Longesha ne bindidimbi
1. Mmunyi muvua Yehowa mulongeshe basadidi bende ba kale ne bimfuanyi? Kuakapatuka bipeta kayi?
1 Yehowa uvua imue misangu wambila basadidi bende ba kale malu avua ne mushinga mukole mu bikena-kumona anyi mu bilota. Vuluka tshikena-kumona tshia tshidiendelandela tshia Yehowa tshia mu diulu tshiakamona Yehezekele. (Yeh. 1:1-28) Elabi meji muvua Danyele mudiumvue pakamonaye dilondangana dia makalenge pa buloba mu tshilota. (Dan. 7:1-15, 28) Kadi netuambe tshinyi bua malu a kukema akamona Yone mu ‘bimanyinu’ bua malu avua ne bua kuenzeka mu ‘dituku dia Mukalenge’? (Buak. 1:1, 10) Yehowa wakabalongesha ne bimfuanyi bimpe ne bintu bia kukema ne malu aa akashala mu lungenyi luabu mutantshi mule.
2. Tudi mua kulongesha bakuabu malu a mu Bible ku diambuluisha dia tshinyi?
2 Tuetu basue kumvuija bantu malu a mu Bible bimpe ne basue bua kabaapu muoyo, tudi petu mua kubalongesha ne bande yetu ya video. Bande yetu ya video idi ne biena-bualu bia bungi bidi mua kufikisha muntu ku ditabuja Bible, kuanyisha bulongolodi bua Yehowa ne mikenji idi ituvuija bena Kristo balelela. Tumonayi imue mishindu itudi mua kuyisha ku diambuluisha dia bande yetu ya video. Bande idi ilonda eyi idi anu imue ya ku itudi mua kulongesha nayi.
3. Bua kukoka mulongi wa Bible ku bulongolodi, tudi mua kuenza tshinyi?
3 Mu buambi: Ukadi mulondele mulongi wa Bible malu a bena Kristo netu ba pa buloba bujima anyi? Muleja bualu ebu mu bande wa video wa Toute la communauté des frères. Udi mua kumushila bande eu bua amutangile kumpala kua nuenu kulonga musangu udi ulonda peshi nudi mua kulua kumutangila nuenu bonso musangu udi kumpala. Pashishe nukonkonone nende nkonko idi mu Mudimu wetu wa Bukalenge wa Kabalashipu 2002.
4. Ntshinyi tshidi Bantemu batshidi bansonga mua kulongesha natshi mu tulasa?
4 Nuenu bansonga nudi mua kulomba dianyisha kudi mulongeshi wenu bua kuleja balongi nenu bande wa La fermeté des Témoins de Jéhovah face à la persécution nazie anyi wa Fidèles dans les épreuves—Les Témoins de Jéhovah en Union soviétique. Lomba bua kulongolola nkonko, pashishe uyangate mu Mudimu wetu wa Bukalenge wa Kabalashipu 2001 anyi wa Luishi 2003 ne uyakaje bua balongi kuyumvua bimpe.
5. Baledi badi mua kukuata mudimu ne tshinyi mu dilonga diabu dia dîku?
5 Kudi bena mu dîku ne balunda: Nuenu baledi, kukadi matuku bungi kayi katshia bana benu batangila bande wa Les jeunes s’interrogent. . . Comment se faire des vrais amis? Kanuenaku mua kumutangila kabidi mu dilonga dienu dia dîku dialonda anyi? Mudimu wetu wa Bukalenge wa Tshisanga 2002 udi ne nkonko mimpe inudi mua kukonkonona.
6. Tshiudi mua kuenza ntshinyi bua kupitshisha tshikondo tshimpe ne balunda?
6 Kudiku balunda bebe bena Kristo baudi musue kubikila kuebe anyi? Nenupitshishe dilolo dilenga ditambe nuenu batangile nabu bande wa Respectons l’autorité de Jéhovah nangananga nuenu bakonkonone malongesha adimu ku diambuluisha dia nkonko idi mu Mudimu wetu wa Bukalenge wa Kabitende 2004.
7. Ngimue mishindu kayi iudi mua kuenza mudimu ne bande yetu ya video?
7 Mikuabu mishindu: Mmunyi muudi kabidi mua kuenza mudimu ne bande yetu ya video 20 itudi nayi? Kuenaku mua kuleja muntu uutu ne tshibidilu tshia kutangila umue anyi ibidi ya kudiyi bua kumuambuluisha bua kukola mu nyuma anyi? Kuenaku mua kulomba dianyisha bua kuleja bande yetu mu nzubu wa bakulakaje anyi? Bande eyi idiku mua kufikisha balela bebe, bena mutumba nebe anyi bena mudimu nebe badi kabayi Bantemu ku dikunemeka anyi? Bande yetu idi ne malu adi akemesha bantu, abalongesha ne mimpe kutangila. Enza nayi mudimu bua kulongesha bantu.