Diasa Nzubu ya Bukalenge didi dienda diya kumpala
1 Mu mpungilu wa distrike wa “Buobumue bua Bukalenge” uvua muenzeke mu 1983 mu États-Unis, bakamanyisha ne: bavua ne bua kulongolola kashete ka pa buaku ka dikala dielamu makuta bua mudimu wa dibaka ne diakaja Nzubu ya Bukalenge mu États-Unis mujima ne mu Canada. Katuvua banji kumanya mabenesha avua mua kumueneka ku mbangilu mikese bu nunku to. Tuakabanga kumvua menemene tshidi Musambu wa 92:4 wamba tshia ne: “Bualu bua wewe, Yehowa, wakunsankisha bua bienzedi biebe; bua midimu ya ku bianza biebe nengimbe misambu ya disanka.”
2 Tudi mpindieu ne disanka dia bungi bua bionso bidi bienda bienzeka. Lelu’eu mudimu munene wa mu tshibungi wa dibaka Nzubu ya Bukalenge udi wenda wenzeka ne lukasa luonso. Mu mushindu kampanda anyi kansanga, tuetu bonso tudi ne mushindu wa kutua petu tshianza mu mudimu eu. Tudi tuenza nanku patudi tufila mapa a mfranga ya bungi anyi mikese bua dibaka dia miaba mivule pa buloba bujima itudi mua kuikala tuya bua kutendelela Nzambi. Bana betu bakuabu ba bungi mbafile pabu ku budisuile biamu biabu bia mudimu, dîba diabu ne mamanya adibu nawu anu bua mudimu eu. Mudimu wonso eu udi wenda bimpe bualu Yehowa udi utuludika, utukuatshisha ne ubenesha mudimu wonso mukole utudi tuetu buonso tuenza.—Mus. 127:1.
3 Filiale ya bungi mmilonde ngenzelu uvuabu balongolole ku mbangilu bua bisumbu bia mu États-Unis. Mu Nzubu ya Bukalenge ya mu matunga a bungi mudi kashete ka mapa mudi bamanyishi bela mapa bua mudimu wa dibaka dia Nzubu ya Bukalenge. Mu Mudimu wetu wa Bukalenge wa ngondo muisatu wa mu 1997 (wa mu États-Unis), bavua bamanyishe dishintuluka kampanda. Bavua bamba ne: “Katshia balongolola bua kuikala kufila mfranga ya [mudimu wa dibaka dia] Nzubu ya Bukalenge mu 1983, bana betu mbafile mapa a bungi ne muoyo mujima, biambuluishe too ne bua kufika ku disombesha bisumbu mfranga bua kuibaka Nzubu ya Bukalenge. Bakadi bambuluishe bisumbu bitue ku 2 700 mu États-Unis katshia balongolola muanda eu. Bisumbu bia bungi kabivua mua kuibaka Nzubu ya Bukalenge mipiamipia anyi kulongoluesha eyi ikavua minyanguke bu kabuyi bua ndongoluelu eu to. Kudi mpindieu dijinga dikole dia kuangata imue ya ku mfranga eyi bua kuyisombesha bisumbu bidi mu matunga adi ne mpetu mikese. [Bulongolodi] buetu ne bisumbu bionso bidi bipeta diambuluisha dia mapa enu abi bidi bianyisha bikole mushindu unudi nutungunuka ne kutua tshidibu balongolola etshi nyama ku mikolo.”
4 Dimanyisha adi diakalua bu lubila lua dibikila nalu bantu bua kudifilabu mu mudimu eu wa kuenza ne lukasa wa dibaka dia Nzubu ya Bukalenge. Mfranga ya Nzubu ya Bukalenge ivua ne bua kuambuluisha bana betu ba mu matunga makuabu bavua nayi dijinga, eku batungunuka ne kuyisombesha bisumbu bikuabu bua dibaka dia Nzubu ya Bukalenge mu États-Unis. Tshiena-bualu tshikuabu tshiakalonda mu Mudimu wetu wa Bukalenge wa ngondo wa tshitema, 1997, tshiakamba ne: “Dijinga dia Nzubu ya Bukalenge ndinene pa buloba bujima. Anu mu tshidimu tshia mudimu tshishale etshi, bisumbu 3 288 mbiledibue. Bia bungi bidi mu Afrike, mu Asia, mu Amerike wa pankatshi, mu Amerike wa ku Sud ne ku Mputu wa ku Est.”
5 Katshia ku tshikondo atshi, mbipeta kayi bidi bimueneka? Annuaire 2001 udi uleja ne: “Katshia ku tshikondo atshi mbibake Nzubu ya Bukalenge 453 mu matunga 30 ne mikuabu 727 idi munkatshi mua dibakibua, bionso ebi anu bua ndongoluelu eu. Badi balonda ngibakilu wa muomumue bua matunga onso ne badi benza mudimu ne bintu ne ngenzelu ya mu matunga mine au. Mu ditunga dia Kenya badi bibaka ne mabue; mu Togo badi bibaka ne tushola; mu Cameroun badi batamba kuibaka ne madioto a siman adibu balua kushinguila pashishe. Mu mushindu eu, bana betu bena kalaba kabena banenga ne kupeta dimanya didi dikengedibua bua kukumbaja midimu minene mu programe eu wa luibaku mu ditunga dijima.
6 Mabenesha a kudi Yehowa pa mudimu eu adi amueneka patoke mu Afrike. Paudi utangila foto ya imue Nzubu ya Bukalenge ikadibu bibake, elabi meji mudi dibaka dia mushindu eu mua kutantshisha mudimu wa Bantemu ba Yehowa. Muanda eu udi utamba kumueka mu malu asatu aa: buobumue buetu bua bena muntu pa buloba bujima, tshidibi bienzela bena kalaba anyi bantu ba muaba unudi ne divula dia bantu badi babuela mu bisangilu. Mu Mudimu wetu wa Bukalenge eu mbaleje foto ya Nzubu ya Bukalenge ikadibu bibaka mu Afrike, ne mu nimero mikuabu yalonda mu matuku atshilualua nebaleje mushindu udi mudimu wa dibaka dia Nzubu ya Bukalenge wenda uya kumpala mu bitupa bikuabu bia buloba.
[Bimfuanyi mu dibeji 3]
RÉPUBLIQUE CENTRAFRICAINE
Bimbo (Bangui)
Begoua (Bangui)
[Bimfuanyi mu dibeji 4]
Ukonga (Tanzanie)
[Tshimfuanyi mu dibeji 4]
Accra (Ghana)
[Tshimfuanyi mu dibeji 4]
Salala (Liberia)
[Tshimfuanyi mu dibeji 4]
Karoi (Zimbabwe)
[Bimfuanyi mu mabeji 4, 5]
Allada (Benin: Nzubu wa Bukalenge wa kale)
Allada (Benin: Nzubu wa Bukalenge mupiamupia)
[Tshimfuanyi mu dibeji 5]
Kpeme (Togo)
[Tshimfuanyi mu dibeji 5]
Sokodé (Togo)
[Bimfuanyi mu mabeji 4, 5]
Fidjrosse (Benin)
[Tshimfuanyi mu dibeji 6]
Lyenga (Zambie: Nzubu wa Bukalenge wa kale)
[Tshimfuanyi mu dibeji 6]
Lyenga (Zambie: Nzubu wa Bukalenge mupiamupia)
[Tshimfuanyi mu dibeji 6]
Kinshasa (Congo)
[Tshimfuanyi mu dibeji 6]
Musambira (Rwanda)