Utu wenza mudimu ne tubeji tua dibikilangana natu anyi?
Dimue dituku muana wa balume mukuabu wa bidimu 11 wakangula kabeji ka dibikilangana naku mu muyuki wa patoke uvua ne tshiena-bualu tshia inferno. Wakalua kuamba pashishe ne: “Kabeji aka kakakoka ntema yanyi bikole bualu bu mumvua misangu ya bungi ngenza malu mabi, mvua ne buôwa bua kuya mu inferno wa kapia pamvua ne bua kufua.” Wakaya kuteleja muyuki au, kunyima kua tshidimu bu tshijima bamane kulonga Bible misangu ya bungi, wakatambula. Ke muakatuadija mudimu wakenza muanetu Karl Klein matuku ende onso a muoyo, kuluaye muena mu Kasumbu Kaludiki ka Bantemu ba Yehowa bidimu bia bungi. Bionso biakatuadija anu ne kabeji ka dibikilangana naku.
Tubeji tua dibikilangana natu tutshidi anu tutuambuluisha lelu bua kuyisha. Bamanyishi bavule batu bapesha bantu tubeji etu bua kutuadija nabu miyuki. Padi baledi balongesha bana mua kuyisha, mbimpe babaleje mua kufila kabeji ka dibikilangana naku ku nzubu. Bamanyishi batu ne tshibidilu tshia kufundila bantu mikanda bua kubayisha badi mua kubelela tubeji etu mu mikanda ayi bua kubabikila mu bisangilu bietu. Bushuwa, tubeji etu ntuimpe bua kubikila natu balongi ba Bible ne bantu bakuabu badi basankidila bulelela mu bisangilu bietu.
Utu pebe upesha bantu tubeji tua dibikilangana natu mu bisangilu pautu uyisha anyi?