Tumanyishayi butumbi bua Yehowa
1 Mufundi wa misambu wakamba ne: ‘Nuimbile Yehowa, nuenu bonso ba pa buloba. Nuambile ba munkatshi mua bantu butumbi buende, numanyishe ba munkatshi mua bantu bonso malu a kukema akenzaye.’ Patudi tuelangana meji a bikadi Yehowa mutuenzele, bidiye utuenzela, ne bialuaye kutuenzela, bidi bitusaka bua kuambila bantu butumbi buende!—Mus. 96:1, 3.
2 Mu mudimu wetu wa buambi: Bantemu ba Yehowa badi ne diakalenga dia kuikala ne dîna dia Yehowa ne kuditumbisha pa buloba bujima. (Mal. 1:11) Mbashilangane bikole ne bamfumu ba bitendelelu bikuabu badi bumbusha dîna dia Nzambi mu nkudimuinu yabu ya Bible ne dikamakama dionso. Mudimu wa kumanyisha dîna dia Nzambi ngua kuenza ne mitalu bualu bantu bonso badi ne bua kutendekena dîna edi ne ditabuja bua kupanduka ku dikenga dinene didi kumpala eku. (Lomo 10:13-15) Kabidi bua kuikalaku ditalala mu diulu ne pa buloba, ne pankatshi pa bonso ba pa buloba bujima, dîna dia Nzambi didi ne bua kuanji kutumbishibua. Ke padi malu onso adi Nzambi wenza atangila anu dîna diende.
3 ‘Yehowa udi munene, udi ne bua kutumbishibua bikole.’ Kadi bua bantu ‘kuambikabu Yehowa butumbi budi buakanangane ne dîna diende,’ badi ne bua kumumanya bimpe. (Mus. 96:4, 8) Pabi, bamue kabena nansha bitaba ne: Nzambi utuku to. (Mus. 14:1) Bakuabu pabu badi bamupenda bamba mudiye kayi ne bukole anyi kayi utabalela malu a bantu. Tudi tutumbisha Yehowa patudi tuambuluisha bantu ba muoyo muimpe bua kumanya Mufuki wabu bimpe, disua diende ne ngikadilu yende milenga.
4 Ku bienzedi bietu: Kuikala ne nsombelu udi umvuangana ne mikenji miakane ya Yehowa kudi kumutumbisha. Bantu bonso batu bamona bienzedi bietu bimpe. (1 Pet. 2:12) Tshilejilu, mankenda ne ndengejilu wetu wa mubidi muimpe bidi bituangatshisha bimpe kudi bantu ne bitupetesha mushindu wa kubayisha bua kuikalabu ne nsombelu udi umvuangana ne Dîyi dia Nzambi. (1 Tim. 2:9, 10) Bidi bituenza disanka dia bungi padi bakuabu ‘bamona midimu yetu mimpe ne batumbisha Tatu wetu wa mu diulu’!—Mat. 5:16.
5 Tutumbishayi Nzambi wetu mulenga dituku dionso ku mêyi etu ne bienzedi bietu bua tuitabe lubila lua disanka elu: ‘Nuimbile Yehowa musambu, nuvudijile dîna diende disanka; nuambile bantu lumu lua lupandu luende ku dituku ku dituku.’—Mus. 96:2.