Tutabalelayi bakuabu: Pa kuikala ne ntema
1 Yehowa Nzambi ne Yezu Kristo mbamanye bimpe menemene majinga a bantu ne badi babambuluisha. (2 Kul. 16:9; Mâko 6:34) Tuetu bajingulule majinga ne malu a bantu batudi tupeta mu buambi, netumone mua kubayisha lumu luimpe bilondeshile malu aa.
2 Tabalela too ne tumalu tukese: Yezu uvua ne ntema ya bungi. (Mâko 12:41-43; Luka 19:1-6) Bia muomumue, patudi tusemena ku nzubu kua muntu tumona bimfuanyi bia malu a Nzambi, tubeji tulamika ku mashinyi anyi bintu bitu bana banaya nabi bikale panshi, tudi mua kupeta mushindu wa kuyisha lumu luimpe bimpe menemene.
3 Mpala wa muntu ne mushindu udiye utuakidila bidi mua kuleja mudiye udiumvua. (Nsu. 15:13) Pamuapa mmufuishe muntu, bikengela kumukankamija, peshi udi ne amue malu adi mamutonde. Tuetu bamubadile mvese muakanyine udi mua kusanka bikole. (Nsu. 16:24) Tshilejilu, muena kumbelu udi upatuka lukasa lukasa anyi? Mmuambule muana udi umudidila muadi anyi? Bikalabi nanku, mbimpe numvuangane bua kulua dituku dikuabu. Tuetu bikale ne kanemu ne ‘luse,’ bidi mua kusaka muntu eu bua kutuakidila bilenga ne kututeleja patualua kabidi.—1 Pet. 3:8.
4 Yisha bilondeshile nsombelu: Pavua mupostolo Paulo mu tshimenga tshia Atena, wakamona tshioshelu tshivuabu bafundapu ne: ‘Kudi Nzambi udi kayi mumanyibue.’ Ke yeye kuyisha bantu bilondeshile bualu ebu wamba ne: ‘Unudi nutendelela kanuyi bamumanye bimpe nyeye undi nnumanyisha’ eu. Nyishilu wa Paulo eu wakafikisha bamue ba ku bavua muaba au ku ditaba mukenji wa Bukalenge ne kulua bena kuitabuja.—Bien. 17:23, 34.
5 Bia muomumue, tuetu bikale ne ntema, netujingulule majinga a batudi tuyisha ne kubayisha bilondeshile majinga au. Tuele nkonko idi mua kufikisha muntu utudi tuyisha ku dipatula idi munda muende. Keba mvese udi muakanangane ne dijinga diende. (Nsu. 20:5) Tuetu bikale tuteya ntema ku majinga a bakuabu ne tuditatshisha bushuwa bua bualu buabu, netuyishe bimpe be!