Tutabalelayi bakuabu: Pa kubela kalumbandi
1 Patudi tuela muntu kalumbandi ne muoyo mujima, bidi bimukolesha ku muoyo, bimusaka ku ditumikila bidiye ulonga ne bimuenza disanka. Bana betu ba bungi mbafike ku dimona ne: kuela muntu kalumbandi ne muoyo mujima mu mêyi nansha makese patupu nkusake bantu bua kubateleja mu buambi. Kadi mmunyi mutudi mua kuela bantu batudi tuyisha lumu luimpe kalumbandi?
2 Ikala umona bidi bipitakana: Pakapingana Yezu mu diulu, uvua umona malu mimpe avua bisumbu muanda mutekete bia mu Asia Mukese bienza. (Buak. 2:2, 3, 13, 19; 3:8) Tuetu tutabalela petu bantu batudi tuyukila nabu mu buambi ne muoyo mujima, netukebe mishindu ya kubela kalumbandi. Tshilejilu, tudi mua kuela muntu kalumbandi bua mudiye mulame lubanza luende ne mankenda, kuela muledi kalumbandi bualu udi uleja mudiye munange muanende, ne kuela muntu kalumbandi padiye utuela muoyo ne disanka anyi utua mimuemue. Utuku pebe umona malu a mushindu eu, wela bantu kalumbandi anyi?
3 Ikala uteleja bimpe: Patudi tuyisha bantu, mbimpe tubele nkonko mimpe bua bafike ku diakula. Tubateleja ne muoyo mujima bua kubaleja mutudi tubatua mushinga. (Lomo 12:10) Nunku, netupete kabualu kimpe mu biambabu katudi ne bua kubelela kalumbandi ne kufika ku dipetangana nabu bimpe.
4 Ikala ne busunguluji: Kadi ntshinyi tshitudi mua kuenza padi muntu wamba bualu budi kabuyi bupetangana ne tshidi Bible ulongesha? Pamutu pa kubenga diakamue tshidiye wamba, mbimpe kumuela tuasakidila ne kuamba nansha ne: “Ndi mumone ne: udi munange tshiena-bualu etshi bikole.” (Kolos. 4:6) Nansha muntu yeye wela malu audi umuambila mpata, muela kalumbandi bua mudiye umueneka munange binudi nuyukila. Tuetu bikale ne bukalanga mushindu eu, netufike ku ditabijija muntu uvua kayi munange lumu luimpe.—Nsu. 25:15.
5 Bua tuetu kufika ku diela bantu kalumbandi, tudi ne bua kubatabalela ne muoyo mujima. Kuikala ne ngakuilu udi ukolesha bantu ku muoyo wa mushindu eu nekutumbishe Yehowa ne nekufikishe bantu ku ditaba lumu luimpe lua Bukalenge bua Nzambi.