Tuidikijayi Yehowa ‘Nzambi wa disanka’
1 Yehowa mmusue ne: bantu bikale ne disanka. Mu Bible mudi malu mimpe a bungi adi Yehowa mulongolole bua kuenzela bantu. (Yesh. 65:21-25) Bidi ne bua kumueneka ku mêsu kua bantu bakuabu ne: tudi ne disanka dia kubayisha ‘lumu luimpe lua butumbi bua Nzambi’ wa disanka. (1 Tim. 1:11) Mushindu utudi tuakula patudi tuyisha lumu luimpe udi ne bua kuleja mutudi banange bulelela ne mutudi tutabalela bantu batudi tuyisha.—Lomo 1:14-16.
2 Bushuwa, imue misangu bitu bikole bua kuikala dîba dionso anu ne disanka. Mu imue miaba, anu bantu bakese ke batu bitaba bua kuteleja lumu lua Bukalenge bua Nzambi. Pashishe kudi matuku atutu tuluangana ne ntatu ya mu nsombelu wetu tuetu bine. Patudi tuvuluka ne: bantu ba mu teritware wetu badi basungidibua padibu bateleja ne bumvua mukenji wa lumu luimpe utudi tubambila, tudi tushala amu ne disanka dietu. (Lomo 10:13, 14, 17) Tuetu tuelangana meji mushindu eu, netutungunuke ne kuikala ne disanka dia kuambila bantu malu mimpe adi Yehowa muenze bua kutusungila.
3 Amba malu adi akolesha bantu: Tudi kabidi ne bua kutabalela malu mine atudi tuamba. Nansha mutudi mua kutuadija kuyukila ne bantu bua bualu kampanda budi bubatonde, tudimukayi bua katulu kuimanyina anu pa malu adi atekesha bantu ku muoyo. Mbatutume bua kuamba “lumu lua diakalengele.” (Yesh. 52:7; Lomo 10:15) Lumu luimpe elu ndua malu mimpe adi Nzambi mulaye bua matuku adi kumpala. (2 Pet. 3:13) Nunku, tubadile bantu mvese idi mua ‘kusangaja mitshima ya badi batamba kunyingalala.’ (Yesh. 61:1, 2) Bualu ebu nebuambuluishe yonso wa kutudi bua kuikala dîba dionso anu ne disanka diende ne kuakula malu adi akolesha bakuabu ku muoyo.
4 Bantu kabakupanga kumona disanka ditudi nadi patudi tuyisha lumu luimpe to. Nunku, patudi tuyisha mu teritware wetu, tuenzayi muetu muonso bua kuikala amu ne disanka bu dia Yehowa ‘Nzambi wa disanka.’