Dibaka dia Nzubu ya Bukalenge mbualu bua mushinga mu mudimu wetu wa tshijila
1. Ntshinyi tshitukadi benze mu dibaka dia Nzubu ya Bukalenge? Kadi ntshinyi tshitshidi tshishale bua kuenza?
1 Mu bidimu bitanu bidi bishale ebi, mbibake Nzubu ya Bukalenge 564 ne mbalongolole mikuabu muetu munu. Tudi tuela bana betu ba balume ne ba bakaji ba mu bisumbu bishilangane bavua bambuluishe bana betu bavua biro bia filiale wetu mutume tuasakidila wa manza tente. Nansha mutukadi bamane kuenza mudimu wa bungi eu, bitshidi anu bikengela bua kuibaka Nzubu ya Bukalenge mikuabu ya bungi ne malu makuabu, bu mudi dibaka dia Nzubu wa kuenzela mpuilu mu Limete mu tshimenga tshia Tshinsansa, ku Kisangani (mu Province Orientale) ne mu tshimenga tshia Brazzaville tshia mu République du Congo. Tshidi yonso wa kutudi mua kuenza ntshinyi bua kukuatshisha pende tshitupa etshi tshia mushinga mu mudimu wetu wa tshijila utudi tuenzela Yehowa?—Buak. 7:15.
2. Mmunyi mutudi mua kukuatshisha mudimu wa dibaka dia Nzubu ya Bukalenge idi filiale wetu usua kuibaka?
2 Ikala ne dijinga: Tudi tulomba mumanyishi yonso ukadi mutambule bua adifile bua kuenza midimu eyi nangananga padibu munkatshi mua dibashila Nzubu wa Bukalenge anyi padibu bamulongolola. (Mus. 110:3) Bonso badi basue kuenza mudimu eu badi ne bua kuikala benji ba mudimu bimpe badi bamanye mua kuenza mudimu mu ditalala ne bakuabu. (Mus. 133:1) Nansha wewe kuyi mumanye mudimu wa dibaka, udi anu mua kuambuluisha pebe mu mudimu eu. Udi kabidi mua kulua kumanya mudimu eu, biobi kukuambuluisha bua kulua kuwenza bikole mu matuku adi kumpala.
3. Mmishindu kayi mikuabu itudi mua kukuatshisha mudimu wa dibaka dia Nzubu ya Bukalenge?
3 Wewe kuyi ne mushindu wa kuenza mudimu eu, udi nansha mua kukankamija bana betu bakuabu badi bakumbane bua kuwenza. Udi mua kuenza midimu ivuabu mua kuenza mu tshisumbu tshienu kudi bana betu badi benza mudimu eu. Bakulu badi ne bua kulongolola malu bilenga bua midimu yonso ya tshisumbu kutungunukayi ne kuenda bimpe padi bamue baya mu mudimu wa dibaka dia Nzubu ya Bukalenge anyi mu mikuabu miaba idi filiale wetu wibaka. Kakuyi mpata, Yehowa udi usanka padiye utumona tuenza mudimu mu buobumue bua kuyisha malu a Bukalenge kumpala.—Eb. 13:16.
4. Mmunyi mutudi mua kukankamija bana betu badi baya mu mudimu wa dibaka dia Nzubu ya Bukalenge?
4 Ikala mukankamiji wa bakuabu: Bua kuibaka Nzubu ya Bukalenge, bitu bikengela kuenza mudimu mukole munkatshi mua matuku a bungi. Ke bualu kayi, bantu badibu babikila bua kuenza mudimu eu badi imue misangu mua kuanji kumbuka mu bisumbu bivuabu. Katupu muoyo bua kuela bana betu aba kalumbandi ne kubakankamija bua mudibu badifile ku budisuile ne bitaba bua kudipangisha bimue bintu bua kuenza “mudimu” eu wa pa buawu.—Bien. 6:3; Lomo 14:19.
5. Mmunyi mudi bana betu badi bibaka Nzubu ya Bukalenge ne bua kuleja nkatshinkatshi?
5 Ikala ne nkatshinkatshi: Mudimu wa kumpala utudi nawu ngua kuyisha lumu luimpe lua Bukalenge bua Nzambi. (Mâko 13:10) Ke bualu kayi, biro bitu bitangila malu a dibaka dia Nzubu ya Bukalenge bitu bienza programe wa dibaka dia Nzubu eyi bua bena budisuile kabumuki dîba dionso mu bisumbu biabu tshianana tshianana to. Bia muomumue, bana betu badi benza mudimu eu badi ne bua kudienzeja bua kuikala ne nkatshinkatshi mu midimu yonso idibu babapesha. Padibu bamone ne: kabakuikalaku, badi balomba bana betu bakuabu bua kuenzabu midimu ivuabu ne bua kuenza mu tshisumbu. Bana betu badi bampanda-njila kabena ne bua kulengulula mudimu wabu eu to. Kadi nansha nanku, badiku anu mua kudifila pabu pamue ne bakuabu bua kuenzaku nansha ndambu mudimu wa dibaka dia Nzubu ya Bukalenge.
6. Ntshinyi tshidi tshienzeka padi bantu bonso mu tshisumbu benza mudimu pamue bua ntendelelu mulelela aye kumpala?
6 Mupostolo Paulo wakaleja ne: bena mu tshisumbu badi benza mudimu pamue bua ‘mubidi kuendawu kudiunda ne kukola nkayawu mu dinanga.’ (Ef. 4:16) Dinanga ditudi banange Yehowa ne ntendelelu wende ke didi ditusaka bua kuenza mudimu pamue bua kukuatshisha mudimu wa diamba dia lumu luimpe ne wa dibaka dia Nzubu ya Bukalenge ne mikuabu bua ntendelelu wa Yehowa.