Dilongesha didi difikisha ku muoyo
1 Bidi bienza disanka dia bungi bua kumona bantu bafika ku diumvua bulelela bua mu Dîyi dia Nzambi. Kufikisha bakuabu ku dimanya Nzambi ne malu adiye mulongoluele bantu mbualu bua disanka. Dilongesha edi didi mua kufikisha muntu ku muoyo wa tshiendelele.—Yone 17:3.
2 Bua tshinyi didi ne mushinga: badi balongesha bantu lelu eu mu mishindu mishilashilangane ne pa malu kabukabu adi kaayi kufuanyikija. (Muam. 12:12) Kadi dimanya dia malu onso au kadiena mushinga umue ne “mianda minene ya Nzambi” to. (Bien. 2:11) Dilongesha didibu balongeshangana pa buloba ebu ndikumbane mua kusemeja bantu pabuipi ne Mufuki ne bobu kumanya malu adiye mulongolole anyi? Ndiambuluishe bantu bua kumvua tshitu tshitufikila patudi tufua anyi bua tshinyi kudi makenga bungi nunku anyi? Ndipeshe bantu ditekemena anyi? Ndiambuluishe bua kulongolola nsombelu wa mu dîku anyi? Tòo. Anu dilongesha dia kudi Nzambi ke didi mua kuandamuna bulelela nkonko yetu eyi ya mushinga mukole.
3 Dilongesha dia kudi Nzambi didi difila tshintu kampanda tshidi tshipangike bikole lelu eu pa buloba: didi diakaja bikadilu bia balongi badi. Dîyi dia Nzambi didi difikisha bantu badi bitaba malongesha a mu Bible ne baatumikila ku diumbusha mu mitshima yabu lungenyi lua disunguluja makoba, bisamba ne lua buena-muabu. (Eb. 4:12) Didi disaka bantu ku dilekela mishindu yonso ya tshikisu ne ku ‘diluata bumuntu bupiabupia.’ (Kolos. 3:9-11; Mika 4:1-3) Kabidi, dilongesha dia kudi Nzambi ndipeshe bantu ba bungi bukole bua kulekela bilele ne ngikadilu idi kayiyi isankisha Nzambi bikavua bijame munda muabu.—1 Kol. 6:9-11.
4 Bua tshinyi bidi bikengela anu mpindieu? Mulongeshi wetu Munene udi utudimuija bua tshikondo tshitudi etshi. Mulayi wende wa dilumbuluisha udi ne mukenji udi ukengela kumanyisha pa buloba bujima. (Buak. 14:6, 7) Kristo udi ukokesha mu diulu, mu tshitupa tshîpi emu nsangilu wa bitendelelu bionso bia dishima neabutuke, ne Bukalenge bua Nzambi bukadi pa kubutula mbulamatadi yonso ya pa buloba. (Dan. 2:44; Buak. 11:15; 17:16) Ke bualu kayi bidi bikengela anu mpindieu bua bantu kuitababu Mukalenge udi Nzambi muteke, kupatukabu mu Babulona Munene ne kubila dîna dia Yehowa ne ditabuja. (Mus. 2:11, 12; Lomo 10:13; Buak. 18:4) Nunku tudi ne bua kuenza muetu muonso bua kulongesha bakuabu dilongesha didi difikisha ku muoyo.