikole. Yeye muleje dijinga dia kumanya bia bungi, tungunuka ne kuyukila nende mu tshikoso tshia 7-9 mu dibeji dia 8.​—km 11/99 dib. 8.

Mmunyi muudi mua kupeta ditalala ne disanka dia bushuwa? (Angl.)

Paudi uyisha mulongi muena Chine, udi mua kuamba ne:

“Balongi ba bungi bankadi mumone mbasue kuikala ne disanka ne ditalala. Udi umona ne: bidi ne mushinga anyi? [Lekela muntu andamune.] Kabienaku mua kukusankisha wewe mumone mêyi a kale aa akumbana anyi?” Bala Musambu 37:11 ne mupesha broshire.​—km 2/98 dib. 5.

“Monayi, Ndi mvuija bintu bionso bipiabipia”

Udi mua kuambila muntu mukole muena Buddha ne:

“Pamuapa udi pebe uditatshisha bu meme bua ditangalaka dia ngenyi mibi idi inyanga bana batudi tulela. Bua tshinyi ngikadilu mibi mmitampakane mushindu eu mu bansonga? [Lekela muntu andamune.] Udiku mumanye ne: bakavua bamanyishe malu aa mu mukanda uvuabu batuadije kufunda kumpala kua kuasabu tshitendelelu tshia ba-Mizilman, tshia bena Kristo ne tshia bena Hindu anyi? [Bala 2 Timote 3:1-3.] Bantu mbatungunuke ne kuleja ngikadilu eyi nansha mudibu benda balonga malu a bungi. [Bala mvese wa 7.] Broshire eu mmungambuluishe bua kumanya bulelela budi bantu ba bungi kabayi bamanye to. Udi musue kumubala anyi?”​—km 8/99 dib. 8.

Nos problèmes​—Qui nous aidera à les résoudre?

Paudi uyisha nsonga muena Hindu, udi mua kuamba ne:

“Ndi mumanye ne: udi witabuja Nzambi. Udi umona pebe ne: ntshinyi tshidi Nzambi mutulongoluele? [Lekela muntu andamune. Pashishe ubale Genese 1:28.] Kudi miaba mivule pa buloba idi bantu bapite bungi, bikale kabidi bakenga bikole. Udi wela meji ne: Mufuki udi mua kutuambuluisha bua kujikija ntatu yetu anyi?” [Lekela muntu andamune.] Pashishe mupesha broshire.​—km 9/99 dib. 8.

Pourquoi adorer Dieu en amour et en vérité?

Mêyi aa adi mua kusankisha muena Hindu udi ne dîku:

“Ndi ngenda ntangila bantu badi baditatshisha lelu eu bua nsombelu wa dîku mu matunga a bungi. Udi umona pebe ne: ntshinyi tshidi mua kuambuluisha bena mu dîku bua kuikalabu mu buobumue? [Lekela muntu andamune.] Bantu bakuabu mbamanye tshidi mifundu ya bena Hindu yamba bua dîku, kadi kabatu banji kupeta mushindu wa kuyifuanyikija ne tshidi Bible wamba pa bualu ebu to. Mvua musue kuyukilaku nebe malu aa. [Bala Kolosai 3:12-14.] Broshire eu udi wakula bua mifundu minsantu ya mu Inde ne malu a mu Bible kabidi.” Mupesha broshire, ne akuila pa malu adi mu dibeji dia 8-9 ne dia 20-21.​—km 9/99 dib. 8.