Tumanyishayi bantu ba bungi menemene lumu luimpe
1. Bena Kristo ba kumpala bakenza tshinyi bua kumanyisha bantu ba bungi menemene lumu luimpe?
1 Bayidi ba kumpala ba Yezu bakenza muabu muonso bua kumuangalaja lumu luimpe lua Bukalenge. Bakaluambila bantu ba bungi menemene mu mishindu mishilangane. Bafundi ba Bible bena Kristo bakafunda mikanda yabu mu tshiena-Greke tshia bantu bonso, tshivuabu bakula mu Bukalenge bua bena Lomo bujima. Pashishe, bamanyishi ba lumu luimpe ba tshisumi ba mu bidimu bia 100 too ne 200 ne pa mutu bikondo bietu ebi ke bavua ba kumpala mu dienza mudimu ne mukanda mujima mufunda ku tshianza (anyi codex) uvua mupepele bua kubala kupita mivungu.
2, 3. (a) Mmunyi mudi Yeshaya 60:16 ukumbana mu matuku etu aa? (b) Mmushindu kayi udibu benza mudimu ne biamu bia lelu bua kutantshisha ntendelelu mulelela?
2 Dienza mudimu ne biamu bia lelu: Yehowa wakamanyisha ku butuangaji bua muprofete Yeshaya ne: “Newamue mabele a bisamba bia bantu.” (Yesh. 60:16) Bilondeshile mulayi eu, basadidi ba Yehowa badi benza mudimu ne bintu bia mushinga bia mu matunga bua kutantshisha mudimu wa buambi. Tshilejilu, mu 1914, bidimu bia bungi kumpala kua filme ya bindindimbi biakula ne binyungakana kumanyikayi bikole, Balongi ba Bible bakatuadija kuleja “Foto-Drama wa Bufuki.” Filme eu wa mêba muanda mukulu ne wa bimfuanyi ne bindindimbi binyungakana, bikale ne mêyi ne mekala wakafikisha bantu miliyo ne miliyo ku dimanya bulelela.
3 Lelu’eu, basadidi ba Nzambi badi benza mudimu ne biamu bidi bipatula mikanda lukasa lukasa ne biamu bia ordinatere bua kupatula Bible ne mikanda ya malu a mu Bilbe mu miakulu ya bungi. Badi babanya mikanda eyi ne lukasa luonso mu bitupa bia kule menemene, ifika kudi bantu ba mu matunga 235 ku diambuluisha dia tuwulu, mashinyi, mazuwa ne ndeke. Yehowa mmusake basadidi bende ku diambuluisha dia nyuma wende bua kuenza mudimu bimpe ne biamu bia lelu ne kumanyisha bantu ba bungi menemene bulelela kupita too ne kumpala.
4. Mmalu kayi adi bamue bashintulule bua kumanyisha bantu ba bungi lumu luimpe?
4 Dishintulula nsombelu: Mbasake kabidi batendeledi balelela bua kuakaja nsombelu wabu bua kumona mua kuyisha bantu ba bungi menemene. Ba bungi mbapepeje nsombelu wabu bua kuyisha bikole. Bamue mbaye miaba idibu dijinga ne bamanyishi ba Bukalenge bavule. Bakuabu mbalonge muakulu muenyi bua kuvudija mudimu wabu wa kuyisha.
5, 6. Ntshinyi tshitudi mua kuenza bua kuyisha bantu ba bungi menemene mu teritware wetu?
5 Tudi kabidi mua kumanyisha bantu ba bungi lumu luimpe patudi tuyisha mêba adi bantu ku nzubu yabu ne miaba itudi mua kupeta bantu. Bikala mu teritware wenu bantu kabayi misangu ya bungi ku nzubu mu munya, udiku mua kuditatshisha bua kuyisha mêba a dilolo anyi? Kudiku miaba idi bantu ba bungi itudi mua kuyisha anyi? Ukadiku mutete kuyisha ku telefone ne miaba idi bantu bapanyishila bintu anyi? Utuku ukeba mishindu ya kuyisha patu mpunga umueneka anyi?
6 Bulelela, tudi ne diakalenga dinene dia kumanyisha bantu bavule dîna dia Yehowa ne Bukalenge buende. Tutungunukayi ne kumanyisha bantu ba bungi menemene bulelela bua mu Dîyi dia Nzambi budi bupetesha lupandu.—Matayo 28:19, 20.