Mukanda wa Kasumbu Kaludiki

BANA betu, mu mikanda ya bungi ivua Paulo utumina bisumbu uvua ubasamba misangu ya bungi ne mêyi aa wamba ne: ‘Dinanga [anyi bulenga budi kabuyi butuakanyine] ne bupole bia kudi [Nzambi], Tatu wetu ne bia kudi Yezu Kristo, Mfumu wetu bishindame munda muenu.’ Ke tshitudi petu tunujingila.​—Ef. 1:2, MMV.

Tudi ne dianyisha dipite bungi bua dinanga anyi bulenga budi kabuyi butuakanyine budi Nzambi mutuleje padiye mufile mulambu wa Yezu Kristo. Mulambu eu mmutuambuluishe bua kulua balunda ba Nzambi. Katuena balue balunda ba Nzambi anu bualu tudi tulonga Bible bikole, tuyisha bikole anyi tuenza midimu mikuabu mimpe to. Ditujimijila mibi ne muoyo wa kashidi utuapeta ki ndifutu dia bitudi tuenza to, kadi bidi anu bualu Yehowa mmutunange, mutupeshe Yezu Kristo bu mulambu.​—Lomo 11:6.

Paulo wakafundila bena Kristo nende ne: ‘Tudi tunubela bua [bulenga butudi katuyi bakanyine anyi] dinanga divua Nzambi mutuleje dipatule tshipeta. Bualu Nzambi udi wamba ne: “Tshikondo tshia kukuleja mundi nkunanga ntshimane kufika, ke meme kukuteleja. Dituku dia kukusungidila dimane kufika, ke meme kukuambuluisha.” Telejayi! Lelu ke tshikondo tshinudi ne bua kuanyisha bua Nzambi anunange, ke dituku didiye mua kunusungidila.’ ‘Tshikondo tshia kuanyisha’ tshivuaku kumpala kua kubutulabu tshimenga tshia Yelushalema. Bantu bavua banange Yehowa bakapanduka mu ngumvuila kampanda. Bakapandisha mioyo yabu kabidi bualu bakumuka mu Yelushalema kumpala kua kumubutulabu mu tshidimu tshia 70.​—2 Kol. 6:1, 2, MMV.

Lelu tudi petu mu ‘tshikondo tshia kuanyisha,’ ne mu ‘dituku’ dia lupandu. Bantu badi Yehowa witaba bua bamutendelele bakadi bapanduke mu ngumvuilu kampanda, neabapandishe kabidi mu “dituku dinene dia Yehowa” dikadi pa kulua.​—Sef. 1:14.

Tudi ne mudimu munene bualu dituku dia Yehowa dikadi pa kulua. Mudimu eu ngua kudimuija bantu ne kubambuluisha bua bapete pabu lupandu anu bua bulenga bua Nzambi butudi katuyi bakanyine. Paulo uvua mumanye ne: mudimu eu ki ngua bilele to. Ke kufundaye ne: ‘Ndi ne mulau bingikala tshiyi ngambila bantu lumu luimpe.’ Wakamba kabidi ne: ‘Ndi muena dibanza wa bena lungenyi ne badi bapote kabidi. Nunku ndi mudilongolole bua kuamba lumu luimpe.’​—1 Kol. 9:16; Lomo 1:14, 15.

Yehowa neatuase tshilumbu tuetu katuyi tuenza mudimu wa kudimuija bantu eu. Tudi bamanye tshivuaye muambile muprofete wende Yehezekele. Wakamuambila ne: ‘Muana wa muntu, ndi mukuteke bua utentekele bena Isalele. Paudi umvua muaku wa mukana muanyi, ubambilewu mu dîna dianyi. Meme muambile muntu mubi ne: Neufue, wewe kuyi mumudimuije, kuyi mumuambile bua adimuke, alekele nsombelu wende mubi bua ikale ne muoyo; muntu mubi ewu neafue bua tshilema tshiende, kadi wewe nenkuase tshilumbu tshia mashi ende.’​—Yeh. 3:17, 18.

Ntatu idi ya bungi mu matuku a ku nshikidilu aa. Mbikole bua kutangila malu a dîku, eku tuenza midimu yetu bua tshiakudia ne tshiakuvuala, tuenza ya mu tshisumbu ne tuyisha kabidi. Malu adi alua kabidi kukolela ba bungi bua kunudi bua masama, dibungama dikole, bukulakaje anyi padibu banutatshisha bualu nudi nutendelela Nzambi. Bushuwa, ba bungi ba kunudi badi ‘bakenga ne bujitu.’ Bana betu tudi basue kunuambila anu bu muakamba Yezu ne: ‘Vuayi kundi meme, nuenu bonso badi bakenga, bazengele ne bujitu, meme nennukankamike.’ (Mat. 11:28) Tudi tunuela tuasakidila wa bungi bua munudi benze muenu muonso bua kutungunuka ne kuenzela Yehowa mudimu mu ntatu minene ne mikese.

Bua kuyisha ne kulongesha kunudi benze ne disuminyina, ne kabidi bua mudi Yehowa munusambe, bantu batue ku 4 762 bavua batambula lumingu luonso tshidimu tshishale. Mu tshidimu tshia mudimu tshishale, tudi bapete bisumbu bikuabu 1 375. Tudi tusambila ne tuela meji ne: mukanda wetu mupiamupia wa Bible utu ulongesha tshinyi menemene? udi mpindieu mu miakulu mipite pa 120, newenze bua bulenga budi kabuyi butuakanyine ne ditalala bia kudi Yehowa biambuluishe bantu mu ‘dituku’ dia lupandu edi.

Bana betu, tuetu bena mu Kasumbu Kaludiki tudi banunange ne tudi tunulombela Nzambi dituku dionso. Tuasakidilayi wa bungi bua mushindu unudi nutulombela petu Nzambi misangu yonso.

Bana benu,

Kasumbu Kaludiki ka Bantemu ba Yehowa