Ndongamu mupiamupia wa mpuilu wa tshijengu

Mu matuku aa a nshikidilu wa tshikondo etshi tshibi, mbimpe bua tuetu kulama bivualu bietu bia mu nyuma ne buena Kristo buetu. (Buak. 16:15) Ke bua tshinyi tshiena-bualu tshia mpuilu wa tshijengu bua tshidimu tshia 2005 ne 2006 tshidi ne: ‘Nudivuadike bumuntu bupiabupia.’​—Kolos. 3:10.

Dituku dia kumpala: Muyuki wa kumpala mukosolola mu bitupa wa se: “Ngikadilu ya bumuntu buebe bupiabupia imueneke” neuleje mudi bumuntu bupiabupia butuambuluisha mu nsombelu wetu mujima. Mmunyi mutudi mua kufika ku divuala bumuntu bupiabupia? Ke tshituamona mu miyuki ibidi ya ndekelu ya dituku dia kumpala, wa se: “Dielela mukenji wa kuikala welangana meji bimpe” ne wa “Ndongeshilu udi ufumba bumuntu bupiabupia.”

Dituku dibidi: Mu muyuki muibidi mukosolola mu bitupa wa se: “Ikala ne ludimi lua muena meji” netumone mushindu udi bumuntu bupiabupia bulengeja ndimi yetu. Muyuki wa patoke newikale ne tshiena-bualu tshia se: “Udiku uluisha Mubi bua kumutshimuna anyi?” Muyuki eu neuleje bua tshinyi tudi ne bua kujingulula mayele a Satana. Miyuki ibidi ya ndekelu ya mpuilu eu, wa se: “Udilame kuyi ne katoba ka ku malu a pa buloba” ne wa “Tudivuijayi bapiabapia munda muetu ku dituku ku dituku” neyituambuluishe bua kulekela meji ne ngikadilu bidi bibengangana ne njila miakane ya Nzambi ne bua kushala bashindame mu ntendelelu wa Yehowa.

Tudi bindile ne muoyo kulukulu bua kuluabu kutukankamija ne kutuleja mua kuvuala bumuntu bupiabupia ne mua kubulama.