Ambuluishayi bana benu bua kuyishabu bimpe
1 Baledi bena Kristo badi ne bujitu bunene bua kulongesha bana mua kuyisha kutuadijila ku buana buabu. Badi mua kuenza nunku mu mishindu ya bungi. Bana bakuabu badi mua kuamba mêyi a mu mvese kampanda wa mu Bible ku muoyo nansha kabayi banji kumanya kubala. Ebi bidi mua kusankisha bantu badi babateleja. Padi bana benda bakola, badi mua kuenza bia bungi mu mudimu wa kuyisha. Mmunyi munudi nuenu baledi mua kuambuluisha bana benu bua kuyishabu bimpe? Ngenyi idi ilonda eyi idi mua kunuambuluisha.
2 Mumane kuela muntu muoyo, udi mua kuamba ne:
▪ “Muananyi wa balume [tela dîna diende] udi ne mvese wa mushinga mukole wa mu mukanda wa Misambu udiye musue bua uteleje.” Muanebe udi mua kuamba ne: “Mvese wa mu Misambu eu mmundongeshe dîna dia Nzambi. [Muana udi ubala anyi wamba ku muoyo mêyi a Musambu wa 83:18.] Bibejibeji ebi bidi bileja tshikala Yehowa Nzambi mua kutuenzela. Ndi mua kukushilabi anyi?” Muledi udi mua kujikija muyuki pa kumvuija muntu mushindu udi mudimu wetu wa pa buloba bujima wenda ku diambuluisha dia mapa.
3 Anyi udi mua kuamba ne:
▪ “Muoyo webe au. Ndi ngenda ndongesha muananyi wa bakaji [tela dîna diende] bua kuikalaye uditatshisha bua bantu bakuabu. Mmusue kukuambilaku bualu bukese bua mu Bible.” Muana udi mua kuamba ne: “Umue mushindu undi mua kuambuluisha bantu nkubambila tshidi Bible mutulaye bua matuku atshilualua. [Muana udi ubala anyi wamba ku muoyo mêyi adi mu Buakabuluibua 21:4.] Bibejibeji ebi bidi bileja kabidi tshikala Bukalenge bua Nzambi mua kutuenzela. Ndi ngela meji ne: nebikusankishe.”
4 Kuyukila ne bantu misangu yonso mu mishindu mipepele kudi kuambuluisha bana bua kulengeja mushindu wa kumanyisha mukenji wa Bukalenge bua Nzambi. Kuambulula mushindu wa kuakula ne dîyi didi diumvuika bimpe nekubambuluishe bua kumanya kuakula mu nsombelu mishilangane. Kudilongolola kumpala kua dîba ne kuela bana kalumbandi nekubasake bua kuakula bua malu adibu bitabuja.
5 Bana ba bungi mbalue bamanyishi badi kabayi banji kutambula bualu mbabambuluishe nunku. Bulelela, bidi bienza disanka patudi tumona bana betu bamanya kuyisha bimpe, ki mmuomu anyi?—Musambu 148:12, 13.